¹ Tsapano bza nthawe na nyengo, adzinza, bzinkufunika lini chinango chache chakuti akunembereni. ² Nakuti imwe mukudziwa kale kuti nsiku ya Mbuya idzabwera ninga mbava usiku. ³ Nthawe ndiyo adzalewa kuti, ''Mtendere na chitetezo,'' Kenangoko kudzabwera kudzonga kuna iwo. Bzidzakhala bzakuwawa ninga ndimo ambabvera mkazi pa nthawe ya kubala. Padzakhala palibe njira yakuthawira. ⁴ Soma imwe, adzinza , mulilini mu m'dima kuti nsiku imweyi idzakugwerani ninga mbava. ⁵ Nakuti mwense ndimwe wana wakugaka wana wa masikati. Ndife lini wana wa mdima na usiku. ⁶ Tsono, nampodi tigone ninga adachitira wakusalawo. M'malo mwache, tendeni tikhale tidapenya na wakusaya kuledzera. ⁷ Nakuti iwo omwe nigona ambagona usiku, nawale aniledzera ambaledzera usiku. ⁸ Soma pakuti ifepano tili wa ku masikati, nampodi tiledzere ndipo tikhale nachikhulupiliro na chikondi ninga chakubvala cha pakadedema, na chapewu cha chiyembekezero cha chipulumutso. ⁹ Nakuti Mulungu alibe kutisankhula kuti tikayeruziwe soma kuti tikapulumusiwe mwa Mbuya wathu Yesu Khilistu, ¹⁰ ngumweyo ndiye adafa thangwe la ifepano, kuti penu tinamoyo pinango tafa, tikakhale pabodzi na iye. ¹¹ Tsono chenjezanani na kumangirilana munthu na namwanzache, ninga moda mukuchitayi. ¹² Tinkukumbirani imwe, adzinza, kuti mudziwa wanthu ndiwo nkaphata nawo basa na iwo ndiwo ali akuluakulu wanu ndiwo ambakulangizani mwa Mbuya, ¹³ tikukubvunzani kuti mumbawapase ulemu mwa chikondi thangwe la basa lawo. Khalani mwa mtendere pa imwe mwekhamwekha. ¹⁴ Tili nkukudandaulirani imwe, adzinza: Achenjezeni iwo ndiwo mbaatofu, alimbiseni asaye kugopa, limbasani mitima kwa wanthu wense . ¹⁵ Nyang'anani kuti palibe ndiye ambabwezele chakuipa thangwe la chakuipa kuna munthu mwanzache. Soma, londani ndicho chili chabwino kuna anzanu na kuna wense. ¹⁶ Komedwani nthawi zense. ¹⁷ Namatani nampodi kuwodzira. ¹⁸ Pachili chense mbatendani. Nakuti ibzi ndibzo anfuna Mulungu mwa Khilistu Yesu kuna imwe. ¹⁹ Nampodi kuthimisa Mzimu. ²⁰ Nampodi kunyoza bzakulewa aneneri. ²¹ Yezelani bzinthu bzense. ²² Phatisisani chinthu ndicho nchabwino. Khalani kutali na chilichense chakuipa. ²³ Mulungu wa mtendere akucheneseni mwakumaliza. Mzimu wanu, moyo wanu, na thupi lanu bzikoidwe bzakusaya kuphonya pakubwera kwa Mbuya Yesu Khilistu. ²⁴ Wakuchemera imwe ngwakukhulupilika, ni omweyo omwe adzachita pomwe terepoyo . ²⁵ Adzinza, muti namatire ifepano. ²⁶ Muwaseweze adzinza wense na mphsomphsono wakuchena. ²⁷ Ndikukulamurilani mwa Mbuya kuti tsambali lilewengiwe na adzinza wense. ²⁸ Chisomo cha mbuya wathu Yesu Khilistu chikhare na imwe.