¹ Vika cho tuka handeka nguetu Avilahama, shukulu'etu kutuala ku nthitu, tuna uana? ² nga Avilahama vamu thambuethele ku vipanga, nga ali naha ha lishangalela, vunoni keti kumesho a Kalunga. ³ Vika mathona ana handeka? "Avilahama ua thselelele muli Kalunga, ngechi va mutandela mukua vuchili. ⁴ Nou muka kupanga, fueto yendi kove ku yitanda ngue vuana, vunoni fueto yovio via na panga. ⁵ Kuli uje ke kupanga, vunoni athselela kuli uje athambuetha mukua mulonga, luthselelo luendi va lu tanda vuchili. ⁶ Mukemo Ndaviti atumbuitha kuvethika kuli muntu uje ya tanda Kalunga muka vuchili ua ku jeneka kulinga vipanga. ⁷ Nguendi "Vana vethika vaje vova nechela ku milonga yavo, na vaje vo va na fuika milonga yavo. Na ⁸ vethika muntu uje Muene ka mutandela mulonga." ⁹ Nkuma kuvethika oku vana ku tumbuila vaka ku lovoka lika, ndi na ku vilima lalo? Mukonda tu kuania nguetu, "Avilahama, kuthselela kuendi vamu tandelelekuo muku pua muka vuchili" ¹⁰ Vamu tandelekuo vati? Te na lovoka laja ndi ali ku vulima? Keti te na lovoka, vunoni te ali ku vulima! ¹¹ Avilahama ua tambuile chimuetho cha kulovoka chikecho chimuetho chavungulu vua ku thselela chije cha kele nacho nthimbu te ali ku vulima. Ngachije yikeye aka pue yishe ya voshe va ka ku thselela vutuhu vali ku vulima navo vuchili va ka va tandela vuo. ¹² Ikeye yishe yakulovoka kuli vaje keti va ka kulovoka lika, vunoni venda lalo mu mianja ya kutshelela ngachije kuli tate yetu Avilahama, kukeko ua kele nakuo nthimbu ali ku vulima. ¹³ Mukonda Avilahama ko va muishikile nambe mbuto yendi, apua suana ya vifuti ha meji a lishiko, vunoni ha vungulu vua thselelele. ¹⁴ Mukonda vaka majui alishiko nambe vakevo va thisuana. Kuthselela nga cha pua cha mavoko-voko, keho litavathano lije nga lia thimangana. ¹⁵ Mukonda majui alishiko aneha vukalu, vunoni kuje kokua kele majui alishiko, kuje vene kokua kele milonga. ¹⁶ Mukonda evi vikevio vina pu via ku thselela ngachije china pu cha mavoko-voko. Kulingila litavathano li kaniame ku mbuto ya Vilahama, keti kuli vaje lika va li munthi lia lishiko, vunoni kuli vaje naua va tuala luthselelo lua Vilahama. Ikeye yishe yetu tuva voshe, ¹⁷ ngue mova na chithono , "Njina ku puitha yishe ya miyati ya yingi." Kumesho auje yo ua thselela, ikeye , Kalunga, uje ue ku hana muono kuva ka kuthsa na kuthana vije kovia kele ko vi kale ko. ¹⁸ Uje vene yo mu tatelela, nevi via ku tatelela via hiko ua thselela ngachije aka kala yishe ya miyati ya yingi ngue kuvije via kuaniene nguavo "kukapua mbuto yove". ¹⁹ Keho kavothsikile muku thselela, ua hakele muvila uendi ukeuo ngue ua ku tsha (yikeye ua kele na chihita cha miaka) na vunchimi via Sala. ²⁰ Vunoni Avilahama muku tala vije via mu tumbuilile Kalunga kakele na liova lia ku thselela. Via mu hanene ndhili muku thselela na ku shangala Kalunga. ²¹ Ua vi tavele vuino via mu tumbuilile Kalunga ua vi puithilemo. ²² Mukemuo vene "vamutandelele vio ku vuchili". ²³ Vunoni mejiu "va a tandelele kuli ikeye" kova a thonenene kuli ikeye lika. ²⁴ Vunoni netu lalo, vaka tu tandela vio netu va ka ku thselela uje ua hinduile Yesu Muene uetu kukuthsa. ²⁵ Uje yo va hanene mukonda lia milonga yetu.