¹ Paulu, ntuama ua Yesu Kilistu, va mu thanene kukala Kapostolu, va mu hangulile muzhimbu ua chili ua Kalunga, ² Uje uve shikile laja ku vapolofeto vendi muma thona aku jela, ³ kutuala hali munendi uje ua kumu yati ua Muene Ndaviti ha nthitu. ⁴ Kuhitila muli Spilitu ua kulela vamu tumbuile na nzhili kupua Muna Kalunga kuhitila ha ku hinduka kuku thsa, Yesu Kilistu Muene uetu. ⁵ Muli ikeye tua uana kavumbi na vupostolu vua kuononoka mu luthselelo ha kati ka miyati yoshe, Omo lia lizhina liendi. ⁶ Hakati ka mishovo eyi, neni lalo vami thana kupua vaka Yesu Kilistu. ⁷ Kuli voshe vali mu Loma va yongola Kalunga keho lalo vava thana kupua vantu va kujela: Kavumbi ka kale neni na chiyulo cha kutunda kuli Kalunga Tata na Muene uetu Yesu Kilistu. ⁸ Hakulivanga, nji shangala Kalunga Tata kuhitila muli Yesu Kilistu kuli yeni muva voshe, mukonda kuthselela kueni vova kuambulula hanthi hoshe. ⁹ Kalunga Tata ikeye mukaleho uange, vonje kupangela mu Sipilitu yange mu muzhimbu ua munendi, muku tuala munje ku mi tumbola nthimbu yoshe. ¹⁰ Nthimbu yoshe nje kui huila mu kulomba kuange linga hamo vi pua mo mu chizango cha Kalunga Tatalinga nji je kuli yeni. ¹¹ Mukonda nje ku thinganieka ku mi mona, linga njimihane ko ma vuana amo a mu Spilitu, linga njimi kolethe. ¹² Hakeho, nange naua nji yongola nji uane nthili mukati keti, kuhitila mu luthselelo luetu, lueni nolu luange. ¹³ Mualolo kunji yongola linga eni mukale kunzhimba, vakuetu, hakeho nthimbu yoshe nje ku yongola kuija kuli yeni (vuno honi kuhita kuahi noho nthimbu yino), linga tua ku uane vushuka muli yeni lalo, ngue muje mu tua lingile ha kati kava ka mafuti. ¹⁴ Ange njimu ka makongo ku Vangelengu na kuvantu va ku vifuti vieka, kuli voshe vaka ku zhangama nava va kaku heva. ¹⁵ Hakeho ngue kuli yange njina li vuahethela kuambulula muzhimbu ua chili kuli yeni neni muli mu Loma. ^{16 17} Mukonda ange kunja kele na ntsuama ya muzhimbu ua chili, mukonda ukeuo nzhili ya Kalunga Tata ya vuovoke vua vaje voshe va kaku thselela, kuli vaYundeya mbangelo amba vaNgelengu. Mukonda muli ukeuo vuchili vua Kalunga vuli leketha tunda luthselelo ya luthselelo, ngue muva na thono, "Muka vuchili ayoya muku thselela" ¹⁸ Vukalu vua Kalunga vuli leketha kutunda kuilu kuli voshe vaka mafuti na vaka kujeneka vuchili vaje muli vakevo kuhitila mu ku jeneka vuchili va shueka vuchili. ¹⁹ Evi mukonda lia vije viva zhivuka kutuala kuli Kalunga va vimona muli vakevo. Mukonda ua va muetha vio. ²⁰ Mukonda lia vifua viendi viamu vushueke, mazhina avio nzhili ya miaka yoshe na vutuntu vuendi, vavi mona vuino vuino, kutundilila kukupanga kua lifuti, vavi nongonuene muli vije vioshe viva panga. Hakeho kuvethi naha haku liamenena. ²¹ Eci mukonda, nambe muvezhivile via kutuala kuli Kalunga, kuva mushangalele ngue Kalunga, indi vamu hane ndangi. Nambe ngoco, avo vakele vaka kuheva mu vithinganieka viavo, na vimbunge viavo via kujeneka kulumbunuka viakele mu muthithi. ²² Va limuethele ngue vaka kuzhangama, vunoni vapuile vaka kuheva. ²³ Va cinjithile vumpahu vua Kalunga uje uaku kalelelaho mukonda lia kulemesa cifua ca muntu uje atha kutundaho, lia tuzhila, lia tuthitu va mikono yiuana, na tuthitu vaku likoka hanthsi. ²⁴ Hakeho Kalunga ua vahanene kumashungu a vimbunge viavo ku mazhilo, kulingila mivila yavo yishauke mukati kavo. ²⁵ Vakevo vavenia va cinjithile vucili vua Kalunga na vishaki, kumo nauje kushangala na kuthselela kutanga munthsimbu ya muka kutanga, uje yova shangala miaka yoshe. Amen. ²⁶ Mukonda lievi, Kalunga ua vahanene ku kuthimpa kuakujeneka kathingimiko, mukonda vampuevo vavo va cinjitha cilemo ca vuntu vua vuntu na cilemo ca vuntu vua vungoco. ²⁷ Mukemo nawa, vamala navo vatha cilemo ca Kalunga na vampuevo vavo na ku uema mumashungu avo a kuli avo vavenia. Ava vakevo vamala vaje vapangele vipanga via shuama na vamala vakuavo na kutambula muli vakevo kashitiko ka kuvafuila kutuala ku mashevu avo. ²⁸ Mukonda kova tavethele kukala na Kalunga mukuizhiva kuavo, ua vahanene ku mana a kuviha, linga vapange vilinge via kujeneka kushungama. ²⁹ Vava shulitha na vishaki vioshe, kuviha, kuliveyela, na kushishua. Vashula cipululu, kuthsiha, vimpata, mashevu, na vithinganieka via kuviha. Vakevo vaka kutuaha, ³⁰ ngoma ya kuthika kuvali, vaka vizhindo via Kalunga, kujeneka kathingimiko, vukalu, ku lihametha, vaka ku neha vingila via kulinga vupi; kuve ku thingimika vithemi vavo. ³¹ Vakevo kulombonoka kuahi, vakola vimbunge, amba naua kovakele nangozhi. ³² Avo vovua mashiko a Kalunga, nguavo vaje valinga viuma ovio vanafuila kuthsa. Vuno honi keti lika muku panga viuma evi lika, va ketavetha vakuavo navo vaka kuvipanga.