¹ Nene, papo kwene, ngati ne munyepwa wakwe mwene, nkhuwalenga ukuti mwapita umunzila ndivino yawamile. ² Nkhuwalenga ukwikala umwakuyichefya ukukalamba nu muwunthu na muwufuwuke, nu kwikala ponga mulukundo. ³ Muwombesye ukusunga uwuponga wa mupasi mukulemelelana kwa mutende. ⁴ Kwaya umwili wonga nu mupasi wonga, ndivino namwe yawamile mwisuwilo lyonga ilyalwamo. ⁵ Nupya kwaya mwene wenga, isuwilo lyonga, uluwatizyo wonga, ⁶ na Leza wenga na Tata wakwe swensi, wino ali papela pali vyonsi nukupitila muli vyonsi nupya muli vyonsi. ⁷ Kuli wenga na wenga muli sweswe uluse lwapelwa ukuyana nichipimo cha chawupi chakwe kilisitu. ⁸ Chili ndi vino amawaliko yakulanda: ''pano wakwelanga kupela pela, wakolelile ayanyepwe muwunyepwe, nukupela ivyawupi ku yanthu.'' ⁹ Wuzye chi chikusula chani ''Wakwezile,'' ukufumyako ukuti wichile mwisika umuwuputule wansi? ¹⁰ Wiyo wino wichilile ali munthu wino nupya wakwelile ukupela sana kwiyulu lyonsi. ¹¹ Kilisitu wapile yamwi ukuya aya positoli, yamwi ukya ayakasowela, yamwi yakatanda yamazwi, yamwi ngati ayawomvi na ya sambilizi. ¹² Wawapile intchito iyakupekanya ayanthu ayalungamane yakwe Leza pakuwomba umulimo, nukuwuzenga umwili wakwe kilisitu. ¹³ Akapitilizya ukuzenga umwili wakwe mpaka swensi tuze tufike pali pamwi mwi suwilo nukumanya kwa mwana wakwe Leza, nukuti tuye swe yakukula nukufika mu chipimo chawuzule wakwe Kilisitu. ¹⁴ Kilisitu akatuzenga umwakuti tutaya swinya swe yana yano yakuyingana yingana namawimbi, nukunyamulwa, nu muza uwa kupusana pusana vino ayanthu ya wufi yakusambilizya nu kuponzya ayanthu mukuchenjela kwawo. ¹⁵ Muwuyo wakwe ukuvwanga ichumi mulukundo, tulingine ukukula munzila yonsi muli weliwe wino umukalamba wino a Kilisitu ¹⁶ Kilisitu akazenga umwili wonsi, nukuti akawukomenkhanya nukuwuyika ponga nukulemelela ni nkhole, nupya pano imbali yonga yikuwombela ponga, chino chikupanjisya umwili ukukula umwakuti wukuyizenga wonga mu lukundo. ¹⁷ Apano, nkhuwanena nukusimichizya pali chino muli mwene, ukuti mutati mwapita muno aya mitundu yakupitila mumelengwi yawo ayasilesile. ¹⁸ Yali umunfinzi pakuvwichisya kwawo, nukufuma ku wumi wakwe Leza pamusango uwawula kumanya kuno yali nako pamulandu wakukoma kwa myenzo yawo. ¹⁹ Yatali ninsonyi nukuyitwala muwuchende, nukupanga ivyawupopo ivyakulekana lekana ukwawula ukuyilema. ²⁰ Kweni asavino mwasambilile ukuyana na Kilisitu. ²¹ Nkhumanya ukuti muvwapo vyakwe weliwe, nukuti mwasambilile muli weliwe, muno uwumolimo wuli muli Yesu. ²² Yawasambilizizye ukufumya imisango iyikali muwumi, pakufumya umunthu umukote. Umunthu umukote wino wayonona pakukumbuchila ivyawufi. ²³ Yawasambilizye ukuya mweyapya mumupasi wa mumano yinu, ²⁴ nukuyika umunthu umupya wino wawelengwa umuchata chakwe Leza-muwuchumi na muwutiswe. ²⁵ Apano, lekini uwufi, nukuti lekini wensi avwange ichumi kumupalamani wakwe, pamulandu wakuti swensi sweyali yamwi. ²⁶ Mwasoka kweni mutayembuka. ²⁷ Mutasoka mpaka ilanzi likinjile. Mutamupela satana insambu. ²⁸ Wino wiyanga aleke. mumalo mwakwe, awomba ivisuma namakasa yakwe, umwakuti angaya na vimwi vino angankhana na yano yakuvilonda. ²⁹ Muleke ukufumya imivwango iyiyipe ukufuma mumilomo yinu. Wonvyini umuvwango uwusuma wutupu kuli yano yakuwulonda, umwakuti amazwi yinu yangamanya ukupa umutende kuli yano yakuvwa. ³⁰ Mutapela amalanda umupasi wakwe Leza, pakuti amuli weliwe muno mulamanyikwa pawanda wakusapulwa. ³¹ Fumyini uwukali wonsi, ichipyu, ukusoka, ivyongo, nukutalikana, ponga nuluyembu lwa musango wonsi. ³² Mwaya nuluse kuli wenga na wenga, umwenzo wa wila, ukutetelana, muno Leza muli Kilisitu wawatetile.