¹ ”Esta é a lei da ofrenda pola culpa; é cousa santísima. ² No lugar onde degoledes o holocausto degolaredes a ofrenda pola culpa, e o sacerdote salpicará o seu sangue encol o altar por tódalas súas bandas. ³ Logo ofrecerá dela toda a graxa: a cola gorda, a graxa que cubre as entrañas, ⁴ os dous riles coa graxa que hai sobre eles e sobre os lombos, e tirará o lóbulo do fígado cos riles. ⁵ E o sacerdote queimaraos encol o altar coma ofrenda acesa para Iahveh. É unha ofrenda pola culpa. ⁶ Todo varón de entre os sacerdotes pode comer dela. Comerase nun lugar santo; é cousa santísima. ⁷ ”A ofrenda pola culpa é coma a ofrenda polo pecado, hai unha mesma lei para as dúas; pertenceralle ao sacerdote que fai expiación con ela. ⁸ Tamén ao sacerdote que presente o holocausto de alguén, a pel do holocausto que presentase será ara el. ⁹ Do mesmo xeito, toda ofrenda de cereal que sexa cocida ao forno, e todo o que sexa preparado en cazola ou en tixola, pertencerá ao sacerdote que a presente. ¹⁰ E toda ofrenda de cereal mesturada con aceite, ou seca, pertencerá a tódolos fillos de Aarón, a todos por igual. ¹¹ ”Esta é a lei do sacrificio da ofrenda de paz que será ofrecido a Iahveh: ¹² Se o ofrece en acción de grazas, entón, xunto co sacrificio de acción de grazas, ofrecerá tortas sen formento amasadas con aceite, follados sen formento untados con aceite, e tortas de fariña fina ben mesturada, amasadas con aceite. ¹³ Co sacrificio das súas ofrendas de paz en acción de grazas, presentará a súa ofrenda con tortas de pan levedado. ¹⁴ E diso presentará unha parte de cada ofrenda coma contribución a Iahveh; será para o sacerdote que salpica o sangue das ofrendas de paz. ¹⁵ ”En canto á carne do sacrificio das súas ofrendas de paz en acción de grazas, comerase o día que a ofreza; non deixará ren ata a mañá seguinte. ¹⁶ Pero si o sacrificio da súa ofrenda é por un voto ou unha ofrenda voluntaria, comerase no día que ofreza o sacrificio; e ao día seguinte poderase comer o que quede; ¹⁷ pero o que quede da carne do sacrificio será queimado no lume ao terceiro día. ¹⁸ De xeito que se se come da carne do sacrificio das súas ofrendas de paz no terceiro día, o que a ofreza non será acepto, sen se lle terá en conta. Será cousa ofensiva, e a persoa que coma dela levará a súa propia iniquidade. ¹⁹ ”A carne que toque calquera cousa inmunda non se comerá; queimarase no lume. En canto a outra carne, calquera que estea limpo pode comer dela. ²⁰ Pero a persoa que coma a carne do sacrificio das ofrendas de paz que pertencen a Iahveh, estando inmunda, esa persoa será exterminada de entre o seu pobo. ²¹ E cando alguén toque algunha cousa inmunda, xa sexa inmundicia humana ou un animal inmundo, ou calquera cousa abominable e inmunda e coma da carne do sacrificio da ofrenda de paz que pertenece a Iahveh, esa persoa será exterminada de entre o seu pobo”». ²² Despois Iahveh faloulle a Moisés: ²³ «Dilles aos israelitas: “Non comeredes ningunha graxa de boi, nin de año, nin de cabra. ²⁴ A graxa dun animal morto e a graxa dun animal despezado polas feras poderá servir para calquera uso, pero certamente non debedes comela. ²⁵ Porque calquera que coma a graxa do animal do cal se ofrece unha ofrenda acesa a Iahveh, a persoa que coma será exterminada de entre o seu pobo. ²⁶ E vós non comeredes sangue, nin de ave nin de animal, en ningún lugar no que moredes. ²⁷ Toda persoa que coma calquera clase de sangue, esa persoa será exterminada de entre o seu pobo”». ²⁸ Entón Iahveh faloulle a Moisés: ²⁹ «Dill aos israelitas: “O que ofreza o sacrificio das súas ofrendas de paz a Iahveh, traerá a súa ofrenda do sacrificio das súas ofrendas de paz a Iahveh. ³⁰ As súas propias mans traerán ofrendas acesas a Iahveh. Traerá a graxa co peito, para que o peito sexa presentado coma ofrenda abaneada diante de Iahveh. ³¹ O sacerdote queimará o sebo sobre o altar; pero o peito pertencerá a Aarón e a seus fillos. ³² E vós daredes ao sacerdote a perna dereita coma contribución dos sacrificios das vosas ofrendas de paz. ³³ Aquel que de entre os fillos de Aarón ofreza o sangue das ofrendas de paz e a graxa, recibirá a perna dereita coma a súa porción. ³⁴ Pois Eu tomei dos israelitas, dos sacrificios das súas ofrendas de paz, o peito da ofrenda abaneada e a perna da contribución, e dinos ao sacerdote Aarón e a seus fillos, coma porción para sempre de parte dos israelitas. ³⁵ ”Esta é a porción consagrada a Aarón e a porción consagrada a seus fillos das ofrendas acesas para Iahveh, dende o día no que Moisés os presentou para serviren coma sacerdotes a Iahveh. ³⁶ Iahveh ordenara que se lles dera esa porción de parte dos israelitas o día no que El os unxiu. É a porción deles para sempre, por tódalas súas xeracións”». ³⁷ Esta é a lei do holocausto, da ofrenda de cereal, da ofrenda polo pecado, da ofrenda pola culpa, da ofrenda de consagración e do sacrificio das ofrendas de paz. ³⁸ Iahveh ordenouna a Moisés no monte Sinaí, o día no que El mandou aos israelitas que presentasen as súas ofrendas a Iahveh no deserto de Sinaí.