¹ Kale kale Mulungu adasewera na abereki wathu kudzera mwa aneneri mmaseweredwe mazinji na munjira zizinjitsa. ² Soma munsiku zino zakumaliza, wasewera kuna ife kudzera mwa Mwana, omwe adamuikha kukhala wakupita m'buto wa bzinthu bwensene. Mkudzera pomwe mwa iye kuti Mulungu adamuikha wakuposa wensene. ³ Iye ni kubvunika kwa ulemerero bwa Mulungu, na chizindikiro chaichoicho cha chikhalidwe chache. Iye watakula bzensene pabodzi na mafala ya mphamvu yache. Pomwe adachita chicheneso cha bzakuipa, adakhala pansi kuboko la madidi la Ukulu mdzaulu. ⁴ Iye wakhala ninga mkulu kuna anjero ninga dzina ndilo adalibvala kuti ndakuposa dzina lawo. ⁵ Nakuti mkwa mjero uponi ndiye Mulungu adalewa kalembo kuti, ''Ndiwe Mwanangu, lero ndasanduka Babako''? Ayai mkuna mnjero uponi ndiye Muluingu adalewa kalembo kuti, ''Nimdzakhala Baba kuna iye, apo iye amdzakala Mwana kuna ine''? ⁶ Soma, pomwe Mulungu anibweresa Mwanache wakutoma kudziko lapansi, adati, ''Anjero wensene wa Mulungu amunamate iye.'' ⁷ Bzakuguma anjero iye adati, ''Iye ndiye omwe aniyesa anjero wache mizimu, apo na akapolo wache malambi ya moto. ⁸ Soma pakulewa bza Mwana iye adati, ''Kadera yanu ya chifumu, Mulungu, njakunthawe za nthawe. Mpsimbo yachilungamo ni mpsimbo ya ufumu bwanu. ⁹ Mwakonda chilungamo muchiwengana na chakuipa. Nithangwerache Mulungu, Mulungu wanu wakudzozani na mafuta ya chisekerero chaicho kuposa anzanu.'' ¹⁰ ''Pakutoma, Mbuya, mudaikha maziko ya dziko lapansi. Mdzaulumu ni basa la manja yanu. ¹¹ Iwo amdzamala, soma imwe mumdzakhalisa. Wensene amdzasakala ninga chakubvala. ¹² Mumdzawafunya ninga chakufunika, apo adzachinjiwa ninga chakubvala. Soma ndimwe umweyo, apo magole yanu yamdzamala lini.'' ¹³ Soma mkuna mnjero uponi ndiye Mulungu adalewambo kale nthawe inanngo kuti, ''Khala kuboko .langu la madidi ate ndidzasanduse awengi wako kukhala kadera yakuponda nzayo zako''? ¹⁴ Kodi ni mizimu lini ya anjero wensene ndiyo imbatumikira, na ndiyo imbatumiwa kutchenkha iwo omwe amdzapita mchipulumuso?