¹ A man de Iahveh veu sobre min, e levoume Iahveh no Espírito e púxome no medio do val, que estaba cheo de ósos. ² E fíxome pasar arredor deles por todas partes; e velaí, había moitos deles sobre a superficie do campo, e estaban moi secos. ³ E díxome: -Fillo de home, poderán vivir estes ósos? E dixen: - Oi Señor Iahveh, ti sábelo. ⁴ E díxome: -Profetiza sobre estes ósos, e dilles: ósos secos, escoitade a palabra de Iahveh! ⁵ Así di Iahveh aos ósos: Velaí, Eu farei entrar espírito en vós, e viviredes. ⁶ E porei tendóns sobre vós, e farei subir sobre vós a carne, e cubrireivos con pel, e porei en vós o espírito, e viviredes; e saberedes que Eu son Iahveh. ⁷ Profeticei, pois, como se me mandou; e houbo un ruído mentres profetizaba, e depois un tremor, e os ósos xuntáronse cada óso co seu óso. ⁸ E mirei, e velaí, había tendóns sobre eles, e subiu a carne, e a pel cubriunos por riba deles; pero non había espírito neles. ⁹ E díxome: -Profetiza ao espírito! Profetiza, fillo de home, e di ao espírito: -Isto di Iahveh o Señor: Ven dende os catro ventos, Espírito, e sopra sobre estes mortos, e vivirán. ¹⁰ E profeticei como El me mandara, e entrou o espírito neles, e viviron e puxéronse en pé; era unha multitude moi grande. ¹¹ E díxome: -Fillo de home, todos estes ósos son a casa de Israel. Velaí, eles din: os nosos ósos secaron, e pereceu a nosa esperanza, estamos completamente perdidos. ¹² Por iso profetiza e dilles: -Así di Iahveh o Señor: Meu pobo! Eu abro os vosos sepulcros, e fágovos subir dos vosos sepulcros, para traervos á terra de Israel! ¹³ E saberedes que Eu son Iahveh cando abra os vosos sepulcros e vos saque das vosas sepulturas, oi, meu pobo. ¹⁴ E porei o meu Espírito en vós, e viviredes; e fareivos descansar na vosa terra; e saberedes que Eu, Iahveh, todo o que digo heino cumprir, di Iahveh. ¹⁵ Veu a min a palabra de Iahveh, dicindo: ¹⁶ Fillo de home, toma agora un caxato e escribe nel: Para Xudá e para os fillos de Israel, os seus compañeiros. Toma tamén outro caxato e escribe nel: Para Xosé, o caxato de Efraín e para toda a casa de Israel, os seus compañeiros. ¹⁷ Xúntaos logo un ao outro para que sexan un só, para que estean xunguidos na túa man. ¹⁸ E acontecerá que cando os fillos do teu pobo che pregunten, dicindo: non nos ensinarás que te propós con iso? ¹⁹ Dilles: así di Iahveh o Señor: "Velaquí, Eu tomarei a cana de Xosé que está na man de Efraín, e ás tribos de Israel, os seus compañeiros, e poreinas xunto coa cana de Xudá, e fareinas un só caxato, e serán un na miña man. ²⁰ E os caxatos sobre os que escribas estarán na túa man diante dos seus ollos. ²¹ E diraslles: Así di Iahveh o Señor: "Velaquí, Eu tomarei os fillos de Israel de entre as nacións onde foron, e reunireinos de tódalas partes, e traereinos á súa terra. ²² E farei deles unha soa nación na terra, nos montes de Israel, e un rei será rei de todos eles; e nunca máis serán dúas nacións, nin nunca máis serán divididos en dous reinos. ²³ E non se contaminarán máis cos seus ídolos, coas súas abominacións e con tódalas súas rebelións; e salvareinos de tódalas súas rebelións coas que pecaron, e purificareinos; e eles serán o meu pobo, e Eu serei o seu Deus. ²⁴ O meu servo David será rei sobre eles, e todos eles terán un só pastor; e andarán nos meus preceptos e gardarán os meus estatutos, e poranos en práctica. ²⁵ E habitarán na terra que dei ao meu servo Xacob, na que viviron os vosos pais; e habitarán nela eles e os seus fillos e os fillos dos seus fillos para sempre; e o meu servo David será o seu príncipe para sempre. ²⁶ E farei con eles un pacto de paz. Será con eles un pacto eterno; e establecereinos e multiplicareinos, e porei o meu santuario no medio deles para sempre. ²⁷ O meu tabernáculo estará no medio deles, e Eu serei o seu Deus, e eles serán o meu pobo. ²⁸ E as nacións coñecerán que Eu, Iahveh, son o que santifica a Israel, cando o meu santuario estea no medio deles para sempre.