¹ Sa katapusan, mga igsoon, gidasig ug giawhag kamo namo diha sa Ginoong Jesus, nga sama sa inyong pagdawat sa mga pagtulon- an gikan kanamo mahitungod sa pagkinabuhi ninyo ug pagpahalipay sa Dios, sama sa inyo nang gibuhat--mas buhaton pa unta ninyo kini. ² Kay nakahibalo kamo sa katudloan nga among gihatag kaninyo pinaagi sa Ginoong Jesus. ³ Mao kini ang kabubut-on sa Dios, nga magpakabalaan kamo--diin nga likayan ninyo ang lawasnong imoralidad, ⁴ aron matag usa kaninyo makahibalo kung unsaon pagpakighiusa sa iyang kaugalingong asawa sa pagkabalaan ug pagtahod, ⁵ dili sa lawasnon nga mga pagbati (sama sa mga Gentil nga wala makaila sa Dios), ⁶ ug aron walay tawo nga makalapas ug makabuhat ug sayop sa iyang igsoon mahitungod niini nga butang, tungod kay ang Ginoo ang mobalos sa tanan aning mga butanga, sama sa among gipahimangno ug gisaksi kaninyo. ⁷ Kay wala kita gitawag sa Dios sa kahugaw, apan ngadto sa pagkabalaan. ⁸ Busa, ang mosalikway niini wala nagsalikway sa tawo, kondili sa Dios, nga naghatag sa iyang Balaang Espiritu kaninyo. ⁹ Bahin sa paghigugma nga inigsoonay dili na kinahanglan nga aduna pay mosulat kaninyo, kay kamo mismo gitudluan sa Dios nga maghigugmaay sa usa'g usa. ¹⁰ Gani, gibuhat na ninyo kini sa tanang mga kaigsoonan sa tibuok Macedonia, apan gi-awhag kamo namo, mga igsoon, nga mas buhaton pa ninyo kini. ¹¹ Giawhag sad kamo namo nga maningkamot kamo nga maghinilum, dili manghilabot sa uban, ug magkinabuhi sa inyong kaugalingon mga kamot, sama sa among gisugo kaninyo. ¹² Buhata kini aron magmaayo ang inyong pamatasan nga adunay pagtahod sa mga wala pa sa pagtuo, ug aron wala kamoy kinahanglanon. ¹³ Dili namo buot nga masayop kamo sa pagsabot, mga igsoon, mahitungod sa mga nangatulog, aron dili kamo maguol pag-ayo sama sa uban nga walay kasigurohan sa kaugmaon. ¹⁴ Kay kung mituo kita nga si Jesus namatay ug nabanhaw, mao sad nga ang Dios ikuyog niya kang Jesus kadtong diha kaniya nga mga nakatulog. ¹⁵ Kay kini gisulti namo pinaagi sa pulong sa Ginoo, nga kitang mga buhi, mga nahabilin inig balik sa Ginoo, sigurado nga dili kita mag-una sa mga nakatulog. ¹⁶ Tungod kay ang Ginoo mismo monaog gikan sa langit, nga adunay magsinggit, nga adunay tingog sa arkanghel, ug adunay trumpeta sa Dios, ug ang mga patay diha kang Cristo mouna sa pagkabanhaw. ¹⁷ Unya kitang mga buhi, nga mga nahabilin, modungan kanila nga isaka sa mga panganod aron tagbuon ang Ginoo sa langit, ug unya kita kanunay nang uban sa Ginoo. ¹⁸ Busa, hupaya ninyo ang usa'g usa niini nga mga pulong.