¹ Nbelen na biri nin na kus, na ubelen woru i nyertin minu imomon diba. ² Anun atimine yiru chaut lirin Chikilari nofo ukiri nin kitik. ³ Asa iworo, "Mmang nin taup," umolsu ba dak nani. Nnafo uwan nmaru na asa alanza ukonu. Na nnere na iba nyeshu nu ba. ⁴ Anun linuana, na idi nyan nsirt ba bari lo lire wa tuu minu nofo ukiri. ⁵ Bara anun vat nonon nkanangari nin nnonon lirin. Na arik nono kiti kari ba sa nonon sirt. ⁶ Bara nani, na tiwa sun mmoro nofo nigisine ba na ti yenje kiti tikpilza kidung. ⁷ Alenge na idin moro idin su nin kitikari, alenge tutung na idin soh idin su nin kitikari. ⁸ Bara na arik nono liri gnari, na ti kpilza kidung. Na ti shon kuyangi kidegen nin suu, a, kitik, kidegen tuchu uchin dak. ⁹ Na Kutelle na che na bara tinana nayi mere ba, bara usen tuchu nyan Cikilari Yesu Kristi. ¹⁰ Ulenge na aku bara arik, Sa tidin yenju kiti sa ti din moro, ti so ligowe nin ghe. ¹¹ Bara nanitan linuana nofo na ina man su. ¹² Ti din belu minu, linuana, yinnan nin na lenge na ina su kataah nyan mine nin nalenge na itaa minu akara. ¹³ Tikuru tibelin minu minon nani kang nyan suu bara kataah mine. Son mang nya mine. ¹⁴ Ti din ti minu akara, linuana: ale na isosin sa ukpadu wunon nani atuf, ale na nibinei mine kete ita nani akara nibinei, wutun kimal na le na idi gugur, nonkon nibinei. ¹⁵ Yenje umon wa kurtung imon inan zan nin ni nanzang udu kitin mong. Tenzinen nimon ichine udu linuana nin vat. ¹⁶ Suun liburi libo-o kolome liri. ¹⁷ Suun nlira sa ligang. ¹⁸ Nya nimon vat nan ugodo. Bara ulelere usu Kutelle nyan Kristi Yesu bara anun. ¹⁹ Yenje uwa bicho Ufunu. ²⁰ Yenje uwa nari ni dura. ²¹ Dumuna imon vat. Mino ile imon a ichineari. ²² Chino vat nimon inanzan. ²³ Na Kutelle mmang litime akusu fi vat, ulai nin kidowo fe so sa ndinon udak Ncikilari Yesu Kristi. ²⁴ Unan kidegen ame ulenge na adin yichu fi, ulenge na aba su. ²⁵ Linuana, sun nlira bara arik. ²⁶ Lison linuana vat nin lulu na kpan nnuu ulau. ²⁷ Ndin for achara nyan Cikilari nworu ikaranta iyert ilele udu linuana vat. ²⁸ Na nshew Cikilari bite Yesu Kristi so nan ghinu anun.