¹ Vamunanana, viyongola via mbunge na vilombelo viange kuli Kalunga via vakevio, vuovoke vuavo. ² Ku vukaleho viange kuli vakevo vana lihana kuli Kalunga, vuno honi keti kutala kumana. ³ Muku jeneka kuvua vuchili vuavo vavenia vua kutunda kuli Kalunga, Kutonda kutumbika via vuchili vuavo vavenia kuvathele kuononoka ku vuchili vua Kalunga. ⁴ Muomu Kilistu ikeye kupuithamo majui alishiko avu chili kuli uoshe amu tava. ⁵ Kuli Mosesa ua thonene kutuala ku vuchili vua kutunda kumashiko: "Muntu ou uekupanga vuchili vua mashiko ue ku kala na muono kutuala mu vuchili". ⁶ Vuno honi vuchili vuje vue ku tunda kuku thselela vuhandeka vino: "keti keti uhandeke mu mbunge yove nguove iya alonda muilu?" (ou aneha Kilistu hanthi); ⁷ keti uhandeke, "Iya ashelela mu china ku chesi na mandanda?" (ou, aneha Kilistu ku vuthsi). ⁸ Vuno honi vika vihandeka ovio? "liji lili muhiehi nove, mukanua koveamba mumbunge yove". Olio likelio liji lia kuthselela, eli tuli na kuambulula. ⁹ Nga ulitava na kanua kove nakulitavela nguavo Yesu yikeye Muene, naku thselela mu mbunge yove nguavo Muene vamu hinduile kuvathsi, ukovoka. ¹⁰ Omuo umo atava na mbunge na kukala na vuchili, na kanua alihana akovoka. ¹¹ Mathona nguao, "Uoshe uje atava muli yendi kaka mu koletha nchuama". ¹² Muomu kuhangula kuahi ha kati kava Yundeya nava Ngelengu. Muomu Kalunga umo lika ikeye vene Kalunga ua voshe, ikeye vu fuko vuoshe kuli vaje voshe va muthana. ¹³ Uoshe akathana lizhina lia Muene akovoka. ¹⁴ Vuno honi vati vaka muthana avo cho kuva mu tavele? Vati vatava muli ikeye uje kuvo vuile? Vakovua vati nga mukua kuambulula uahi? ¹⁵ Vati vaka ambulula, mpano vavatumine? _Ngue omu vathona, "Vati via vuaha mianja yavaje vambulula muzhimbu ua chili!" ¹⁶ Vuno honi kati voshe va thingimika muzhimbu ua chili. Omo Yisaya ahandeka nguendi, "Muene, iya aka tava kuambulula chetu?" ¹⁷ Kuthsela kutunda ku kuvua, kuvua kuliji lia Kilistu. ¹⁸ Vuno honi nguange, "Kuvevuile ndi?" Mukemuo vene. "Kuohia vhavo chayile kuoshe-kuoshe kumavu, na meji avo ayile kualenga mavu." ¹⁹ Ange nolo njihula nguange,"Chili vene va Isaleli kuva zhivukile?" Ha kulivanga Mosesa ua va kumbuluile nguendi, "Ange njika miuvuitha lifuua na vantu vaje kuvethi na muyati. Njika mi ketha na vukalu namu yati uje ku ue kuvu, na kumihana vukalu." ²⁰ Keho Isaya ua thimpile muku handeka nguendi, "vana njiuana vaje kuva chi thselelele nja jombolokele kuli vaje kuva nji huile." ²¹ Vuno honi kuva Isaleli nguendi,"Litangua lia mutuntu njoluele mavoko ange kuvantu vaka lithino nava ka vimpata."