¹ Na yiri ane Yohanna unan Shitizinu nanit nmyen wa dak adin bellu nliru ntucu nan nya ntene in Yahudiya a woro, ² "Sunan alapi, bara kipin tigo Kutellẹ nda duru." ³ Bara amere ulele ulenge na iwa bellin ubelen me nnu Ishaya unan liru nin nuu Kutellẹ, a woro, "Liwui umong din yiccu nan nya ntene, 'Kelen libau ncikilari, kelen ulin mine nan-ghe.'" ⁴ Imon kidowo in Yohanna wa di kukpa kuron komiari a likpa na liwa terin kutino me. Imonli me wa di acin ni titong. ⁵ Anan Urushalima, nin Yahudiya a vat nigbiri nkilinu kurawan urdun wa nuzu idọ kitime. ⁶ Awa shintu nani nan nyan nmyen kurawan urdun, a icin bele alapi mine. ⁷ Kube na awa yene liigo na Farisawa nin na Saddukiyawa ucinfak kitime a shintu nani nmyen, a woro nani, "Anung kumat niyii timung, gharin wunung minu atuf ina ni din cum kiti tinana nayi na ti din ciinu? ⁸ Nutunong kumat ko na ku batiina usunuu na lapi. ⁹ Ana iwa kpiliza i woro nan nya mine, 'Tidi nin Ibrahim ucif bit.' Bara ndin belu minu Kutellẹ wasa affya Ibrahim ku nono nin natala alele. ¹⁰ Nene imali ciu gidowo litino naca. Vat kuca kongo na ku mara kumat kucine ba ima kowu kunin iti kunin nanya nla. ¹¹ Meng din shintu minu nmyen i sun alapi mine. Ame ulenge na adin cinu kidun nighe a di nin likara a katini, na meng wang batin in yauna akpatak me ba. Ame ma shintu minuu nin loah Kutelle. ¹² Ku puruk me di nacara me, ama shintulu a nutun alkama nan nya kusheri lan, ama nin ciu alkame nan nya filai. Nani ama nin juju kusheri nin la ule na uma so ubico ba." ¹³ Yisa tunna a fita a da kurawan urdun unuzun in Galili kitin Yohanna ada shintin ghe nmyen. ¹⁴ Ame Yohanna ta usu nworo a nantinghe, a woro, "Meng din piziru fe shintini nmyen, fe uni nna da kiti nigha?" ¹⁵ Yisa kpana a woro ghe, "Yinna nani nene, bara udi gegeme kiti bite tikulo katwa kacine vat." Yohanna yinnin ghe mun. ¹⁶ Kimal nshintin ghe kule, Yisa nuzu nan nyan nmyene mas, na nin molu kubi ba, i punghe kitene kani. A yene Uruhu Kutellẹ utolu kadas nafo kuwullung udak kitime. ¹⁷ Itunna liwui nuzu kitene Kutellẹ liworo, "Ggono nsu kibinai Nighari kane. Ndin lanzu mmang me kang."