¹ Chifukwa ilamulo ili chizunda cha vinthu iviza vyo vikwiza. tekuti vinthu vivyo na vivyo boba kwiza kwa Chala batangaba bakufikapo nukwipa ko abaputi bakalenga umwaka nu mwaka. ² Nnapo buli ivyakwipa vingaleka pakubikiwa? aba kwiputa bangaba ukuti baswepiwe kale sona batanghaba na mabyebye gha mbibi. ³ Loli nivyakwipa vila pali ichikumbusyo cha mbibi umwaka nu mwaka. ⁴ Chifukwa techipepe pakuti udaba wankambako ni mbuzi ukufumia imbibi. ⁵ Bo U Kilisitu iza pa chisu, akati, ''ivyakwipa ni vyakusopa mutakuvilonda, loli umubili gho mwa njanizia ume; ⁶ Nivyakusopa vyakocha ni vyakusopa vya mbibi mutakahoboka. ⁷ Po une nkuti, ' Linga, une indi pano - ngati movisimbiliwe ivyane muma seleti - ukuyana nune paku bomba ubwighane bwinu.''' ⁸ Pabwandilo akati, '' tevyakwipa, pamo vyakusopa Pamo ivyakusopa ivyakocha vyonsi, pamo vyasopa ivyambibi vyomukulonda. pate nachimo cho chakuhobosya mumwinu ,'' ivi vyakwipa vyovikubikiwa ukuyana nululaghalilo. ⁹ Po akati, '' linga apa po indi pakubomba ubwighane bwinu. akufumiapo akabombele ka bwandilo ukuti andisye akabombele ka chibili. ¹⁰ Nilaghano ili twabaghilisiwa ukwendela muvyakusopa ivya mubili wa Yesu Kilisitu lyoka na kubwile. ¹¹ Isiku ni siku umuputi akwimilila nukubomba nu kusopa ivya kwipa vyakuyana sona - ivyakwipa vyo vitangafumia imbibi. ¹² Loli bo U Kilisitu abika chakwiputa cha kabalilo konsi icha mbibi, akikala kunyobe iya ndyelo iya Chala. ¹³ Akulindilila mupaka aba lughu bache babe chikalilo cha vinama vyache. ¹⁴ Chifukwa ni cha kusopa choka akupanga bakufikapo bwile bo babaghilisiwe. ¹⁵ Umuzimu umuswepu ghukutwimilila uswe, pa kwanda akuti, ¹⁶ '' Ili lyo lilaghano lyo nkwiza pakupanga nabo pakumala kwa masiku agho, ukuti umwene. Nkwiza pakubika indaghilo zyane mu myoyo yabo, sona Nkwiza pakuzisimba mu nsibo zyabo.'' ¹⁷ Po akongelezya akuti, '' imbibi zyabo nu kupuba kwabo une tenkakumbuke sona.'' ¹⁸ Ulu kokuti uluhobokele lwa ivi, kute sona ukwipa chifukwa chambibi. ¹⁹ Polelo, ba wamwitu tuli nulusimikizyo ulwakwingila mu malo amaswepu nkani nu daba wa Yesu. ²⁰ Yoyo nzila imphya nivyabumi yo andisizye chifukwa chitu ukwendela muchakuvwinka, kokuti, mu nzila ya mubili wache. ²¹ Chifukwa tuli nu muputi umukulu pa mwanya pa nyumba ya Chala. ²² Zanga tubuke ni myoyo ya bwanaloli nukwizila nu lwitiko lwa bwanaloli, kuba nu myoyo yitu yakuswepa nukunyanfiwa ukufumia insibo imbibi sona nukuba nimibili yitu iya koziwa na minziamaswepu. ²³ Zanga tukole kusita kutetema kulusubilo lo tukitika, chifukwa yo akalaghizya wakusubiliwa. ²⁴ Zanga twinong'onele mo tungavwizwa weka nu munyabo pa kughana nukubomba iviza. ²⁵ Zanga tutakaleke pakukomana poka ngati mo bamo bapngile. mubuyo bwache , ghommya weka nuyunji nkani sona nkhani , sona nukuchilapo po mukulinga ukupalamila ku kabalilo. ²⁶ Chifukwa nanthi uswe tukubukilila pakunangila amadinkho po tupokelite kale ubumanyi bwa bwanaloli, ichakwipa cha mbibi chitangabapo sona. ²⁷ Mubuyo bwache, pali bwaka ichakoghofya choka cho chikulindilila pa bulongelo, sona ni chi bwina cha moto cho chikwiza pakumala abalughu ba Chala, ²⁸ Wensi yo akana ilamulo lya Mozesi akafwanga ukusita chisa pabukaboni bwa babili pamo batatu. ²⁹ Ka bubibi buli, bwa lufundo bo mukwinong'ona umunthu angapokela akanyila pansi U Mwana wa Chala, Yo abombezya udaba lilaghano kuba lisita kuswepa - udaba yo akamubaghilisya - sona nu kutuka umuzimu wa bwila? ³⁰ Pakuti tumanya yo akati, '' ukunyokezya kwane; nkwiza ukunyosya,'' sona , ³¹ U Mwene akwiza pakulonga abanthu bache,'' Chinthu chakoghofya ichakuba pa nyobe zya Chala wabumi! ³² Loli kumbuka amasiku ghabwandilo bo mwapokela ubwelu, mo mukafwilila ukupota ivya kubaba. ³³ mukabikiwa pabwelu mu vyaku susya pakutuka nu kukoma, sona mukagabananga poka nabo bo baka pulunsania mu vyakubaba ngati ivi. ³⁴ Chifukwa ukaba ni chililizi pa bo bakapinyiwa, sona mukitizya nukuhoboka nukupusika kwa vyo mulinavyo. umwe mwebenencho mukamanya ukuti muli navyo iviza sona ivya kusita ukumala. ³⁵ Po mutakataye ulusubilo lwinu loluli nukulipiliwa ukukulu. ³⁶ Pakuti mukulondiwa ukufwilila ukuti nanthi mwabomba ubwighane, bwa Chala, mukwiza pakupokela cho akulaghizya. ³⁷ pakuti pakabalilo akanandipo, yo akwiza inthi ize sona mwakusita kukaba. ³⁸ Abagholosu bane bakwiza ukwikala mu lwitiko. nanthi akunyokela kwisinda, ntakwiza ukohoboka nawe.'' ³⁹ Loli tute swe ba bamo bobakunyokela kwisinda ukuya kukunangika, loli twe ba bamo bobali nu lwitiko sona bakusunga imizimu yabo.