¹ Hiram, rei de Tiro, mandou mensaxeiros a David, con madeira de cedro, e canteiros e carpinteiros, para edificarlle unha casa. ² E David entendeu que Iahveh o confirmara como rei sobre Israel, e que o seu reino fora grandemente exaltado por mor do seu pobo Israel. ³ David tomou máis mulleres en Xerusalém, e enxendrou máis fillos e fillas. ⁴ E estes son os nomes dos fillos que lle naceron en Xerusalém: Samúa, Sobab, Natán, Salomón, ⁵ Ibhar, Elisúa, Elpelet, ⁶ Noga, Nefeg, Iafia, ⁷ Elisama, Beeliada e Elifelet. ⁸ Cando os filisteos escoitaron que David fora unxido rei sobre todo Israel, todos os filisteos subiron a buscar a David. E cando David o soubo, saíu contra eles. ⁹ Entón os filisteos viñeron e fixeron unha incursión no val de Refaím. ¹⁰ E David consultou a Deus, dicindo: -Subirei contra os filisteos? Entregaralos na miña man? E Iahveh respondeu: -Sube, e Eu entregareinos na túa man. ¹¹ Subiron, pois, a Baal-Perazim, e David venceunos alí. E dixo David: -Deus abriu brecha entre os meus inimigos pola miña man, como unha impetuosa corrente de augas! Por iso chamouse a aquel lugar Baal-Perazim. ¹² Eles deixaran abandonados alí os seus deuses, e David mandou que os queimaran ¹³ Despois os filisteos volveron facer unha incursión no val. ¹⁴ David consultou de novo a Deus, e Deus díxolle: -Non subas contra eles; ven por detrás deles e sae a eles fronte as moreiras. ¹⁵ E acontecerá que cando escoites o son de marcha nas copas das moreiras, entón sairás á batalla, porque Deus sairá diante de ti para derrotar o exército dos filisteos. ¹⁶ E David fixo así como Deus lle mandara, e derrotaron o exército dos filisteos dende Gabaón ata Guezer. ¹⁷ E a fama de David estendeuse por tódalas terras; e Iahveh fixo que todas as nacións temeran a David.