¹ Por tanto ti, fillo de home, profetiza contra Gog, e di: así di Iahveh o Señor: Velaí, Eu estou contra ti, Gog, príncipe soberano de Mesec e Tubal. ² Heite rodear, e conducireite, e fareite subir da parte do norte, e traereite sobre os montes de Israel; ³ E sacarei o teu arco da túa man esquerda, e farei que caian as túas frechas da túa man dereita. ⁴ Sobre os montes de Israel caerás ti e tódalas túas tropas e os pobos que están contigo. Dareite por alimento a toda clase de ave rapaz e ás feras do campo. ⁵ Sobre o chan do campo caerás; porque Eu o anunciei, di Iahveh o Señor. ⁶ E mandarei lume sobre Magog e sobre os que viven seguros nas costas; e coñecerán que Eu son Iahveh. ⁷ E farei coñecer o meu nome santo no medio do meu pobo Israel; e nunca máis deixarei que sexa profanado o meu nome santo; e as nacións saberán que Eu son Iahveh, o Santo de Israel. ⁸ Velaí que vén e hase cumplir, di Iahveh o Señor! Este é o día do que Eu falei! ⁹ Entón os habitantes das cidades de Israel sairán, e prenderán lume e queimarán armas, escudos, paveses, arcos e frechas, mazas e lanzas; e queimaranos con lume por sete anos. ¹⁰ Non traerán madeira do campo nin cortarán dos bosques, senón que queimarán coas armas no lume, e despoxarán aos saqueadores e saquearán aos que lles roubaron, di Iahveh o Señor. ¹¹ E acontecerá naquel día que lle hei dar a Gog un lugar para sepultura alí en Israel, o val dos que pasan cara o oriente do mar; e estará pechado o camiño para os que pasan; e alí sepultarán a Gog e a toda a súa multitude; e chamarano val de Hamón- Gog. ¹² E a casa de Israel sepultaraos por sete meses para limpar a terra. ¹³ Todo o pobo da terra sepultaraos, e isto será para eles un día celebre no día en que Eu sexa glorificado, di Iahveh o Señor. ¹⁴ E tomarán homes por xornada para que percorran o país cos que viaxan para sepultar aos que queden sobre a superficie da terra, a fin de limpala. Ao cabo de sete meses farán o recoñecemento. ¹⁵ E ao pasaren polo país, o que vexa os ósos dun home, porá un sinal xunto a el, ata que os sepultureiros o sepulten no val de Hamón- Gog. ¹⁶ E o nome da cidade será Hamona; e así purificarán a terra. ¹⁷ E ti, fillo de home, así di Iahveh o Señor: "Di ás aves de toda clase e a tódalas bestas do campo: Xuntádevos e vinde! Xuntádevos de todas partes para a miña festa que estou a preparar para vós! Un gran sacrificio sobre os montes de Israel, para que comades carne e bebades sangue! ¹⁸ Comeredes a carne dos poderosos, e beberedes o sangue dos príncipes da terra: dos carneiros, dos años, de castróns, dos bois e dos touros, todos eles engordados en Basán. ¹⁹ Comeredes graxa ata fartarvos, e beberedes ata embebedarvos co sangue das víctimas que sacrifiquei para vós. ²⁰ E fartarédesvos na miña mesa de cabalos e de xinetes poderosos, e de todos os homes de guerra, di Iahveh o Señor. ²¹ E porei a miña gloria entre as nacións; e tódalas nacións verán o meu xuízo que executei, e a miña man que puxen sobre eles. ²² E daquel día en diante a casa de Israel saberá que Eu son Iahveh o seu Deus. ²³ E as nacións saberán que a casa de Israel foi exiliada por mor da súa transgresión, porque eles se rebelaron contra min, e Eu agochei a miña faciana deles e entregueinos na man dos seus inimigos, e todos caeron á espada. ²⁴ Segundo a súa impureza e conforme as súas transgresións fixen con eles, e agochei o meu rostro deles. ²⁵ Por tanto, así di Iahveh o Señor: "Agora farei volver a catividade de Xacob, e terei misericordía de toda a casa de Israel, e serei celoso do meu santo nome”. ²⁶ E eles sentirán vergonza de toda a súa rebeldía coa que prevaricaron contra min, cando vivan na súa terra con seguridade, e non haxa quen os asuste, ²⁷ cando os teña sacado de entre os pobos e os recolla da terra dos seus inimigos, e sexa santificado neles diante de moitas nacións. ²⁸ E coñecerán que Eu son Iahveh o seu Deus, cando despois de telos levado cativos entre as nacións, os recolla na súa terra, sen deixar ningún deles. ²⁹ E non esconderei máis o meu rostro deles, porque derramarei do meu Espírito sobre a casa de Israel, di Iahveh o Señor.