¹ Karon mahitungod sa oras ug panahon, mga igsoon, dili na kinahanglan nga aduna pay isulat kaninyo. ² Kay kamo mismo nakahibalo pag-ayo nga ang pag-abot sa adlaw sa Ginoo ingon usab sa kawatan sa gabii. ³ Sa dihang moingon sila nga "Malinawon na ug walay katalagman," kalit nga moabot dayon kanila ang kalaglagan ingon sa mabdos nga babaye nga nagbati, ug wala gyuy paagi nga sila makalikay. ⁴ Apan kamo, mga igsoon, wala kamo sa kangitngit nga maapsan kamo inana nga adlaw sama sa usa ka kawatan. ⁵ Kay kamong tanan mga anak sa kahayag ug mga anak sa adlaw. Dili kita mga anak sa gabii o kangitngit. ⁶ Mao nga, dili kita matulog sama sa gihimo sa uban, apan kanunay kita nga magbantay ug anaa sa maayong hunahuna. ⁷ Kay sila nga nangatulog, nangatulog sa gabii ug sila nga nahubog, nahubog sa gabii. ⁸ Apan kay kita mga anak man sa adlaw, kinahanglan aduna kitay maayong hunahuna; ibutang nato ang taming sa dughan sa pagtuo ug gugma, ug ingon nga helmet, ang kasigurohan sa atong umaabot nga kaluwasan. ⁹ Kay wala kita gitakda sa Dios nga makadawat kita sa iyang kapungot, kondili nga makadawat kita sa kaluwasan pinaagi sa atong Ginoong Jesu Cristo, ¹⁰ nga namatay alang kanato aron nga bisag buhi kita o patay, mabuhi kita kauban niya. ¹¹ Busa hupayon ninyo ug lig-unon ang usa'g usa sama sa inyong gibuhat na. ¹² Naghangyo ako kaninyo, mga igsoon, nga ilhon ninyo sila nga naghago ug nagdumala kaninyo sa Ginoo, nga nag-awhag kaninyo. ¹³ Naghangyo sad ako kaninyo nga taas ang pag-ila ninyo sa ilaha sa gugma tungod sa ilang mga buluhaton. Pagdinaitay kamo sa usa'g usa. ¹⁴ Giawhag kamo namo, mga igsoon: pasidan-i ang mga gubot, dasiga ang nawad-an ug paglaum, tabangi ang mga maluyahon, magpailob ang tanan. ¹⁵ Magmatngon kamo nga walay bisag usa nga mobalos ug dautan sa dautan bisan kang kinsa, apan kanunay nga maningkamot kamo sa pagbuhat ug maayo sa usa'g usa ug sa tanan. ¹⁶ Magmalipayon kamo kanunay, ¹⁷ mag-ampo nga walay undang, ¹⁸ magpasalamat sa tanan, kay mao kini ang kabubut-on sa Dios kaninyo diha kang Cristo Jesus. ¹⁹ Ayaw ninyo ug supila ang Espiritu. ²⁰ Ayaw ug tamaya ang mga propesiya. ²¹ Susiha ninyo ang tanang butang; ug kupti ang maayo. ²² Likayi ninyo ang tanang dautan. ²³ Hinaut nga ang Dios sa kalinaw mismo maghingpit sa inyong pagkabalaan, ug ang inyong tibuok nga espiritu, kalag, ug lawas maampingan aron walay ikasaway kaninyo sa pagbalik sa atong Ginoong Jesu Cristo. ²⁴ Matinumanon siya nga nagtawag kaninyo nga mao sad ang magbuhat niini. ²⁵ Mga igsoon, i ampo sad kami. ²⁶ Kumustaha ang tanang mga igsoon sa balaan nga halok. ²⁷ Naghangyo ako kaninyo diha sa Ginoo nga kini nga sulat basahon ninyo sa tanang mga kaigsoonan. ²⁸ Hinaut nga ang grasya sa atong Ginoong Jesu Cristo maanaa kaninyo.