¹ Paulu muluua ua Kilistu Yesu kucithango ca Kalunga kutuala ku likumonyo lia muono uje uli muli Kilistu Yesu. ² Kuli Timoteo, munange unjayongola: Kutetela, Ngodthi, na Ciyulo via kutunda kuli Kalunga Tata na Kilistu Yesu muene uetu vikale nove. ³ Njixangala Kalunga, injekupangele kutunda kuvakuluntu vange, na mbunge ya kujela, ngue nthimbu yoxe njeku mivuluka mu malombelo ange, mutana na vuthsiki. ⁴ Omuo nje kuvuluka mixothzi yeni, ngoco njiyongola kumimona, linnga njikaxule na kujolela kua kama. ⁵ Omuo njivuluka kuthselela kuove kua vucili, kuje kuvakele nakuo vanokokulu Loisi na vanoko Yunisi. Njinathselela nguange na muli yove lalo mukuli kuthselela kucho. ⁶ Ngoco njikuvuluitha uvuetheleleko vuana vua kuhanene Kalunga hanja kambekele mavoko ange. ⁷ Mukonda Kalunga katuhanene cithithimbe ca liova, vunoni ca nthili na cilemo na kulipokuetha. ⁸ Ngoco keti uvue nchuama ya vukaleho vua muene uetu, nambe keti ukale na nchuama omo liange, Paulu, nji chindzinda chendi. Vunoni tambulako mutambela ua kayando omuo lia mudthimbu ngue kundthili ya Kalunga. ⁹ Kalunga ikeye ua tuovuele uatuthanene kuthana kua kujela. Ikeye Kalunga ua vilingile evi, keti ngue omo vipanga vietu, vunoni omo lia vutumbe na kutetela viendi vavena. Uatuhanene viuma evi muli kilistu Yesu kunthimbu ya laja kunthenkulu. ¹⁰ Vunoni mualolo kuovola kua Kalunga kunaxolokele ha kuija kua muovole uetu kilistu Yesu. Ikeye na manetha kuthsa naneha muono uje ku uekuhua kucheke kuhitila mumudthimbu. ¹¹ Omuo lievi, vanjihanguile kupua muka kuambulula, kapostolo, na mulongithi kuli vaka vifuti. ¹² Mukemuo vene njili na kuyandela viuma evi. Vunoni kunjethi na nchuama, mukonda njina mudthivuka iya ou injithselela. Njinethiva nguange na ikeye atha kunjinyungila vije viana njikundika noho litangua lije. ¹³ Nyunga cileketho camajui aje au novu kuli yange, na kuthselela na cilemo via muli kilistu Yesu. ¹⁴ Cuma cije cacili cakukundika Kalunga, chinyunge hali sipilitu ua kujela, uje uatumama muli yetu. ¹⁵ Unedthiva nguove, vantu voxe vakala mu Asia vana njitaleketha nima, hakati kavo hali Fingelu na Helemongene. ¹⁶ Kalunga afungile ngodthi njivo ya Onesifolu, mukonda ikeye ue kunji talatala vinthimbu via vingi endi lalo kakele nanchuama ya maketanga ange avana njikutu. ¹⁷ Omo muakele mu Loma, uanji thselelele vuino vuino, mukemuo mua njiuanene. ¹⁸ Muene amufungile ngodthi ya kutunda kuli ikeye ha litangua olio. Unedthziva vuino, kukuathsa cendi muje munjakele ku Efeso.