¹ Un fillo sabio acepta o consello do seu pai, pero o burlador non escoita a reprensión. ² Cada un comerá o ben do froito da súa boca, pero a alma dos traidores hase fartar de violencia. ³ O que garda a súa boca, preserva a súa vida; o que abre moito a boca, rematará na ruína. ⁴ A alma do preguiceiro desexa, pero non acada nada, mais a alma dos dilixentes quedará satisfeita. ⁵ O xusto aborrece a falsidade, pero o malvado faise odioso e vil. ⁶ A xustiza garda o íntegro no seu camiño, pero a maldade trastorna o pecador. ⁷ Hai quen pretende ser rico, e non ten nada; hai quen pretende ser pobre, e ten unha grande fortuna. ⁸ O rescate da vida dunha persoa pode estar nas súas riquezas, pero o pobre non escoita ameazas. ⁹ A luz dos xustos desborda ledicia, pero a lámpada dos malvados será apagada. ¹⁰ Pola soberbia só vén a disputa, pero cos que reciben bos consellos está a sabedoría. ¹¹ A riqueza obtida con fraude hase desvanecer, pero o que a recolle con traballo auméntaa. ¹² A esperanza que tarda enferma o corazón, pero o desexo cumprido é árbore de vida. ¹³ O que despreza a palabra pagará por ela, pero o que teme o mandamento será recompensado. ¹⁴ O ensino do sabio é fonte de vida, para afastarse das trapelas da morte. ¹⁵ O bo entendemento produce favor, pero o camiño dos perversos vai á ruína. ¹⁶ Toda persoa prudente obra con coñecemento, pero o necio fai ver a súa tolería. ¹⁷ O mensaxeiro perverso cae en desgraza, mais o mensaxeiro fiel trae sanidade. ¹⁸ A pobreza e a vergoña virán ao que menospreza a corrección, pero o que acepta o consello será honrado. ¹⁹ O desexo cumprido é doce para a alma, pero para os necios é abominación afastarse do mal. ²⁰ O que anda cos sabios será sabio, pero o compañeiro dos necios bótase a perder. ²¹ A desgraza persegue aos pecadores, pero aos xustos a paz e o ben. ²² A persoa boa deixa herdanza aos seus fillos, pero a riqueza do pecador está reservada para o xusto. ²³ O barbeito dos pobres ten moito que comer, pero é varrido pola inxustiza. ²⁴ O que escatima o castigo aborrece o seu fillo, pero o que o ama corríxeo con dilixencia. ²⁵ O xusto come ata saciar o seu apetito, pero o ventre dos malvados sofre escasez.