¹ Tocade trompeta en Sión! Que sone alarma no meu santo monte. Treman todos os habitantes da terra, porque vén o día de Iahveh, porque está preto, ² día de tebras e penumbra, día nubrado e de densa escuridade. Como a negrura que se estende sobre os montes, esténdese un pobo grande e poderoso. Nunca houbo nada igual, nin o haberá máis adiante por anos de moitas xeracións. ³ Diante del consome o lume, e detrás del abrasa a lapa. Coma o horto do Edén é a terra diante del; e detrás del, un deserto desolado, e del nada escapa. ⁴ O seu parecer é coma o dos corceis, de xinetes que galopan. ⁵ O seu estrondo, coma carros que saltan sobre os cumes dos montes, co crepitar da lapa do lume que consome a herba seca, coma pobo poderoso preparado para a batalla. ⁶ Diante del tremerán os pobos e palidecerán todos os rostros. ⁷ Corren como valentes, coma homes de guerra escalan a muralla; cada un irá polo seu camiño, e non se desviarán das súas sendas. ⁸ Non se estorban un ao outro, cada un irá polo seu camiño; e cando irrompen polas defensas, non rompen as filas. ⁹ Asaltan a cidade, escalan a muralla, soben ás casas, entran polas fiestras coma ladróns. ¹⁰ A terra treme ante eles, e estremécense os ceos, o sol e a lúa escurécense, e as estrelas retiran o seu brillo. ¹¹ Iahveh fará escoitar a súa voz diante do seu exército, porque o seu campamento é inmenso, poderoso é o que executa a súa palabra. Grande e temible é en verdade o día de Iahveh! Quen poderá soportalo? ¹² Mais agora- declara Iahveh- volvede a min de todo corazón, con xaxún, choros e lamentos. ¹³ Rachade o voso corazón e non as vosas roupas! Volvede agora a Iahveh o voso Deus, porque é compasivo e clemente, lento para a ira, abundante en misericordia, e está a carón dos que sofren a desgraza. ¹⁴ Quen sabe se volverá e terá misericordia, e deixará tras si bendición, e ofrenda de cereal e libación para Iahveh o voso Deus. ¹⁵ Tocade trompeta en Sión e promulgade xaxún! Convocade asemblea, ¹⁶ reunide o pobo, santificade a asemblea, reunide os anciáns, reunide os pequenos e os nenos de peito.

Saia o noivo do seu dormitorio e a noiva do seu cuarto.

¹⁷ Choren os sacerdotes entre o atrio e o altar! E digan os ministros de Iahveh : Perdoa, Iahveh, o teu pobo, e non entregues a túa herdade á vergoña, á burla entre as nacións. Por que han dicir entre os pobos: onde está o seu Deus? ¹⁸ Entón Iahveh encherase de celo pola súa terra, e terá misericordia do seu pobo. ¹⁹ Iahveh respondeu ao seu pobo: velaquí, vouvos enviar gran, mosto e aceite, e satisfareivos con iso, e nunca máis vos hei entregar a deshonra entre as nacións. ²⁰ Afastarei de vós o exército do norte e botareino a unha terra seca e desolada, a súa vangarda cara o mar oriental, e a súa retagarda cara o mar occidental. E o seu fedor subirá e aumentará a súa peste porque fixo cousas terribles. ²¹ Terra! Gózate e alégrate e non temas! Porque Iahveh fará grandes cousas. ²² Non temades, bestas do campo, porque os pastos do deserto reverdecerán, porque a árbore dará o seu froito, a figueira e a vide producirán en abundancia. ²³ Fillos de Sión, gozade e alegrádevos en Iahveh o voso Deus, porque deuvos a chuvia temperá para a vosa vindicación, e fixo descender para vós a chuvia, a chuvia de cedo e de tarde coma antano. ²⁴ E hanse encher as eiras de gran, e as vasillas desbordarán de mosto e de aceite virxe. ²⁵ Entón heivos restituír polos anos que comeu a lagosta, o pulgón, o saltón e a eiruga, o meu grande exército, que enviei contra vós. ²⁶ Teredes moito que comer e saciarédesvos, e loaredes o nome de Iahveh o voso Deus, que obrou marabillosamente con vós; e nunca xamais será avergoñado o meu pobo. ²⁷ E saberedes que no medio de Israel estou Eu, e que Eu son Iahveh o voso Deus e non hai outro; nunca xamais será avergoñado o meu pobo. ²⁸ E acontecerá que despois disto, derramarei o meu Espírito sobre toda carne; e os vosos fillos e as vosas fillas profetizarán, os vosos anciáns soñarán soños, os vosos mozos terán visións. ²⁹ E aínda sobre os criados e criadas derramarei o me Espírito naqueles días. ³⁰ E farei marabillas no ceo e na terra: sangue, lume e columnas de fume. ³¹ O sol converterase en tebras, e a lúa en sangue, antes de que chegue o día de Iahveh, grande e terrible. ³² E acontecerá que todo aquel que invoque o nome de Iahveh será salvo, porque no monte de Sión e en Xerusalem haberá salvación como dixo Iahveh, e entre os sobreviventes estarán os que Iahveh chame.