¹ Mwebakutemwika,bane, mutakize mu chetekelanji imizimu yonsi, ukuba mwelezyanje ndi umuzimu wu kafuma kwa Leza. Mo abantu abavule basalangine munsi. ² Ko mwandi mu manyilanje ndiwewuwo Umuzimu uwa kwa Leza. U wamuzimu wensi wakulandanga pa lwenze, ukuti u Yesu Kilisitu akiza ngati we muntu, lyo ali nu Muzimu wakwa Leza. ³ Ukuba wensi wa kukana ivya kwa Yesu lyo ate nu muzimuwo wukafuma kwa Leza. Uwonye lyo wo muzimu wo wukafuma kwa Kilisitu, wo mukivwa ukuti wu liza, nanombanye wu kiza wulimonye mu munsi. ⁴ Bana bane, imwe mwe ba kwa Leza, mukachinvya abakasesema aba bufi, umulandu wakuti umuzimu wo wuli mwimwe wuli namaka amavule ukuchila umuzimu wo wuli nabo bakatemwa ivya munsi. ⁵ Bakulandanga ivya munsi na munsi bakubivwanga, moba munsi. ⁶ Ukuba iswe swe bakwa Leza. Wensi we akamanya u Leza akamwivwanga, wete wakwa Leza atakumwivwanga. Kwa chonye cho, kotukumanyilanga umuzimu uwa chisinka nu muzimu uwa bufi. ⁷ Mweba kutemwika, tutemwane, ukutemwana kukafuma kwa Leza. Wo ali nu kutemwa, lyo we mwana wa kwa Leza nu Leza nye aka mumanya. ⁸ Umuntu watakamanya ukutemwa nu Leza nye atakamumanya, Mo u Leza wekutemwa. ⁹ Mwakwa chonye cho mo u Leza akatulanjizyaukuti akatutemwa iswe. Leza akatuma Umwana wache umutele munsi pakuti tube nu bumi mwa yuyo. ¹⁰ Mo ukutemwa kukabela, tekuti tukatemwa u Leza, ukuba we yuyo akatutemwa, atuma umwana wache, we mwakwa yuyo mo ulubembu lwitu lukatetelwamo. ¹¹ Mweba temwika, ndu Leza akatutemwa bonye bo, naswe tufwile tutemwananje weka nu munyabo. ¹² Pate wakatela alola u Leza, ndi twatemwana weka nu munyabo, u Leza akwikalanga mwiswe, nu kutemwa kwa che kuka vulisya mweswe. ¹³ Mu chonye cho, mo tukumanyilanganga ukuti tukwikalanga mwa Leza wepe mwiswe. ¹⁴ Naswenye tukapanikisya nu kunena banji, ukuti Umukukwasi akatuma Umwana wache, ukwiza ukutula abamunsi. ¹⁵ Wensi wazumila, ukuti u Yesu we mwana wakwa Leza akwikalanga mwa yuyo, we mwa Leza. ¹⁶ Niswenye nu lwitu tukamanya ukutemwa, ko u Leza akatutemwa.U Leza wekutemwa, na wensi wakwikala mukutemwa, lyo akwikala mwa Leza, nu Leza akwikala mwa yuyo. ¹⁷ Cho ulukundo lukavulisya mwiswepakuti twize tube na maka pa bwanda bwa kupanzwa, moo ubumi bwitu munsi mo, bukakolana nu Kilisitu. ¹⁸ Mukutemwa mutaka intete, ukutemwaukwasikila kubinganga intete. Chaleka fwandi wakutina lyo ate nu lukundo ulwafika pa kafiko, mo abantete batinanga isundo. ¹⁹ Tukatemwana, u Leza we akatalikila atemwa. ²⁰ Ndi yumo ati, ''inkatemwa u Leza ,'' ukuba akapata unyanche, lyo we chabufi.Atanga temwa u Leza we ataka mulola, apate umunyanche, we akumulola. ²¹ Chaleka, tuli nisundo lyo u Kilisitu akatupa, ilya kuti, we akatemwa u Leza atemwa nu munyabonye.