¹ Wakukondewa, ili ni tsamba langu lachiwiri lomwe ine ndanemba kuna imwe, Mwa mwensenemwe muli kukumbusiwa kutsitsimuka kwa pansi pa mtima wanu ² kuti imwe mukakumbuke mafala ndiyo yadaseweredwa kale na anyakunenera na malamulo ya Mbuya wathu Mpulumusi adapasiwa na atuki wanu. ³ Chakuyamba dziwa ibzi, anyakukusinjirirani adzabwera nsiku zakumaliza. Iwo adzakusinjirirani nkumbatewera ninga momwe iwo akufunira. ⁴ Iwo adzalewa, ''Lili kuponi pangano lakubwera kwache? Kuchokera pomwe azi babathu adafa, bzinthu bzikukhala chibodzibodzi, kuchokera pakutoma kulengiwa.'' ⁵ Iwo aayebwa kuti bzakulengiwa bzidakhala kale kale na mafala ya Mulumgu kuti kudzaulu na dziko lapansi bzidakonziwa kuchokera kumadzi na kudzela kumadzi, ⁶ kudzera kubzobzi dziko nthawe yomweyo lidadzongeka, nakumiziwa na madzi. ⁷ Na mafala yomweyo kudzaulu na dziko lapansi adzikoyeyera kumoto, adzikoya kufikila nsiku za chiyeruzo na kudzongeka kwa wanthu wasaya kupemphera. ⁸ Soma nampodi kuyebwa chinthu chibodzi, wakukondewa, kuti nsiku ibodzi kuna Mbuya ili ninga magole chulu, na magole chulu ili ninga nsiku ibodzi. ⁹ Mbuya ambachedwa lini nalo lonjezo lache, ninga winango ambachiona chakuchedwesa icho. Somatu, iye ambachita nsisi na imwe. Iye akufuna lini kuti winango wa imwe akadzongeke, soma kuti tense tikafike na kulapa. ¹⁰ Pinango pomwe nsiku ya Mbuya idzabwera ninga mbava: Kudzaulu kudzayenda na kukuwa kukulu. Bzinthu dzidza ngaka na moto, na dziko lapansi na bzakuchita bzache lidzapserera. ¹¹ Nakuti bzinthu bzensenebzi bzidza dzongeka nanjira imweyi, tsono mukhakhale wanthu wamtundu wanyi? Mukhale wanthu wakupumbulika na kupemphera. ¹² Imwe mukhale wakudikila nakufulumiza nsiku ya kubwera kwa Mulungu. Nsiku imweyo, kudzaulu kudzadzongeka na moto, na bzinthu bzidza sungunuka na kupsa kukulu. ¹³ Soma malingana na kulonjeza kwache ife tikudikila kudzaulu kwa tsapano na dziko lapansi la tsapano, lomwe wakulungama adzakhalisa. ¹⁴ Pamwepa, wakukondewa, ngakhale mukudikira bzinthu bzobzi, chitani bzabwino bzanu kuti mugumanike wakusaya banga na chipsera kuna iye, na mtendere. ¹⁵ Pomwe, yezezani kukumbuka Mbuya wathu na chipulumuso, ninga pomwe wakukondewa dzinza wathu Paulo adanemba kuna imwe, ninga bza nzeru zomwe zidaperekiwa kuna iye. ¹⁶ Paulo adalewa bza bzinthu bzobzi m'matsamba yache yense, mu ibzi muna nzinthu bzinanango bzakunesa kubzibvesesa. Wanthu anyakusaya kupfunza na anyakusaya kukhazikika ambapotoza bzinthu bzobzi, ninga iwo adachitira bzakunembera bzinango, iwo adabzidzonga okha. ¹⁷ Tsono, wakukondewa, imwe mukudziwiratu bza bzinthu bzobzi, bzinyang'anileni mwekha kuti imwe nampodi kutengeka nakuphonya kuna wanthu wale wakusaya kuyeruzika nakuti imwe mungaleke kuchita bzakulungama bzanu. ¹⁸ Soma kulani na chisomo nakudziwa bza Mbuya wathu Mpulumusi Yesu Khilistu. Kuna iye kukhale ulemerero tsapano na kunthawe zense. Ameni!