¹ Agora, estes son os mandamentos, os estatutos e os decretos que Iahveh, voso Deus, mandou que vos ensinara para que os cumprades na terra que ides posuír, ² para que temas a Iahveh, teu Deus, gardando todos os seus estatutos e os seus mandamentos que Eu che ordeno a ti, e os teus fillos e os teus netos, todos os días da túa vida, para que os teus días sexan prolongados. ³ Escoita, agora, Ó Israel, ten coidado de facelo para que che vaia ben e te multipliques moito na terra na que mana leite e mel, tal e como Iahevh, o Deus dos teus pais, che prometeu. ⁴ Escoita, Ó Israel, Iahevh noso Deus, Iahevh, é un. ⁵ Amarás a Iahevh o teu Deus con todo o teu corazón, con toda a túa alma e con toda a túa forza. ⁶ Estas palabras que eu che mando hoxe, estarán sobre o teu corazón. ⁷ Inculcarásllelas a teus fillos e falarás delas cando sentes na túa casa e cando andes polo camiño, cando te deites e cado te ergas. ⁸ Ataralas coma un sinal na túa man e serán por distintivos entre os teus ollos. ⁹ Escribiralas nos postes da túa casa e nas túas portas. ¹⁰ Cando Iahevh o teu Deus te traia á terra que xurou a teus pais Abraham, Isaac e Xacob, que che daría, con grandes e expléndidas cidades que ti non construíches, ¹¹ e con casas cheas de bens que ti non enchiches e con pozos escavados que ti non escavaches, viñas e oliveiras que ti non plantaches, para que comas e te fartes, ¹² mira ben de non te esqueceres de Iahveh que te sacou da terra de Exipto, da casa de escravitude. ¹³ Temerás a Iahveh teu Deus e a El adorarás e só xurarás polo seu nome. ¹⁴ Non irás tras doutros deuses, de ningún dos deuses dos pobos que vos rodean, ¹⁵ porque Iahveh o teu Deus, que está en medio de ti, é Deus Celoso, non sexa que se encenda a ira de Iahveh o teu Deus na túa contra e El te borre de sobre a superficie da terra. ¹⁶ Non tentaredes a Iahveh o voso Deus coma fixestes en Masah. ¹⁷ Gardade dilixentemente os mandamentos de Iahevh o voso Deus, e as súas testemuñas e os seus estatutos que che mandou. ¹⁸ Farás o que é xusto e bon aos ollos de Iahveh, para que che vaia ben, e para que entres e tomes posesión da boa terra que Iahveh xurou que daría a teus pais, ¹⁹ botando de diante de ti aos teus enimigos, coma dixera Iahveh. ²⁰ Cando no futuro o teu fillo che pregunte: Que son as testemuñas, os estatutos e os decretos que Iahveh o noso Deus vos mandou? ²¹ Entón ti responderaslle: Nós eramos escravos de Faraón en Exipto e Iahveh sacounos de Exipto con man forte. ²² Ademais, Iahveh fixo grandes e temibles sinais e marabillas diante dos nosos ollos contra Exipto, contra Faraón e contra a súa casa, ²³ e sacounos de alí para traernos e darnos a terra que El xurara que lle daría a nosos pais. ²⁴ Así que Iahveh mandounos que gardásemos todos estes estatutos, e que temamos sempre a Iahveh o noso Deus para que nos vaia ben e para preservarnos a vida como ata hoxe. ²⁵ E seranos contado como xustiza se gardamos todos estes mandamentos diante de Iahveh o noso Deus, tal e como El nos mandou.