¹ Meu fillo, se recibes as miñas palabras e gardas os meus mandamentos dentro de ti, ² facendo caso da sabedoría, e inclinando o teu corazón ao entendemento; ³ se clamas á prudencia e alzas a túa voz ao entendemento, ⁴ se a procuras coma a prata, e a rebuscas coma a tesouros escondidos, ⁵ entón entenderás o temor de Iahveh, e descubrirás o coñecemento de Deus. ⁶ Porque Iahveh dá sabedoría; da súa boca veñen a ciencia e a intelixencia. ⁷ El reserva o acerto para os rectos, é escudo para os que andan en integridade, ⁸ garda os vieiros da xustiza, e preserva o camiño dos seus santos. ⁹ Entón discernirás xustiza e o dereito, a equidade, e todo bo vieiro; ¹⁰ porque a sabedoría entrará no teu corazón, e o coñecemento será grato á túa alma; ¹¹ a discreción velará sobre ti, e a prudencia hache gardar, ¹² para te librar do vieiro do mal, da xente que fala cousas perversas; ¹³ dos que deixan os vieiros da rectitude para andaren polos camiños escurecidos; ¹⁴ dos que se deleitan en facer o mal e alégranse nas perversidades do mal, ¹⁵ os seus vieiros son torcidos, e os seus camiños perdidos. ¹⁶ Ela librarache da muller estrana, da descoñecida que te adula coas súas palabras, ¹⁷ a que abandona o compañeiro da súa mocidade, e esquece o pacto do seu Deus; ¹⁸ Porque a súa casa inclínase cara a morte, e as súa sendas cara os mortos; ¹⁹ todos os que entran nel, non volven, nin retornan os vieiros da vida. ²⁰ Así andarás no bo camiño, e gardarás os vieiros dos xustos; ²¹ porque os rectos habitarán na terra, e os de corazón limpo permanecerán nela; ²² pero os malvados serán cortados da terra, e os perversos serán desenraizados dela.