¹ Entón tódalas tribos de Israel foron xunto a David en Hebrón, dicindo: -Velaquí, nós somos parte dos teus ósos e da túa carne! ² Aínda antes, cando Saúl era rei sobre nós, ti eras o que guiaba a Israel nas súas saídas e entradas, e Iahveh díxote: ti pastorearás o meu pobo Israel, e ti serás príncipe sobre Israel. ³ Entón todos os anciáns de Israel viñeron ao rei en Hebrón, e o rei David fixo un pacto con eles en Hebrón diante de Iahveh; e unxiron a David como rei sobre Israel. ⁴ David tiña trinta anos cando chegou a ser rei, e reinou por corenta anos. ⁵ Reinou en Hebrón sobre Xudá sete anos e seis meses; e en Xerusalém reinou trinta e tres anos sobre todo Israel e Xudá. ⁶ E o rei e os seus homes marcharon a Xerusalém contra os iebuseos, habitantes daquela terra, que lle dixeran a David: -Non entrarás aquí; mesmo os cegos e os coxos serán quen de te rexeitar berrando: David non pode entrar aquí! ⁷ Con todo, David tomou a fortaleza de Sión, é dicir, a cidade de David. ⁸ E dixo David ese día: -Quen queira ferir os iebuseos, que suba polo túnel da auga e chegue aos coxos e aos cegos, aos que a alma de David aborrece. Por iso se di: "Nin os cegos nin os coxos entrarán na casa." ⁹ E David viviu na fortaleza e chamouna Cidade de David. E edificou David o muro arredor dende o Milo cara adentro. ¹⁰ E David seguía engrandecéndose, porque Iahveh, Deus dos exércitos, estaba con el. ¹¹ E Hiram, rei de Tiro, mandou mensaxeiros a David, con madeira de cedro, e carpinteiros e canteiros, e eles construíron unha casa para David. ¹² E David entendeu que Iahveh o confirmara como rei sobre Israel, e que exaltara o seu reino por amor ao seu pobo Israel. ¹³ Despois de vir de Hebrón, David tomou máis concubinas e mulleres en Xerusalém, e nacéronlle a David máis fillos e fillas. ¹⁴ E estes son os nomes dos que lle naceron en Xerusalém: Samua, Sobab, Natán, Salomón, ¹⁵ Ibhar, Elisúa, Nefeg, Iafía, ¹⁶ Elisama, Eliada, e Elifelet. ¹⁷ Cando os filisteos escoitaron que David fora unxido rei sobre Israel, todos os filisteos subiron a buscar a David. E cando David o soubo, baixou á fortaleza. ¹⁸ Entón chegaron os filisteos e desplegáronse polo val de Refaím. ¹⁹ David consultou entón a Iahveh, dicindo: -Subirei contra os filisteos? Entregaralos na miña man? E Iahveh dixo a David: -Sube, e certamente entregarei os filisteos na túa man. ²⁰ Entón David foi a Baal-Perazim e alí venceunos, e dixo: - Iahveh creou unha brecha entre os meus inimigos diante de min, como unha corrente impetuosa! Por iso chamouse a aquel lugar Baal-Perazim. ²¹ E eles abandonaron alí os seus ídolos, e David e os seus homes leváronos. ²² Despois os filisteos subiron outra vez e desplegáronse no val de Refaím. ²³ Entón David consultou a Iahveh, e El dixolle: -Non subas directamente; virás por detrás deles e sairás a eles en fronte das moreiras. ²⁴ E acontecerá que cando escoites o son de marcha nas copas das moreiras actuarás axiña; porque entón Iahveh sairá diante de ti para derrotar o exército dos filisteos. ²⁵ E David fixo así, como Iahveh lle mandara, e derrotou os filisteos dende Geba ata Gezer.