¹ Vunoni litangua lia kulivanga lia civike, Liyongola kutuhuka. Vakevo vethile kumbumbo, vanehe vihemba vije viva vuahethele. ² Keho va uanene livue vana liandumuna laja kumbumbo. ³ Va kovelelemo, vunoni muvila ua muene Yesu kuva uuanenemo, ⁴ Keho cakele ngecije, vakele nacitanga omo vije, taleni vamala vavali vanemana hamo navo navithala via kuviakula. ⁵ Keho vakele naliova na kukulumana na vihanga viavo hanthi, vahandekele ku vakentu nguavo, Vika muthetelela mukamuono mukati ka cihilo. ⁶ Kuno uahiko, vunoni na shituka! Vulukeni muje mua kuaniene neni te muli ku Ngalileya, ⁷ nguendi muna muntu vana pande kumuhana kumavoko avantu vaka vuvi vaka muxukike, Keho aka xituke mu litangua lia mu citatu. ⁸ Vaje vakentu va vulukile majui endi ⁹ vatundile ku cihilo va kambuluile viuma vioxe kuli vaje likumi naumo na kuvakuavo voxe. ¹⁰ Vuno vapile Malia Mandalena, Juanah, Malia vayina ya Tiango, na vakuavo vakentu vavo vakele hamo navo va kambuluile viuma evi kuli vaPostolu. ¹¹ Keho majui avo apuile ngo honi vihandeka via mavokovoko kuli vaPostolu, kova muitavele ou mukentu. ¹² Vunoni Petulu ua katukile ua puikilile kumbumbo, keho ua kulumanene nakutala mo mukati, ua muene vintanga viakutoka lika liavio, keho ua ile kundjivo yendi, ua komokele vije via solokele. ¹³ Taleni, litangua olio vene vavali vavo va ile kulimbo limo liakuluka Emau, ntunda yakuheta kuJelusalema visitandia makumi atanu na limo. ¹⁴ Vana kulileka viuma vioxe via sololokele. ¹⁵ keho cakele ngacije mova kele nakulileka na kulikandila vimpata, vavenia Yesu ua xuenene uendele hamo navo. ¹⁶ Vunoni vavindikile mexo avo ngoco kavatavethelele kumunongonona. ¹⁷ Yesu ua handekele navo nguendi, ''Methi aka amukela kuana kulileka omo muli na kuenda?'' Keho vemanene maluholo avo aluvalele. ¹⁸ Umo uavo, ua kuluka Keleopa, ua mukumbuluile nguendi, ''Yove lika ngendhi mu Jelusalemana kuthivuka kuahi viuma evi vinahitimo matangua ano ndi?'' ¹⁹ keho ua kuaniene navo nguendi, ''Viuma vika?'' vamukumbuluile nguavo, ''Via Yesu muka Nazaleta, ikeye ua puile kapolofeto, muka ndhzili kuvipanga naku majui kumexo a Kalunga na kumexo avantu voxe, ²⁰ na vakuluntu vavasasendote na vaka kusika linga va muhithe na kumu thsiha na kumu xukika hacilindakano. ²¹ Vunoni etu tua tatelele nguetu ikeye akakula vaIsaleli. Keho kuvandakana evi vioxe, lelo linapu kulitangua lia mucitatu kutunda haje havia solokele viuma evi. ²² Keho vakentu vamo vakumbunga yetu va tukomokethele, muomu va menekele cimene mene ku mbumbo. ²³ Keho kuva uanene muvila uendi vedthile nguavo vanamono cimona cimo ca tungelo vaje vava lekele ngua ali na muono. ²⁴ Vamo vavaje vakele netu vaile kumbumbo vakauanene muje vene muva vambuluile vakentu. vunoni ikeye kova mumuene.'' ²⁵ Keho ua valekele nguendi, ''Eni mumatha muvaka kulangetha kuthelela vije vioxe viva handekela vaPolofeto! ²⁶ Kavia vuahele Kilistu ayandele viuma evi nakukovela vumpahu vuendi?'' ²⁷ Keho hakuxangumuka na Mosesa navapolofeto voxe, navalanguluilile ku mathona aje aku mutumbula ikeye. ²⁸ Keho vaxuenene kulimbo lije li vaya, keho ikeye ua lingile ngue ayongola ku vatuvakana. ²⁹ Keho vakevo vamuthindiyile nguavo acikale netu, muomu lili nakuxuena litangua liyongola kukovela mualolo keho ua kovelelemo mukukala navo. ³⁰ Keho cakele ngacije, mua tumamene navo kukulia, ua nonene mboloto, ua ilombelele, uaitavuile, keho ua vahanene. ³¹ Keho mexo avo emukile, vamuthivukile, keho ikeye ua vandele kumexo avo. ³² Keho valihandekethele umo ku umo nguavo, ''Katuovuile vo kuvimbunge, muahandekele netu mungila, muatulanguilile vithona?'' ³³ Keho vakatukile ha ola ije vene vahilukile ku Jelusalema. Va uanene vaje likumi naumo vana kunguluka naveka vaje vakele navo, ³⁴ va handekele nguavo, muene cili vene naxituka, na jombolola kuli Simoni. ³⁵ Keho vakevo va thimutuilile vije via mungila, nomu muatavuile mbolo vamu dthivukile. ³⁶ Keho movahandekele viuma evi, ikeye vavenia uemanene hakati kavo, nguendi, ''Ngothi ikaleneni.'' ³⁷ Vunoni vakevo vathsile cinthsima vakele na liova, vathinganiekele ngecije vana muene muthithimbe. ³⁸ Keho uahandekele navo nguendi, ''Vika munomu vimbunge? Vika muvimbunge vieni muakatuka vimpata? ³⁹ Taleni mavoko ange namahindi ange, muomu yange vavena. Ndjikuateni mutale. Muomu muthithimbe kauethi nambunda na vithsiha, ngo honi momu nandjimono ange ndjili navio.'' ⁴⁰ Keho muahandekele ngacije, ua valekethele mavoko endi na mahindi endi. ⁴¹ Keho nthsimbu kanda vathelele mu ndjolela, valikomokelele, uahandekele navo nguendi, ''Muli na viakulia kuno ndi?'' ⁴² Keho vamuhanene mbaluvuila ya inthsiua kuoca na cithila caluki, ⁴³ keho uavitambuile ualile kumexo avo. ⁴⁴ Keho uava lekele nguendi, ''Aa majui ange aje andjamilekele nthsimbu ndjakele neni, ngohoni viuma vioxe va vithona ku majui alixiko a Mosesa na vapolofeto naku Visamo vinapande kupuamo. ⁴⁵ Keho ua xokoluele mana avo, linga vathivuke mathona. ⁴⁶ Ua valekele nguendi, ngacije vene muvavithona, Kilistu akayanda keho aka xituka kukuthsa kulitangua lia mucitatu. ⁴⁷ Ngoco mulithina lie va kambulula kutenguluka na kuecela kua vuvi ku mixovo yoxe, kutamekela ku Jelusalema. ⁴⁸ Eni munapu thimbangi kuviuma evi. ⁴⁹ Taleni, njimitumina livuathano lia tata kulieni. Vunoni tateleleni muimbo noho muka kala na ndhili ya muilu. ⁵⁰ Ngoco Yesu ua vatatualele noho muhiehi na Mbetania. Uoluele mavoko endi ua vavuavuethele. ⁵¹ Keho cakele ngecije nthimbu aci va vuavuetha, ua lihandele navo va mutualele muilu. ⁵² Ngoco va mulemethele va hilukile ku Jelusalema na kujolele muakama. ⁵³ Keho vakele mutembele nthimbu yoxe na kuxangala Kalunga.