¹ Tu̧ru̧hua̧ Diosmä i̧huȩnȩ ucuocuinödo Jonásrö, Amitaii̧rö̧. Pä'inödo: ² Täi Nínive ötahuiyära̧'a̧, ötahuiyä rö̧ȩnä̧ jo̧mȩ. Juhua'a ka̧cuä̧tö̧ suronä jȩa̧'a̧ topösä ttömä. Ja̧'hua̧nö̧ ja̧'a̧ ö̧ji'ähuäjitö. ³ Ja̧'hua̧nö̧ ja̧'a̧ Jonás ä̧rä̧mi̧'ö̧ tö'ipächinödo Tu̧ru̧hua̧ Dios ä'ca jo̧mȩttö̧ Tarsis ötahuiyära̧'a̧ 'chä̧nö̧. Ja̧u̧ 'chi̧nö̧do Jope ötahuiyära̧'a̧. Juhuorö po̧cui̧ pi̧nö̧do huoi'ca rö̧ä̧'ca Tarsisra'a 'chä̧'ca. Jahuä'canä 'chä̧tö̧cu̧ i̧'cha̧ pä'ö pä̧mä̧dö̧ mitinödo. Ja̧u̧mä̧ Tu̧ru̧hua̧ Dios ä'ca jo̧mȩttö̧ oto töipächa pä'inödo. ⁴ Ja̧'hua̧nö̧ ja̧'a̧ Tu̧ru̧hua̧ Diosmä hue'inödo rö̧ȩnä̧ kä̧rö̧'coppa pä̧i̧cu̧nä̧ mȩyȩhui̧'a̧ pä'ö aje rö̧oto 'cho̧mȩ kä'cottö. Kä̧rö̧'coppa rö̧ȩnä̧ kä̧rö̧'co̧hua̧'a̧ttö̧ huoi'ca pparächi'ö'anö ji̧na̧'a̧do. ⁵ Huoi'ca jacuä adicuä ttö̧ja̧ ye'inätödo. Jahuätömä ttö̧ä̧nä̧hua̧ pö̧nä̧ ya̧u̧cu̧nä̧ huopinätödo. Jacuä'ca jacuä pȩjö̧mä̧ dochäu icuinätödo aje jacuoto huoi'ca joje'ächi'a pä'ö. Ja̧'hua̧nö̧ ja̧'a̧ Jonásmä dea'anä isä̧jä̧nä̧ ä̧'ä̧rö̧ pinödo. ⁶ Jahuä'ca huoi'ca u̧ru̧hua̧ 'chä̧hui̧'ö̧ pä'inödo Jonásrö: ¿Dä̧bö̧ ä̧'ä̧rö̧ cu̧'ä̧? Ä̧rä̧mi̧'ö̧ ucuocui cu̧huä̧nä̧hua̧rö̧, ¿Ja̧u̧mä̧ ujuturu rerö̧jö̧nä̧ amöcuädocö toteö juiya pä'ö? ⁷ Yotöcunä ucuocuinätödo tta̧hua̧ru̧hua̧cu̧. Pä'inätödo: Ichätucui. Ka̧cuä̧mö̧ totäcuähuätucua pä'ö diö suronä ja̧ja̧ pä'ö. Ja̧'hua̧nö̧ jä̧ji̧mä̧ Jonásttö ja̧'a̧ ji̧na̧'a̧do. ⁸ Jahuätö pä'inätödo ja̧u̧ru̧: Ji'ähuitö. ¿Tta̧'a̧nö̧ jȩcu̧'ä̧ ja̧'a̧ ja̧'hua̧nö̧mä̧ suronä ja̧'a̧cuä̧ttö̧? ¿Däje juäi cuaditä'ijättö? ¿Tottö cuichäjätö? ¿To jä̧ttö̧ ucu cui̧rȩjȩmä̧? ¿Titö ju'otö i̧sa̧ jä̧ttö̧ ucumä? ⁹ Ja'huanö jäepäcu ädänödo: Ttömä, kada'caömä hebreo ttö̧ja̧ i̧sa̧sä̧. Ttömä ucuotösä Tu̧ru̧hua̧ Tö̧ä̧nä̧hua̧ Diosrö, mo̧ro̧jä̧ra̧'a̧ kö̧rö̧, aje rö̧oto'inä, de'a'inä adinörö. ¹⁰ Ja̧'hua̧nö̧ päomenä, jahuätö u̧mä̧tö̧ juiyo ye'inätödo pärocua'a päi'önä. Ja̧'hua̧nö̧ ja̧'a̧ttö̧ pä'inätödo ja̧u̧ru̧:¿Tta̧'a̧nö̧ pä'ö jȩcu̧'ä̧jä̧ttö̧ ja̧'hua̧nö̧mä̧? Jahuätö u̧mä̧tö̧ huo̧jui̧nä̧tö̧do Dios ä'ca jo̧mȩttö̧ töipächäja'amä täcö jiähuäja̧'a̧ttö̧. ¹¹ Pä'inätödo: ¿Tta̧'a̧nö̧ jȩtä̧cu̧ttö̧ ucurumä kä̧rö̧'coppa huirochi'iyatö pä'ömä? Ja̧u̧nu̧mä̧ kä̧rö̧'coppa ji̧nä̧ isocu kä̧rö̧'co̧ hui̧na̧'a̧do. ¹² Ja'huanö ja̧'a̧ ädätinä̧u̧do. Pä'inödo: 'Chu'huädö do'opö icuätucuittö aje rö̧otonä kä̧rö̧'coppa huirochi'iyätucuacu pä'ömä. Täcö huo̧jua̧sä̧. Iso päi'önä ttötä suronä jȩchä̧ja̧'a̧ttö̧ 'cuäopa'a ucuturu pi̧yȩmä̧. ¹³ Ja'huanö päa'anä jahuätö u̧mä̧tö̧ jua'ähuinätödo jäyoto pätti'a pä'ö. Ja'huanö ja̧'a̧ juruhuächi'ö juattähua'anä hueyecuinätödo kä̧rö̧'coppa ji̧nä̧ isocu pä̧i̧cu̧nä̧ kä̧rö̧'co̧hua̧'a̧ttö̧ jahuätörö. ¹⁴ Ja̧'hua̧nö̧ ja̧'a̧ Tu̧ru̧hua̧ Diosrö ucuocu pä'inätödo. Jitämä ucuru jä'epätöjä Tu̧ru̧hua̧ Dios, piderö suronä jȩtö̧ micuä timitäu juiyäcua'anö. Ujuturu ro̧cu̧huȩpä̧' piderö cuä'ö ticu micuä päi'önämä. Ucumä ucurutä pä̧huä̧ rö̧jo̧mȩnä̧ hue'äjijä pä'inätödo. ¹⁵ Ja̧'hua̧ ja̧'a̧ Jonásrö 'chu'huädö do'opö icuinätödo aje rö̧otonä. Ja̧'hua̧nö̧ jȩtto̧mȩnä̧, aje rö̧oto huirochi'ina'ado. ¹⁶ Ja̧'hua̧nö̧ ja̧'a̧ttö̧ jahuätö u̧mä̧tö̧ rö̧ȩnä̧ ye'inätödo Tu̧ru̧hua̧ Diosrö. Ja̧'hua̧ta̧nö ku icu iyähuä jȩpi̧nä̧tö̧do Tu̧ru̧hua̧ Diosrö ttiya pä'ö. Ja̧'hua̧ta̧nö̧ jȩttä̧cuȩ huȩnȩ ji'äu ku̧ni̧nä̧tö̧do Tu̧ru̧hua̧ Dioscu. ¹⁷ Ja̧'hua̧nö̧ ja̧'a̧ Tu̧ru̧hua̧ Dios hue'inödo po̧i̧ i̧sa̧ böorö, Jonásrö rahuädi'a pä'ö. Ja̧'hua̧ nö̧ ja̧'a̧ Jonás ja̧u̧ po̧i̧ i̧sa̧ öacuä jacuä ȩqui̧nö̧do huäbodäcuä mo̧ro̧ jo̧mȩnä̧.