¹ kubẹ na iwa maru Yisa ku in Baitalami un Yahudiya nayiri tigoh in Hiridus, amon anitt anan yiru yenju niyini kusari kitene nin Urushalima da ida woro, ² Adin weri ulenge na ina marughe ugoh na Yahudawe? Tina yene fiyini mere kusari kitene unnare ti da tida zazinghe." ³ Na ugoh Hiridus in lanza nani, ayi me nin na nitin Urushalima fita vat. ⁴ Hiridus pitirino a didya na Priest nin na nan ninyerte nanit vat kiti kirum, anin tirino nani, "Nweri ima Kristi ku?" ⁵ I woro ghe nenge, "In Baitalamin Yahudiya, bara imon ile na nyan lirun nuu Kutullẹ na nyertin nari ine, ⁶ 'A fe, ubaitalami, in myin Yahudiya, na fere ubene nan nya na nan bun Yahudiya, nani nan nya fere unan tigo ba nuzukuulenge na ama su libya nanit nig Israila.'" ⁷ Hiridus tunna ayicila anan yiru vat likire a tirino nani in dert kubi kongo na fiyine na nuzu. ⁸ A to nani udu ubaitalahmi, a woro, "Can idi piziru ubeleng gono seng. Asa i se ghe, dan ida belli, bara meng wang nan do in di zazinghe." ⁹ Na i lanza ugowe ku, i kiffo libau i nya, fiyine na ini yene kusari kitene tunna ncin nbun mine fidi duru fiyisina kiti kirum dert kiti kanga na gọnọ diku. ¹⁰ Na iyene fiyinie, isu ayi abo nin liburi libo kang. ¹¹ Itunna ipira nan nya kilare iyene gone nin nene Maryamue. Itumuno izazin ghe. Itunna i puzuno tika mine i nakpaghe imon ile na i ming mun, izinariya, lubban a kwul. ¹² Na ise uwannu nataf kiti Kutellẹ nan nya namorona iwa kpilin kitin Hiridus ba, ifita i yira nlong libau ugang ukpillu kipin mine. ¹³ Na inung nya, Kumalaika Kutellẹ da kitin Yusufu nanya namoro, a woroghe, "Fita uyiru gono kinesse nin nene ucum udu uMasar. Udi so kikane se kubi kongo na mbellin fi uliru bara na Hiridus ma pizuru umolun Ngone." ¹⁴ A tunna nin kitik ka ne afita a yauna gono kinesse nin nene inya mun ucindu umasar. ¹⁵ Awa di so kikane udi duru kubin nkul in Hiridus, ulire nan kulo na Kutelle wa bellin kitin nanan liru nin nuu Kutellẹ, "Unuzun nanyan Masar nna yicila usaun ning ku." ¹⁶ Na Hiridus iyene anitt ayinjing ane nrusuzo ghe, ayi nana ghe kang, ato idi molusu nnono ni lirine vat na niwadi in Baitalahmi, udu ligan nminne vat, ucizunu na kus aba utolu kadas nalenge na idurun ba, nafo kubatino kube na awa lanza Ubeleng nan nyan tinu na nit ajinjin ghe. ¹⁷ Ulirue u ni wa kulo vilengwe na iwa bellin kitin Irimiya unan liru nin nuuKutellẹ. ¹⁸ "I wa lanza liwani nan nyan rama, kuculu nin tiyom a liburi lisirne, Rahilla di kuculu nnono me." ¹⁹ Na Hiridus nku Kumalaika Kutellẹ da kitin Yusufu nanya namoro in masar aworo. ²⁰ "Fita, yauna gono kinesse nin nene, udo nanyan nmin Israila." bara anang pizuru nlai ngono nkuu." ²¹ Yusufue fita, a yauna gone nin nene, ada nanya nmin Israila. ²² Na alanza Arkila usari di tigon yahudiya kudarun ncife, Hiridus, fiu kiffo ghe na ado ba, vat nin woru Kutellẹ nwununghe kutuf nan nya namoro, ana lassina udu nmin ngalili. ²³ Amini ana wa dak ada da so nkan kipin na idin yiccu kinin unazarati, inan kulo uliru na iwa bellin tinu na nan nliru nnu Kutellẹ ima yiccu ghe kunan Nazarat.