¹ “Se alguén ofrece a súa ofrenda coma sacrificio das ofrendas de paz, se a ofrece do gando, sexa macho ou femia, ofreceraa sen defecto diante de Iahveh. ² Porá a súa man na cabeza da súa ofrenda e degolaraa na porta do tabernáculo. Entón os sacerdotes aaronitas salpicarán o sangue sobre o altar por tódalas bandas. ³ O que ofrece o sacrificio das ofrendas de paz, presentará unha ofrenda acesa a Iahveh: a graxa que cubre as entrañas e toda a graxa que hai sobre as entrañas, ⁴ os dous riles coa graxa que está enriba deles e sobre os lombos, e o lóbulo do fígado, que tirará cos riles. ⁵ Os fillos de Aarón queimarano no altar, sobre o holocausto que está enriba da leña no lume. É una ofrenda acesa de cheiro grato para Iahveh. ⁶ ”Pero se a súa ofrenda coma sacrificio das ofrendas de paz para Iahveh é do rabaño, sexa macho ou femia, sen defecto ofreceraa. ⁷ Se vai presentar un año coma a súa ofrenda, ofrecerao diante de Iahveh. ⁸ Porá a súa man sobre a cabeza da súa ofrenda e degolaraa diante da tenda de reunión. Entón os fillos de Aarón salpicarán o seu sangue sobre o altar por tódalas bandas. ⁹ Do sacrificio das ofrendas de paz, traerá una ofrenda acesa a Iahveh: a graxa, a cola enteira, que cortará cerca do espiñazo, a graxa que cubre as entrañas e toda a graxa que hai sobre as entrañas, ¹⁰ os dous riles coa graxa que está sobre eles e sobre os lombos, e o lóbulo do fígado, que tirará cos riles. ¹¹ Entón o sacerdote queimarao sobre o altar coma alimento. É unha ofrenda acesa para Iahveh. ¹² ”Se a súa ofrenda é unha cabra, ofreceraa diante de Iahveh. ¹³ Porá a súa man sobre a súa cabeza e degolaraa diante da tenda de reunión. Entón os fillos de Aarón salpicarán o seu sangue sobre o altar por tódalas bandas. ¹⁴ Despois presentará dela a súa ofrenda coma ofrenda acesa para Iahveh: a graxa que cubre as entrañas e toda a graxa que hai sobre as entrañas. ¹⁵ os dous riles coa graxa que está sobre eles e sobre os lombos, e o lóbulo do fígado, que tirará cos riles. ¹⁶ Entón o sacerdote queimaraos sobre o altar coma alimento. É una ofrenda acesa coma cheiro grato. Toda a graxa é de Iahveh. ¹⁷ Estatuto perpetuo será por tódalas vosas xeracións, onde queira que vós habitedes: non comeredes graxa nin sangue ningún””.