¹ Esta é a terceira vez que vou onda vós: todo asunto decidirase polos testemuños de dúas ou tres persoas. ² Díxenvos, cando estaba convosco a segunda vez, e repítovolo agora aínda que estou ausente, que con aqueles que pecaron e con todos os demais, non vou ser indulxente. ³ Xa que andades procurando unha proba de que o Mesías fala por min, El non é feble convosco, senón que é poderoso entre vós. ⁴ Porque foi crucificado en debilidade, pero vive polo poder de Deus. Nós tamén somos febles nel, pero viviremos con el polo poder de Deus para convosco. ⁵ Examinádevos a vós mesmos se estades na fe; porbádevos. Ou non vos decatades que Cristo Xesús está en vós? Se non é así, é que estades desaprobados! ⁶ Pero agardo que recoñezades que nós non estamos desaprobados. ⁷ E oramos a Deus para que vós non fagades nada malo, non para que nós sexamos aprobados, senón para que vós fagades o ben, aínda que nós semellemos ser desaprobados. ⁸ Porque nada podemos facer contra a verdade, senón a favor da verdade. ⁹ Por iso alegrámonos de sermos febles e vós fortes, porque o que pedimos é: a vosa perfección. ¹⁰ Polo tanto escríbovos estando ausente, para non ser demasiado severo cando estea convosco, segundo a autoridade que o Señor me deu para construír, e non para derrubar. ¹¹ Polo demais, irmáns, alegrádevos, procurade a vosa perfección, consoládevos, tede un mesmo sentir, vivide en paz e o Deus de amor e paz estará convosco. ¹² Saudádevos uns aos outros cun bico santo. ¹³ Mándanvos saúdos tódolos santos. ¹⁴ A graza do Señor Xesús Cristo, o amor de Deus, e a participación do Espírito Santo sexan con todos vós.