¹ Inyerte tisa kuwunun Yisa Kristi, usaun Dauda, usaun Ibrahim. ² Ibrahim wadi uchifin Ishaku, a Ishaku uchifi Yakubu, a Yakubu uchifin Yahuda nin nuanamẹ. ³ Yahuda wadi uchifin Parez nin Zaraha unuzun kumantin Tamar, Parez uchifin Hasruna, Hasruna uchifin Arama. ⁴ Arama wadi uchifin Aminadaba, Aminadaba yita uchifin Nahashuna, Nahashuna yita uchifin Salmanu. ⁵ Salmana yita uchifin Bu'az unuzu kumantin Rahab, Bu'az yita uchifin Ubida unuzu kumantin Ruth, Ubida yita uchifin Jesẹ. ⁶ Jesẹ wadi uchif ngoh Dauda, Dauda mara Solomon ku, unuzun kitin wanin Uriya. ⁷ Solomon wadi uchifin Rehoboam, Rehoboam mara Abija ku, Abija mara Asa ku. ⁸ Asa wadi uchifin Jehoshapat, Jehoshapat yita uchifin Joram, Joram nin yita uchifin Uzaya. ⁹ Uzaya wadi uchifin Jotham, Jotham wadi uchifin Ahaz, Ahaz wadi uchifin Hizikiya. ¹⁰ Hizikiya wadi uchifin Manasa, Manasa wadi uchifin Amon, Amon yita uchifin Josaya. ¹¹ Josaya wadi uchifin Jikoniya nin nuanẹ kubiko na iwa yiru nani udumun UBabila. ¹² Na iwa dak ninghinu uBabilẹe, Jikoniya wadi uchifin Shealtiel, Shealtiel mara Zarubabel ku. ¹³ Zarubabel mara Abiud ku, Abiud mara ilayikum ku, Ilayakum mara Azor ku. ¹⁴ Azor mara Zadok ku, Zadok wadi uchifin Achim, Achim wadi uchifin Eliud. ¹⁵ Eliud wadi uchifin Ileza, Ileza mara Mattana ku, Mattana mara Yakub ku. ¹⁶ Yakub mara Yusufu ku, ulessin Maremu ulenge na awa maru Yisa ku unuzu kitene, ulenge na idin yicighe Kristi. ¹⁷ Vat naji aji uyiru kitin Ibrahim udak kubin Dauda aji likure nin na nassari, uyiru kubin Dauda udu kubi ko na iwa yiru nani udu u Babila aji likure nin na nassari. ¹⁸ Kumanti Yisa Kristi wadi nafo nengenari. Unene Maremu wa yiinnin aba su ilugma nin Yusufu, a na isa su ilugma ba iseghe nin liburin in Fip Kutellẹ. ¹⁹ Ulesse Yusufu wadi unan fiu Kutellẹ, na awa di nin su a nighe ncin nan nya nanit ba. Bara nani awa di nin su asughe likire. ²⁰ Na awa di kpilizu ni leli imone, Kumalaika Kutellẹ da kitime nanya namoro, aworo, Yusufu, uusaun Dauda, na uwa lanza fiu nworu uyiru Maremu ku a so uwanife ba, bara fisudu fo na fidi nanya liburi me unuzu kitin Loon Kutelleari. ²¹ Ama maru gono, uma nighe lisa Yisa, bara amma tuchu anit me nanya nalapi mine." ²² Vat nileli imone wase bara inan kulo imon ile na Kutelle wa belli nnu nanan liru nin nu me, a woro. ²³ "Yenen kubura mati liburi kumaru gono, ima yicu lisame immanuel," ule na uduro, "Kutellẹ ligowe nan ghirik." ²⁴ Yusufu zinto nanyan moro me, anin fita asu imoile na Kumalaika Kutelle bellinghe, ayiraghe aso uwanime. ²⁵ Na awa yinighe gantiwaniba udu kubi kongo na awa maru. A na lisan gone Yisa.