¹ Paulo,mtumwi wa Mkhirisitu Yesu malingana na chitongi cha Mulungu Mpulumusi wathu na chikhulupiriro chathu mwa Yesu, ² kuna Timoteo, mwana wa chadidi mchikhulupiriro: Chifundo, nsisi, na mtendere wakuchoka kuna Mulungu Baba na Yesu Mkhirisitu Mbuyathu. ³ Ninga ndimo ndidakudandaulirira pomwe ndikhagoneka kuyenda ku Macedoniya, tsala mu Aefeso pala kuti uwuze wanthu winango kuti nampodi apfunzise chipfunziso chakusiyana. ⁴ Neye pomwe kuti atetekere nkhani zapezipezi na mawerengedwe yakusaya kumala ya chi makolo. Ibzi bzimbanyosa kusaya kubverana zjai kusiyana na udindo bwa Mulungu, bwa Mchikhulupiriro. ⁵ Tsapano chimaliziro cha chitongi ni chikondi chakuchoka mumtima wakuchena, na chikum bumtimma chabwino, na chakuchoka kuchikhulupiriro chachadidi. ⁶ Wanthu wina asochera nabzo apo zjai asanduka wakumbasewera mbwambwa. ⁷ Akufuna kukhala apfunzisi wa mitemo ya utongi, soma akumbabvesesa lini bzomwe akulewa ayai bzomwe akungingimirabzi. ⁸ Soma tikudziwa kuti chitongi mchabwino ungambachiphatisa basa mwakuchiteweza. ⁹ Tikudziwa tere, kuti chitongi chiribe kuikhiwira munthu wakulungama, soma pala wanthu wakusaya kuyeruzika na wakusaya kubvera, wakusaya kuchena mtima, wakusaya kunamata, wakuphonya, wakunyoza, wakumbapha azibabawo na azimayi wao, wakupha anzao, ¹⁰ wanthu wachigololo, wakumbachita chigololo na amuna anzao, wakumbaba wanthu kukawaphatisa ukapolo, pala wakunama, wakumbachita umboni bwakunama, na wensene wakumbagaza chipfunziso chachadidi. ¹¹ Uthenga ubu m'bwaulemerero bwa kwa Mulungu wakulemekezeka bomwe iye adatikoyesa ine. ¹² Ndikutenda Mkhirisitu Yesu Mbuya wathu. Adandipa mphamvu, nakuti ambanditenga wakukhulupirika, achindiikha ku utumiki. ¹³ Napo kuti kalekale ndikhali wamakiriyado, wakuboneresa, na maluku. Soma adandichitira chifundo thangwe ndikhachita mwakusaya kudziwa na mwakusaya kukhulupirira. ¹⁴ Soma chifundo cha Mbuya wathu chidawanda pabodzi na chikhulupiriro na chikondi cha mwa Mkhirisitu Yesu. ¹⁵ Mafalaya ngakukhulupirika na yakuthemera kuna wensene kuyabvuma, kuti Yesu adabweradi padziko lapansi kudzapulumusa wakuphonya waiwowa omwembo ine ndine mkulu. ¹⁶ Soma na thangwe loli adandichitira chifundo, kuti mwaine, mkulu, Mkhirisitu Yesu akaonesere kugwesa mtima kwache kwense. Iye adachita bzobzi kuti chikhale chitewezo kuna wale wakukhulupirira iye mtsogolo ku moyo wakusaya kumala. ¹⁷ Tsapano kwa mfumu yakusaya kumala, yakusaya kubvunda, yakuti imbaoneka lini, Mulungu yekhayo, kukhale ulemu na ulemerero kufikira nthawe zanthawe. Amen. ¹⁸ Ndikuikha chitongi ichi kuna iwe, Timoteo, mwanangu, malingana na kusewera kwa kubvimira ndiko kudaseweriwa kalekale bza iwe, kuti ulimbane nayo nkhondo yabwino, ¹⁹ kuphatisa chikhulupiriro na chikumbumtima chabwino. Pakulamba ibzi, winango adabwedza achitaya chikhulupiriro chawo. ²⁰ Amwewo ni Humenayo na Alesandriyo, omwe ndawapereka kuna Satana pala kuti akapfunzisiwe kulekeza kusewera makiriyado.