¹ Nanthi pali ukughomia kumo mwa Kilisitu, nanthi pali ubuhobosu bumo ubwa kwiza nu lughano, nanthi pali ubupoka bumo mu muzimu, nanthi pali iviza vimo sona ni vibabilizi, ² Po mupange ukuhoboka kwane kwizule chifukwa chakuba ni nsibo yoka mu muzimusona nukuba ni chakulondiwa choka. ³ Mutakabombe nachimo mubupafupamo mukwitunvya, Mubuyo bwache nukwiyisya mwinong'onere abanyinu akiza ukulusya mwebenencho. ⁴ Leka weka wa umwe atakalingenge ivyakuhobosya vyache vyene, loli sona nivyakuhobosya vyabanji. ⁵ Mube ni nsibo iyi mumwinu yoyikaba sona na mwa Kilisitu Yesu, ⁶ yo, ukwendela mukabonekele ngati we Chala, atakasenda ukuyana kwache nu Chala ukuba chimo chakukolelako. ⁷ Mubuyo bwache, akivula mwene pakusenda akabonekele ka wa mbombo, sona akapapwa muchifwani cha banthu. ⁸ Akichefya mwene nukuba wakwivwila mphaka ku bufwe, na kubufwe bwa pa mphinjika! ⁹ Polelo U Chala wepe akamukwezya hee. akamupa izina ilya pamwanya pamazina ghonsi. ¹⁰ Akabomba ichi umwakuti mwizina lya Yesu ichimphenvu chonsi chifugamile, ivimphemnvu vya bakumwanya na bapachisu sona naba pansi pachisi. ¹¹ Akabomba ichi umwakuti ululimi lonsi lwitikizye ukuti U Yesu Kilisitu we Mwene, kubuchindamu bwa Chala uTata. ¹² Po ulu, ba wamwitu bane, ngati momukwivwilira akabalilo konsi, po ndipo pene awe, loli nkhani nkhani napo nthalipo, mubombele ubupoki bwinu nu bogha sona nukutetema. ¹³ Pakuti yo Chala we akubomba mumwinu ukuti mulonde sona nukubomba chifukwa cha bwighane bwache. ¹⁴ Bomba ivinthu vyonsi ukusita ukudandaula ¹⁵ Po ukuti mwize mube basita kafukwa na baswepu, bana ba Chala abasita kafukwa pakasi pa mphapiziwe ya bujanja nu bubibi mo umwe mukubala ngati bwelu muchisu. ¹⁶ Mube ku mazyu gha bumi po ukuti pisiku lya Kilisitu nize imbe wakubusila ukuti pabwaka pamo ukubomba pabwaka. ¹⁷ Loli napo ningapunguliwa ngati chakusopa pakwipa sona nu bubombi bwa lwitiko lwinu, ne wakusansamuka nu kuhoboka numwe mwebonsi. ¹⁸ Mukabele koka numwe bubo mubaghile musansamuke sona nukuhoboka nune. ¹⁹ Loli nkhusubila mwa Mwene U Yesu pakubatumila u Timoti lunonyene, po ukuti imbenge wa kughoma po nkhumanya ivinthu vinu. ²⁰ Pakuti nthenawe uyunji nayumo ngati weyuyo, yo naloliloli akubinong'onela umwe. ²¹ Pakuti bonsi bakulonda ivyakubahobosya bene, ivinthu vya Yesu Kilisitu hagha. ²² Loli mumenye ubukabi bwache, chifukwa ngati we mwana umulondo nu wise, po akabomba nune mubulumbilili. ²³ Po nkhusubila pakumutuma lunonyene nanthi nalinga mo ivinthu vya mbela. ²⁴ Loli indi nukusimikizya mwa Mwene ukuti nunenye inthi nize lunonye. ²⁵ Loli nkwinong'ona ukuti chakubaghiliwa paku batumila U Epafuloditasi kukwinu sona. We wamwitu sona mubombi munyane sona wa bwite munyane, sons mutumiwa winu sona wambombo wa vyakulondiwa vyane. ²⁶ Pakuti akatamiwa hee mumoyo, sona akanyonywanga ukuba numwe mwebonsi, chifukwa mukivwa ukuti akaba mulwale. ²⁷ Pakuti momumo akaba mulwale hee ukuti pera akafwa. Loli U Chala akaba ni chisa papache, sona papache pene awe loli na papane bubo, umwakuti nthakabe nichitima pa chitima. ²⁸ Po chikumpha ukulonda sona ukuti nkumutuma, umwakuti nanthi mukumulinga sona mwize muhoboke, sona po ningaba nichitima ichinandi. ²⁹ Mupokelele Epafulodita mwa Mwene nukuhoboka, Bachindika abanthu ngati yuyo. ³⁰ Pakuti chikaba chifukwa cha mbombo ya Kilisitu chocho akizila kupipi nubufwe. Akabika ubumi bwache pa bulwani pakubombela une sona nukufisya cho umwe ngali mutakambombele une