¹ Nene, linuana, sun nlira bara arik, bara ligbulan Cikilari nyaa mas nin zazinu, nofonalidi nin na nun, ² tinan se tinuzu nachara na nan na buri asirne nin na nit ananzan, na vatari dinin kidegen ba. ³ Cikilari di nin kidegen, abatunu minu anin kuru ayenje minu unuzu na charan nnit unanzan. ⁴ Arik yinna nin Cikilari ndellen mine, iba su ili ubun su ni le imon nati kpada minu. ⁵ Nlirari Cikilari durso nibinei mine uchindu usuu Kutelle nin teru kibinei Kristi. ⁶ Nene, tikpada minu, linuna nya lisan Cikilari bite Isa Kristi, ichin vat gonni ulenge na a sosin sa atanda ale na ina seru kitibite. ⁷ Anun yiru iyizyari iba so nofo arik. Natiwa su nofo agballa nya mine ba. ⁸ Tutung na tiwa li imonli mmong sa nlira ba. Nworu nani, nya kataa nin nieu tiwa su kataa kitii nin liyirin, bara tiwa umon mine kutura. ⁹ Na ti dira akara ri ba, bara ti so-oh imon yenu kitimine, anun nan so bara arik. ¹⁰ Kubi na tiwa di nan ghinu, tiwa kpada minu, "Asa umon nari usu kataa, naawa li ba." ¹¹ Tina lanza amon nya mine di nin mon su ba. Na idin sukataa ba ama agballari nrusuzu nanit. ¹² Nene imus nalele tikpada nin nakara nya Cikilari Isa Kristi, nya kutik na isu kataa ili imonli mine. ¹³ Anun, linuana, yenjen iwa chin usu ni mon ichine nya nibinei mine. ¹⁴ Asa umon nari ligbulan bit nyan niyert ilele, yenjen nani na imomon wa munu minu ba nan na nin ba, bara ina lanzan chin. ¹⁵ Na iwa yene gne nofo unan liburi lisirne ba, wunun gne kutuf nofo gwana. ¹⁶ Na Cikilari mmang litime niminu mmang vat nabi nya tibau mine. Cikilari so nan na nun vat. ¹⁷ Ilelere ilip nin, Bulus, nin na chara nin, udursuari vat nya niyert na nna yertin. ¹⁸ Na nshew Cikilari Isa Kristi sonan a nun vat.