¹ Chochila cho chikafuma ku bwandilo_cho swe tukivwa, cho uswe tukalinga namaso ghitu, cho uswe tukachilinga sona ni nyobe zitu zikakola_ukuyana na mazwi agha bumi. ² Sona, nu bumi bukamanyikwa pa bwelu, sona uswe twabulinga, sona tuli nu bukaboni pa vino, uswe tukufumusya kwa umwe izya bumi bwa bwile na bwile, bo bukaba nu Tata, sona bo bukamanyikwa kwa uswe. ³ Chochila cho uswe tukalinga sona tukivwa po nuswe tukubamanyisya umwe, po numwe mubungane poka nuswe. Mulubungano ulu muli u Tata nu Mwana wache, Yesu Kilisitu. ⁴ Sona, uswe tukubasimbila ivinthu ivi kukwinu ukuti ubuhobosu bube bwa kufikapo. ⁵ Agha ghomakani gho twivwa ukufumila ku kwache sona ghafumusiwa ku kwinu: U Chala muswepu, sona mumwache mute ichisi nalumo. ⁶ Nanthi uswe tunganena ukuti tuli poka nawe, sona tukwenda mu chisi, uswe bo tukutamantha sona bo teswe ba bwanalori. ⁷ Lori nanthi uswe tukwenda mu buswepu ngati mo abelire muswepu, tulipoka mu lubungano weka nu yunji, sona nu daba wa Yesu umwana wacheatusuke uswe ku mbibi zitu zyonsi. ⁸ Nanthi uswe tukuti tute ni mbibi, tuli pakwipusika twebene, sona ubwanalori bute mumwitu. ⁹ Lori nanthi tukulapa imbibi zitu, wa bwanalori sona angatuhobekela imbibi zitu nukutusuka uswe vyo vitaswepite vyonsi. ¹⁰ Nanthi uswe tukunena ukuti tunangite, tukumubika umwene ukuba mumyansi, sona izwi lwache lite mu mwitu.