¹ Meu fillo, non te esquezas do meu ensino, e que o teu corazón garde os meus mandamentos, ² porque engadiranche lonxitude de días e anos de vida e paz. ³ A misericordia e a verdade nunca se afasten de ti; átaas ao teu pescozo, escríbeas na táboa do teu corazón. ⁴ Así atoparás graza e boa estima diante dos ollos de Deus e da xente. ⁵ Confía en Iahveh con todo o teu corazón e non te apoies no teu propio entendemento. ⁶ Recoñecédeo en tódolos teus camiños, e El endereitará os teus vieiros. ⁷ Non sexas sabio aos teus propios ollos, teme a Iahveh e afástate do mal. ⁸ Porque será menciña para o teu corpo e refrixerio para os teus ósos. ⁹ Honra a Iahveh cos teus bens e coas primicias de todos os teus froitos; ¹⁰ entón os teus celeiros encheranse con abundancia e os teus lagares rebordarán de mosto. ¹¹ Meu fillo, non rexeites a disciplina do Señor nin aborrezas a súa reprensión, ¹² Porque Iahveh a quen ama reprende, como un pai ao fillo en quen se deleita. ¹³ Bendito o home que atopa a sabedoría, e o home que adquire o entendemento; ¹⁴ porque a súa ganancia é mellor que a ganancia da prata, e o seu beneficio é mellor que o ouro fino. ¹⁵ É máis preciosa que as pedras preciosas, e nada do que desexas pódese comparar con ela. ¹⁶ Días dabondo hai na súa man dereita, e na súa man esquerda, riquezas e honra. ¹⁷ Os seus camiños son camiños agradables e todos os seus vieiros, son sendas de paz. ¹⁸ É árbore de vida para os que botan man dela, felices son os que a abrazan. ¹⁹ Coa sabedoría Iahveh fundou a terra, e coa intelixencia estableceu os ceos. ²⁰ Coa súa ciencia os abismos foron divididos e os ceos destilan o orballo. ²¹ Meu fillo, non se afasten estas cousas dos teus ollos, garda a prudencia e a discreción, ²² e serán vida para a túa alma, e graza á túa gorxa. ²³ Entón andarás seguro no teu camiño, e o teu pé non tropezará. ²⁴ Cando te deites non terás temor, si, deitaraste e o teu sono será doce. ²⁵ Non temerás o espanto que chega de súpeto, nin o ataque dos malvados cando veña, ²⁶ porque Iahveh será a túa confianza, e gardará o teu pé de ser apresado. ²⁷ Non rexeites o ben a quen se lle debe, cando estea na túa man facelo. ²⁸ Non digas ao teu próximo: vai e volve, e mañá dareicho, cando teñas contigo o que darlle. ²⁹ Non maquines o mal contra o teu próximo, mentres viva seguro ao teu carón. ³⁰ Non contendas con ninguén sen motivo, se non che fixo mal. ³¹ Non teñas envexa do home violento, nin escollas ningún dos seus camiños; ³² porque o home pervertido é abominable para Iahveh; mais El é o amigo íntimo dos rectos. ³³ A maldición de Iahveh está sobre a casa do malvado, pero El bendice a morada do xusto. ³⁴ Certamente El búrlase dos burladores, pero dá graza aos humildes. ³⁵ O sabio herdará honra, pero os necios fan resaltar a súa deshonra.