¹ Veu a min a palabra de Iahveh, dicindo: ² E vós, que vos parece, que andades repetindo ese dito na terra de Israel: "os pais comeron as uvas amargas, e os fillos teñen denteira"? ³ Como Eu vivo, di Iahveh o Señor, que xa non teredes que repetir máis este refrán en Israel. ⁴ Velaí, tódalas almas son miñas; como a alma do pai, así a alma do fillo é miña; a alma que peque, esa morrerá. ⁵ E a persoa que é xusta, que practica a xustiza e o dereito, ⁶ que non come nos montes, nin levanta os seus ollos aos ídolos da casa de Israel, nin profana á muller do seu próximo, nin se achegua á muller na menstruación, ⁷ que non oprime a ninguén, e devolve ao debedor a prenda empeñada, e non rouba, e dá do seu pan ao famento e cobre o espido coa súa roupa, ⁸ que non presta con usura nin cobra os intereses, que retira a súa man da maldade e xulgua con xustiza entre as persoas, ⁹ e camiña nos meus estatutos e garda os meus decretos para cumplilos con rectitude; ese é xusto e vivirá, di Iahveh o Señor. ¹⁰ Pero se enxendra un fillo criminal e asasino, ou que faga algunha destas cousas, ¹¹ e que non faga as outras, senón que coma sobre os montes, ou profane á muller do seu próximo, ¹² oprima o pobre e o mendigo, roube, non devolva a prenda de fianza, ou levante os ollos aos ídolos e faga abominación, ¹³ preste a intereses e sexa usureiro; vivirá? Non vivirá. Fixo todas estas abominacións e de certo morrerá; o seu sangue será sobre el. ¹⁴ Pero se el enxendra un fillo que ve todos os pecados que o seu pai fixo, e véndoos, non fai conforme a eles, ¹⁵ non come sobre os montes, nin levanta os seus ollos aos ídolos da casa de Israel; nin violenta a muller do seu próximo, ¹⁶ nin oprime a ninguén, nin retén a prenda da fianza, nin rouba, senón que comparte o seu pan co famento e viste co seu vestido o espido; ¹⁷ que afasta a súa man do pobre, e non recibe intereses nin usura; garda os meus decretos e anda nas miñas ordenanzas; ese non morrerá pola iniquidade do seu pai; de certo vivirá. ¹⁸ En canto ao seu pai, porque maltratou a seu irmán, despoxouno con violencia e fixo no medio do seu pobo o que non é bo, velaquí, el morrerá pola súa maldade. ¹⁹ E se dicides: por que o fillo non levará o pecado do pai? Porque o fillo fixo viviu segundo o dereito maila xustiza, e gardou todos os meus estatutos e os cumpriu, e de certo vivirá. ²⁰ A alma que peque, esa morrerá. O fillo non levará o pecado do pai, nin o pai levará o pecado do fillo. A xustiza do xusto estará sobre el, e a impiedade do impío caerá sobre el. ²¹ Pero se o impío se volve de todos os seus pecados que cometeu, e garda todos os meus estatutos e vive de acordo o dereito maila xustiza, de certo vivirá; non morrerá. ²² Ningunha das transgresións que cometeu se lle lembrarán; pola súa xustiza que fixo vivirá. ²³ Desexo Eu a morte do impío? - di Iahveh o Señor. Non vivirá, se se afasta dos seus camiños? ²⁴ Pero se o xusto se afasta da súa xustiza e comete pecado e fai conforme a tódalas abominacións que fixo o impío, Ha vivir? Ningunha das xustizas que fixo serán lembradas; pola rebelión que cometeu e polo pecado que fixo, por iso morrerá. ²⁵ E se dicides: o camiño do Señor non é xusto! Escoitade agora, casa de Israel: non é recto o meu camiño? Non son tortos os vosos camiños? ²⁶ Se o xusto se afasta da súa xustiza e fai iniquidade, morrerá por iso; pola iniquidade que fixo, morrerá. ²⁷ Pero se o impío se afasta da súa impiedade que fixo, e fai conforme o xuízo e a xustiza, fará que a súa alma viva. ²⁸ Porque reflexionou e afastouse de tódalas súas transgresións que fixo; por iso, de certo vivirá. Non morrerá. ²⁹ Pero se a casa de Israel di: o camiño do Señor non é recto. Escoitade casa de Israel, non son rectos os meus camiños? En verdade, os vosos camiños son os tortos. ³⁰ Por tanto Eu xulgarei a cada un polos seus camiños, casa de Israel, di Iahveh o Señor. Volvede e afastádevos de tódalas vosas transgresións, e a iniquidade non será para vós causa de ruína! ³¹ Botade lonxe de vós todas as vosas transgresións coas que pecastes, e facédevos un corazón novo e un espírito novo. Por que haberedes morrer, casa de Israel? ³² Porque Eu non quero a morte do que morre, di Iahveh o Señor; por tanto, volvédevos e viviredes!