¹ Keho honi eni kumuethi naha hamu lihengela, ove muntu, ove muka kuhitha, mukonda viue kuhitha vakueni vie kuku hitha na yove vavenia. Neni vaka kuhitha mue ku panga viuma vimo lika. ² Vuno honi tuvi zhivuka nguetu kuhitha cha Kalunga chakala kutuala muvu chili muche ku uila hali vaje voshe vaka kupanga viuma viacho. ³ Keho lalo valuka vuima evi, ove muntu, ove muka kuhitha vaka kulinga viuma viacho nambe mu ue kuvilinga nove. Mua kuatha kuteua vukalu vua Kalunga? ⁴ Ndi mue ku thinganieka kavundende kutuala ku vufuko vua ngozhi yendi, kashitiko kendi kaje kaku kotokela, na kutatelela chendi? Kumu zhivuka ngueni ngozhi ya Kalunga va yi hakelaho linga yitu tuamenene kuku litavela? ⁵ Mukonda lia ku kaluua cheni na kukola vimbunge cheni ngocho muna lihakela vukalu halitangua lia vukalu, likelio litangua litu ka mona kuhitha cha Kalunga cha vuchili. ⁶ Kalunga akahana fueto ku muntu ku muntu kutuala kuvipanga viendi: ⁷ Kuli vaje voshe vana koletha mu vipanga via chili vana uana vumpahu, kathingimiko na kukola mu luthselelo, vaka va hana muono ua miaka yoshe. ⁸ Mukonda lia vaje voshe ve kulikela vishoti avo vavenia, kuve kuononoka ku vuchili vuno honi ve kuononoka kuma shevu, vukalu na kuniengua kua kama ku keja. ⁹ Kalunga aka hana tuyando na vuthiua vua kama ku miono ya vaje voshe va panga mulonga, kuvangelela kuli kaYundeya, kuka manethela kuli kaNgelengu. ¹⁰ Vuno honi vumpahu, kathingimiko, na chiyulo vi keja kuli vaje voshe vaka kulinga via chili, kuva Yundeya ha kulivanga, amba kuva Ngelengu. ¹¹ Muomu kumuethi kutepetha muli Kalunga. ¹² Muomu va vengi va linga milonga omuo lia ku jeneka mashiko vaka thsa na mashiko ahi, amba lalo va vengi va linga milonga avo nthimbu oyo vana zhivuka mashiko navo naua vaka va hitha na mashiko. ¹³ Muomu keti vaka kuvua mashiko va viukilila ku mesho a Kalunga, vunoni vaje lika vaka kulinga kutuala ku lishiko va kovoka. ¹⁴ Muomu vaka ku jeneka kutava, vaje kuvethi na mashiko, ve kupanga via mashiko kuhitila ha chithemua, vapua mashiko kuli yavo vavenia, nambe muva jeneka kukala na mashiko. ¹⁵ Omuo lievi va leketha nguavo vipanga via thetela mashiko vavi thona mu vimbunge viavo. Mana avo a pua naua vukaleho kuli yavo vavenia, na vithinganieka viavo ku vie ku va vangeya nambe kuvohiela kuli yavo vavenia ¹⁶ na kuli Kalunga. Evi vika pua mo hali tangua lije lia ka hitha Kalunga vioshe viva panga vantu mu vushueke, kuhitila mumuzhimbu uange ua chili, muli Yesu Kilistu. ¹⁷ Vunoni nga uli luka ka Yundeya ove vavenia, naku huimina ha mashiko, amba na uli shangalethele muli Kalunga , ¹⁸ na kuzhivuka chizhango chendi naku tavethela via ku vuikilila vije via chili mukonda vaku tuma vio kuhitila mumashiko, ¹⁹ ambe nga una vitambula nove vavenia kupua ntuama lutue ku tupuputua, cheke kuli voshe vali mumithithi, ²⁰ muka ku tuamenena maheve, mulongishi ua vanike, lalo kulingila ukale na mashiko mu chifua cha mana na vuchili, ambe lalo a vati evi vika nehetha vitanga mu kuovoka kuove? ²¹ Eni vaka ku longetha vakueni, kumue kulilongetha yeni vavenia? ²² Eni vaka kuhandeka ngueni keti mulinge vukuithi, eni mue kuvu linga ndi? Eni vaka kuzhinda miyombo, mue ku puanja tembele ndi? ²³ Eni vaka kuli shangalethela mu mashiko, mue ku shaula Kalunga muku jeneka kuononoka ku mashiko? ²⁴ "Lizhina lia Kalunga vali shaula ha kati kava kujeneka kutava mukonda lieni", ngue omuo vene muva na thono. ²⁵ Muomu kulovoka cha kala na lukulo kuli eni nga muthingimika mashiko, vuno honi nga umu ka ku jomboka mashiko, kulovoka chove che ku pua vulima. ²⁶ Nga, honi, muka kujeneka kulovoka a puithamo vije vioshe via yongola mashiko, ngueni kuatha kuahi kujeneka kulovoka chendi vachi puithe kulovoka? ²⁷ Ambe kuatha kuahi muka kujeneka kulovoka ha chi themua kuhitha muka kulovoka nga ikeye na puithamo mashiko vutuhu kalovokele? Echi mukonda mua kala na mashiko ha mathona na kulovoka, kanda yeni naua vaka kuviana mashiko! ²⁸ Mukonda ikeye keti ka Yundeya ha vuntu vuendi vua laja, nambe kulovoka chije cha laja ndi nguetu ha nthitu. ²⁹ Vuno honi ikeye ua pua kaYundeya muinthi liendi, na kulovoka chendi cha mumbunge, mu Spilitu, keti cha muvihandeka. Kushangala chavo vantu avo kuche ku tunda ku vantu vuno honi chi tunda kuli Kalunga.