¹ O quinto anxo tocou a trompeta, e vin unha estrela que caera do ceo á terra, e foille dada a chave do pozo do abismo. ² Cando abriu o pozo do abismo, subiu fume do pozo coma o fume dun gran forno, e o sol mailo aire escureceron por mor del. ³ E do fume saíron lagostas á terra e foilles dado poder como o poder que teñen os escorpións da terra. ⁴ Díxoselles que non danaran a herba da terra, nin cousa verde algunha, nin ningunha árbore, senón só ás persoas que non teñen o selo de Deus na fronte. ⁵ Non se lles permitiu matar a ninguén, senón atormentalos por cinco meses; e o seu tormento era como o tormento dun escorpión cando fere a unha persoa. ⁶ Naqueles días a xente buscará a morte e non será quen de atopala; e desexará morrer, e a morte fuxirá deles. ⁷ O parecer das lagostas era semellante a cabalos preparados para a batalla, e sobre as súas testas tiñan coroas que parecían de ouro, e as súas caras eran coma facianas. ⁸ Tiñan cabeleiras coma cabeleiras de muller, e os seus dentes eran coma de leóns. ⁹ Tamén tiñan uns peitorís coma peitorís feitos con ferro, e o balbordo das súas ás era coma o balbordo de carros de cabalos que corren á batalla. ¹⁰ Tiñan colas semellantes ás dos escorpións, con aguillóns, e o seu poder estaba nas súas colas para danar as persoas durante cinco meses. ¹¹ Sobre elas teñen por rei ao anxo do abismo, Abadón en hebreo, e Apolión en grego. ¹² Pasou o primeiro "ai"! despois disto aínda veñen dous "ai"! ¹³ O sexto anxo tocou a trompeta, e escoitei unha voz que saía de entre os catro cornos do altar de ouro diante de Deus, ¹⁴ que dicía ao sexto anxo que tiña a trompeta: -Ceiba os catro anxos que están atados xunto o río Eufrates. ¹⁵ E foron ceibados os catro anxos que foran preparados para a hora, o día, o mes e o ano, para matar á terceira parte da xente. ¹⁶ O número dos exércitos de a cabalo, douscentos millóns. Eu escoitei o seu número. ¹⁷ E na visión vin os cabalos e aos que os montaban, que tiñan peitorís de lume, de zafiro e de xofre. E as testas dos cabalos eran coma cabezas de leóns, e das súas bocas saía lume, fume e xofre. ¹⁸ Por estas tres pragas foi morta a terceira parte da xente: polo lume, polo fume e polo xofre que saía da boca deles. ¹⁹ Pois o poder dos cabalos está na súa boca e nos seus rabos; pois os seus rabos son semellantes a serpes, que teñen cabezas e danan con elas. ²⁰ E o resto da xente, a que non morreu por estas pragas, tampouco se arrepentiu das obras das súas mans para deixar de adorar os demos e os ídolos de ouro, de prata, de bronce, de pedra e de madeira, que non poden ver, nin oír, nin andar; ²¹ e non se arrepentiron dos seus homicidios, nin das súas bruxerías, nin da súa fornicación, nin dos seus furtos.