¹ Wensi we akusubila ukuti Yesu we Mesiya lyo we Mwana wakwa Leza, nawensi we akatemwa u wise lyo akatemwa nu mwana wache. ² Mwa chonye cho mo tukamanyilanga ukuti tukamutemwa umwana wa kwa Leza, ndi tukatemwa u Leza twivwilanje amasundo yache. ³ Pantu ukutemwa ko tukatemwa u Leza ko koo kwivwila kwa masundo yache. Kabili amasundo yache yatakatu womela. ⁴ Pantu wensinye umwana wakwa Leza angachinvya ivyamunsi. Koo kokwe ku chinvya ko tuchivanga ivya munsi, ni subilo litu. ⁵ Nga weweni angachinvya ivya munsi? Peka peka wakusubila ukuti u Yesu we Mwana wakwa Leza. ⁶ Yesu Kilisitu we akiza, akiza naminzi aya ku batizwa kwache nu bwazi bwafwa yache. Umuzimu nye nu lwache wo wukakapanikisya ukuti chonye cho chochisinka, pantu U muzimu wa chisinka. ⁷ Kuli ivintu vitatu: ⁸ u Muzimu, aminzi, nu bwazi vyo vitatu vizumizyanianga. ⁹ Tupanikisyanga ichichetekelo cha bantu, ukweni ukupanikisya kwa Leza kwa chisinka, fwandi konyekoo, kokupanikisya ko u Leza akapa Umwana wache. ¹⁰ Fwandi wensinye we akasubilo Umwana wa kwa Leza ali nu bupanikisyo mumoyo wache, ukuba wensi we atakasubila u Leza, u Leza akamubika pa bufi, mo atakasubilaukupanikisya ko u Leza akasubila Umwana wache. ¹¹ Bonye boo bo bukamboni, u Leza akatupa ubumi bwa muyaya, ubuminye bo buli mu Mwana wache. ¹² Wensi wali nu mwana ali nu bumi, na wensi we atali nu mwana wa kwa Leza ate nu bumibwa muyaya. ¹³ Naba lembela ivintuvyonye vyo pakuti mumanye ukuti muli nu bumi u bwa muyaya. Imwenye mwe bantu mukasubila mwizina lya mwana wakwa. ¹⁴ Koo, ko kuchetekela ko tuli nako pantanzi pa Leza. Umulandu wakuti tukasininkizya ukuti akutwivwanga chonsi cho tungalenga kwa yuyo. ¹⁵ Akutwivwanga chonsicho tungamulenga yuyo. Mo tukamanyila bonye bo, tukamanya ukuti, akutupanga chonsi cho twamulenga yuyo. ¹⁶ Ndi yumo , umunyabo akuchita ulubembu lote lwa kufwa afwile ukupepa kwa Leza, u Leza ali nukumupa ubumi. Choo chabela bo, ulubembu lwabo lutanga batwala kumfwa. Ukuba kuli ulubembu lo lungabatwala kumfwa, ulweni lutakayana nu kuti mu nga pepa kwa Leza, ivya lubembunye lo. ¹⁷ Inchito zyonsi izibipe lo lubembu, ukuba kuli ulubembu lumo lote lwamfwa. ¹⁸ Tukamanya ukuti, Umwana wakwa Leza atatwalililanga nu lubembu. U Kilisitu aku muchingililanga, nu mubipenye atanga atanga muchita ichibipe nanti chimo. ¹⁹ Tukamanya ukuti sweba kwa Leza chingatenga aba munsi bonsi bakanyepwa nu lubembu. ²⁰ Kabili tukamanya ukuti u Yesu Kilisitu akatupa amano ya kwi luka, pakuti tumanye ukuti u Leza wachisinka. Ubulanzi bwitu buli mwa kwa Leza witu uwachisinka, mu Mwana wache u Yesu Kilisitu. Wenye we, we Leza wa chisinka, wepe wabulanzi bwa muyaya. ²¹ Bana bane yitalukanjiko ku twa Leza twabufi.