¹ Simoni Petulo, nyabasa na mtumiki wa Yesu Khilistu,kuna iwo omwe adatambira chikhulupiro cha muti wache ninga ife tidatambira, chikhulupilo na bza kulungama bza Mulumgu wathu na Mpulumusi Yesu Khilistu. ² Chisomo na mtendere bziwande naku thumizilika kuna Mulungu na Yesu Mbuya wathu. ³ Na mphamvu ya umulungu bwache, bzinthu bzense bza moyoadatipasa ife na kukumbila kudzera mwakudziwisa na iye omwe adatichemera ife kudzera mu ulemero bwache na kudeka kwache. ⁴ Kudzera mu ibzi iye adatipasa ife bzakutilonjeza bza muti weche bzikulu, na ibzi kuti mukakhale na makhalidweninga ya umulungu bwache, mukapulumuke kubza kubvunda bzomwe bzili pa dziko lapansi bzakunyosewa na kusirira. ⁵ Tsono na thangwe limweri, chitani bzakudeka bzanu kuthumizira pomwe kudeka kwa chikhulupiliro chanu, na kudeka kuthumizira bzidziwiso, ⁶ na bzidziwiso kuthumizira kubzilambiza_wekha, na kubzilambiza_wekha kuthumizira kupirira, na kupilira kuthumizira kupemphera, ⁷ na kupemphera kuthumizira chikondi cha paudzinza, na chikondi cha paudzinza chithumizira chikondi. ⁸ Penu bzinthu bzobzi bziri mwa imwepo bziniwanda mwa imwepo, iwo adzakusungani kuti nampodi kukhala wautofu pinango wakusaya bzipatso pakudziwisa kuna Mbuya wathu Yesu Khilistu. ⁹ Tsono ule omwe alibe bzinthu bzobzi ngwakusaya kuona iye ni zimola, iye ambayebwa kubzichenesa na kutaya bzakuipa bzache bzakale. ¹⁰ Tilepoyo, adzinza, chitani bzabwinobzanu kuti mukonze kuchemeriwa kwanu na kusankhuliwa kwachadidi, tsono penu imwe muni chita bzinthu bzobzi, imwepo mudza bonera lini. ¹¹ Na njira yimweyi kudza thumizilika kulemera kwanu pamsuwo wa kupita mu ufumu bwa Mbuya wathu na Mpulumusi Yesu Khilisitu. ¹² Na nthangwe limweri nthawe zense nidzakhala wakukonzeka kuku kumbusani imwe bzinthu bzobzi, neye penu imwe mukudziwa kale, neye penu ndimwe wakulimbika na chilungamo ndicho imwe munacho. ¹³ Ine ndikukumbuka kuti mpsabwino kuna ine, neye penu ine ndikukhala mchikhumbi, ndikupulumuseni na kukukumbusani. ¹⁴ Nakuti ine ndikudziwa kuti kusiya khumbi langu kuli pafupi, thangwe Mbuya wathu Yesu Khilistu adandilangiza kale bzobzi kuna ine. ¹⁵ Soma ine nidzachita pomwe kumkulumize kukuonani kuti pakuchoka kwangu imwe mwense mudzakwanise kukumbukira bzinthu bzobzi. ¹⁶ Tsono ife tilibe kutewera kuchenjera na miyambo yache yapezipezi pomwe ife tidakonza bzakukudziwisani imwe bza mphamvu nakubwera kwache kwa Mbuya wathu Yesu Khilisitu, soma ife tikhali mboni zakuona na maso bza ukulu bwache. ¹⁷ Nakuti iye adatambira ulemu na ulemerero kuna Mulungu Baba pomwe mafala yadabwera kuna iye na Ulemero Bukulu, achilewa, ''Uyu ndiye Mwanangu wakukondewa, na iyeyu nimbakomedwa naye.'' ¹⁸ Ife tekha pomwe tidabva mafala yomweya yakubwera kuchoka kudzaulu pomwe ife tikhanaye pabodzi iye ku phiri lakupambuliwa. ¹⁹ Soma ife tina mafala yaku lewera yakukhazikika kwenekwene, yomwe imwe munga chite nayo bwino muchiyateweza ninga chakubvunikila pa mbuto ya mdima kufikizana kukuyamba kuchena ninga nthanda ya kumachibese ikubvunika mumtima mwanu. ²⁰ Padzaulu pa bzensebzi, imwepo muyambe kubvesesa kuti palibe chilewedwe chakunembiwa chakale chomwe chidabwera na winango kuthandauziwa chokha. ²¹ Nakuti palibe kulewera komwe kudabwera thangwe la kufuna kwa munthu, soma wanthu ambasewera kuna Mulungu pomwe iwo aphatiwa na Mzimu wa Kuchena.