¹ Pe uYesu ahinjila havili mu sinagogi, mwer mwali umuntu we ayumiye inyove. ² Avantu vamo vahamwenyelezya nkani nanti uwene angamjupozya pisiku ilya sabata ukuti vave nizyakumususya wuyo. ³ U Yesu ahayanga ku muntu we ayaumiye inyove, ''Nyamuha uyimilile pakasi pali vonti.'' ⁴ Pe ahayanga kuvantu, ''Lungava lulajiro pamo ukuvomba uvunanzi; ukuvupoha uvulanzipamo ukugoga?'' nkandi avene vapumile. ⁵ Uwene ahavenyelezya nu vuhalazu nu vugomu uvwa moyo gavo, pe uwene ahamuvuzya umuntu, ''golosya inyove yaho,'' Ahagolosya, ninyove yakwe yihapola. ⁶ Ava Falisayi vahepa loli umwaluvilo vahanda ukumulondola ni mpuga iya Herodi ukuti vamugoje. ⁷ Pe uYesu, navasundikwa vakwe, vahavala kwa sumbi, pe impuga impiti iya vantu yihamulandata ukufuma mu Galileya na mu-Yudeya ⁸ na mu-Yerusalemu na mu-Idumeya na mwisyila ilwa Yolodani ukuzyungulila u Tiro nu Sidoni. lwe vazivwa zila ahavombaga, impuga impiti yihinza ku kwakwe. ⁹ Ahavavuzya avasundikwa vakwe ukuti vasenganie nzila uvwato uvunji pakuti pali impuga, ukuti avene vatahatutanaje nawo. ¹⁰ She apozizye avinji, nukuti wonti we ali nintamyo apepushililwe ukwinza kukwakwe ukuti amupalamansye. ¹¹ Ahavalilizyo honti he impepo inkandamanu zyamwenya, zihagwanga pansi pantanzi yakwe nu kulila, pe zihati, ''Iwe we mwana wa Mulungu.'' ¹² Ahazipumilizya kumaha ukuti zileshe ukumutambula. ¹³ Pe ahazuva kwi gamba, nukuvitizya vala ve ahavanzaga, pe avene vahinza kukwakwe. ¹⁴ Pe ahavasala 12 (ve ahavataha vapositili) ukuti vave nawope nukuti avatume ukulumbilila izwi, ¹⁵ nukuti vave nuvulamulilo uvwa kupilila impepo inkandamanu. ¹⁶ Pe ahavaseva 12: Usimoni, wula we amupiye izina u Peteli; ¹⁷ U Yakovo umwana wa Zebedayi, nu Yohani umukulu wa Yakovo, wula we amupiye izina uBonajezi, lye likuti, avana va kujilima; ¹⁸ nu Andireya, nu filipu, nu Batolomeyo, nu matayi, nu Tomasi, nu Yakobo umwana wa Alufeyo, nu Tadeyo, nu Simoni umu Ziloti, ¹⁹ nu Yudasi isikalyoti, we akwinza ukumulonjelela wuyo. ²⁰ Pe uwene ahavwela kuhaya, ni mpuga yihinza poka havili, she zitali zyakuti vangalya ishakulya. ²¹ Lwe ava munyumba yakwe vivuye izi, vahafuma kunzi ukumulema, she vatili, ''Apungine.'' ²² Pe ava simbi ve vafumiled ku Yerusalemu vatili, ''ali nu Belizebuli'' ''ukujendela kwa mulongozi uwa mpepo akuzifumya impepo inkandamanu.'' ²³ U Yesu ahavitizya nukuvavuzya ku viholanio, ''Ishi usatana angamupilila usatana?'' ²⁴ Nanti uvu Mwene vungavushilana vweka, uvu Mwene vula vutangimilila. ²⁵ Nanti inyumba yingagavinkana yeka, inyumba yila yitangimilila. ²⁶ Nantin u satana angayivushila wuyo weka akugavinkana, pe atangimilila, kwe kuti asila. ²⁷ Nkandi nawumo we anginjila munyumba iya muntu uwa maha nukumwivila ivyakwe nanti atamupinyile tasi uwamaha uyo, pe akusanya ivya munyumba yakwe. ²⁸ Nalyoli nkuvavuzya imwe, uvutalamalandu vonti uvwsa vana ava vantu vulitetelwa,na zila zyonti izya musamu zye vahazitambulaga, ²⁹ ''Nkandi uno wonti we akumusamula umupepo umufinjile we atalitetelwa nalumo, nkandi aliva nuvutalamalandu uvwa shima na shima.'' ³⁰ U Yesu ahashiyanga ishi pakuti vevavo vahayangaga, ''Ali ni mpepo inyazu.'' ³¹ Lwe unyina na vamwavo vinza vimiliye kunzi. Vahatuma ku kwakwe, pa kumwitizya. ³² Impuga yihaye ukumuzyungulila wuyo pe vahamuvuzya vahati, ''Umama waho na vamwinyu vali panzi, vakukulondola iwe.'' ^{33 34 35} Ahavamula vavo, ''Ve vawenu veve vamama na vamwitu?'' Ahenyelezya ponti ku vala ve vihaye ukulivilila ahati, ''Yenya, apa pe pali umama wane na vamwitu! She wonti we akuvomba ukwanza ukwa MUlungu, umuntu wewula we wamwitu, muyemba, wu mama.''