¹ Soma bza ibzi mudanembabzi: ''Kuli kwachadidi kuna munthu kusaya kukhuya mkazi.'' ² Soma thangwe la madama, munthu aliyense akhale naye mkazache wache yekha, na mkazi aliyense akhale naye bayache wache yekha. ³ Mamunayo apase kuna mkazache mangawa, na telepo pomwe mkazi kuna bayache. ⁴ Mkazi alibe utongi kuna thupi lache la iye yekha, Soma mamuna ndiye anautongi. Soma telepo pomwe, mamuna alibe utongi kuna thupi lache la iye yekha, Soma mkazi anabo. ⁵ Neye kulambizana, Soma na kutawilizana kwanu ndiko kwa nthawe. Chitani ibzi kuti mukabzipereke kuna kupemphera. Kinangoko kukakhala pomwe pabodzi, kuti satana angakuyezeni thangwe la kubzilambiza kwanu. ⁶ Soma ibzi ndikulewalewa ninga mwa kubvuma neye ninga mwa kutonga. ⁷ Ndikadabva kukoma aliyense akadakhala ninga momwe ndilili inepano. Soma munthu aliyense alinayo mphatso yache ya iye yekha kuna Mulungu. Winango mphatso ina, na winango yamtundu winango. ⁸ Soma nilewalewa kuna wakusaya kulowola na kuna akazi amasiye kuti kukhali kwadidi kuna iwo akhale wakusaya kulowola, ninga ine. ⁹ Soma penu amdziwalini kubzilambiza, alowozesewe. Poti mkwadidi kulowola kuposana na kuwawidwa mtima. ¹⁰ Soma wakulowodwesewawo niwalamulira__ neye ine, Soma Mbuya__kuti mkazi asaleke bayache ¹¹ (soma penu amuleka bayache, akhale wakusaya kulowodwa pinango ayanjanisiwe pomwe na mamuna), apo mamunayo asalekane naye mkazi wache. ¹² Soma kuna wakusalawo niwalewa__ ine, neye Mbuya__ ninga mdzinza winango alinaye mkazi wakusaya kukhulupira, apo iye adamutawira mumtima akhale naye pabodzi, asalambane naye. ¹³ Apo mkazi omwe ali naye mamuna wakusaya kukhulupira, adamutawira mumtima iye akhale naye pabodzi asalambane nye mamunayo. ¹⁴ Nakuti mamuna wakusaya kukhulupirayo anichenesewa mwa mkaziyo, na mkazi wakusaya kukhulupilrayo anichenesewa mwa mdzinzayo. Ninga kukada telepoyo lini wana wanu akadakhala wakusaya kukonzeka, Soma tsapano akhala wakuchena. ¹⁵ Soma wakusaya kukhulupirayo anichoka, mulekeni achoke. Mmilandu yakutelepa, ambamangiwa lini ukapolo mdzinzayo pinango nanayo. Soma Mulungu watichemera ife mu ufulu. ¹⁶ Nakuti unidziwatani, mkazi, iwe ninga udzapulumusa mamunayo? Pinango unidziwatani, mamuna, iwe ninga udzapulumusa mkazi? ¹⁷ Soma, momwe Mbuya wagawira kuna wense, momwe Mulungu wachemelera wense momo afambe. Apo telepo niika m'mipingo yense. ¹⁸ Kodi wakuchemeliwa winango wagwatiwa? Asakhale wakusaya kugwatiwa kodi wachemeliwa winango wakusaya kugwatiwa. Nampodi agwatiwe thangwe iye wachemeriwa na chikhulupiro? Iye alibe kugwatiwa. ¹⁹ Nakuti mgwatiwe ulibe basa na kusaya kugwatiwa kulibe basa. Soma kukoya kwa malamulo ya Mulungu. ²⁰ Aliyense akhale m'machemeliwe ya iye momwe Mulungu adachemeliwamo. ²¹ Kodi udachemeliwa uli kapolo? Ibzi nampodi bzikubonereseni. Soma ngati mungakwanise kutsudzuka, tsudzukani. ²² Nakuti iye omwe akhale kapolo pomwe adachemelewa na Mbuya ni mfulu ya kuna Mbuya. Telepo pomwe, omwe akhali mfulu pomwe adachemelewa ni kapolo wa mbuya. ²³ Ndimwe wakuguliwa nampodi kukhala akapolo a wanthu. ²⁴ Adzinza aliyense pakukhala wache wa mulungu adamuchemera. ²⁵ Tsopano bza madende, ine ndilibe lamulo lakuchoka kuna Mbuya. Soma ni nipereka malingiliro yangu ninga munthu omwe, mwa chifundo cha Mbuya, kukhala wakukhulupilika. ²⁶ Nakuti, ndikukumbuka kuti thangwe la bzakunesa ndili nsiku zino, nakuti mkwadidi kuna munthu kakhala momwe ali. ²⁷ Kodi wamangiwa kuna mkazi? Nampodi kutsudzuka. Penu mwatsudzuka kuna mkazi, nampodi kufuna mkazi. ²⁸ Soma ngati unilowola, ulibe kuphonya, apo penu ni dende linilowodwa, lilibe kuphonya. Soma awo wakupita m'banja amdzagumana na bzakunesa bzizinji mthupi, apo nimkulekani. ²⁹ Soma nilewa ibzi, adzinza: Nthawe yafupika, Kuchokera tsapano awo akukhala nawo akazi akhale ninga ngati alibe. ³⁰ Wakulira akhale ninga wakusayakulira, wakudekedwa akhale ninga wakusaya kudekedwa, wakugula chinthu akhale ninga nkwanisa lini kukuyenera kukoya, ³¹ wakuphatisa basa bzadziko lapansi lino akhale ninga bzikuwakhudzalini. Poti momwe dziko lapansi lino lili pali pano lili kuyenda. ³² Ine ninifuna kuti imwe mutsudzuke kuna bza kukumbuka. Munthu wakusaya kulowola ambatondo kukumbikira bza Mbuya, momwe angadekezele mbuya. ³³ Soma wa pa banja ambakumbukira bza dziko lapansi lino, momwe angadekezere mkazache__ ³⁴ na mkazi wakulowodwa. Na dende ambasiyana uyo wakusaya kulowodwa ambakumbukira bza mbuya, pala akhale wakuchena m'thupi na mzimu. Soma wakulowodwayo ambakumbukira bza dziko lapansi kuti akomedwese bayache. ³⁵ Soma ibzi ndikulewa mwa kuphindula kwanu, kuna imwe mwekha neye kuti ndikukuteyela mulapu. Soma kukuthandzizani kuchita bzomwe bziniyenera, na kutewera chitewerere Mbuya pakusaya kupanikiziwa. ³⁶ Penu winango ankumbuka akumuchitira mwa kuphonya dende lomwe atomelana nalo ubwenzi apo__ngati dendelo lapita bzaka apo aniwona kuti__mkwakufunika. Kumulowola aniyenera kuchita telepo. Ninga wafunira nkuphonyalini alowolane. ³⁷ Soma uyo omwe aniyima wakukhazikika mumoyo mwache, wakusaya chakukakamiza soma ali nabo ulamuliro wapachakufuna cha iye yekha, nkutsimikiza ichi mmoyo, mwache kukoya mwanache wa mkazi, amdzachita bwino. ³⁸ Telepo tsono omwe anilowoza dendeli anichita bwino, telepo pomwe omwe anilowozalini dendelo anichita bwino kwenekwene. ³⁹ Mkazi ngwakumangika kuna bayache pomwe mamunayo akanamoyo. Soma ngati mamunayo anifa, anikhala wakutsudzuka kulowodwa na winango omwe angamufuna, Soma mamunayo akhale wa kuna Mbuya. ⁴⁰ Soma anikhala wakudekedwa kwenekwene ngati anikhala ninga momwe ali. Ninga mwa kuyeza kwangu apo nimkumbuka pala inepano pomwe ndili naye mzimu wa Mulingu.