¹ Ngocho honi, munange, likolethe muku thselelela kuje kuli muli Kilistu Yesu. ² Viuma viunovo kuli yange hakati kavakaleho vavengi, vikundike kuvantu va vuchili vaje vakathsa kulongethako vakuavo lalo. ³ Yanda muakama hamo nange ngue lisualale ua cili ua Kilistu Yesu. ⁴ Lisualale naumo uahi omo achili kuvipanga achilidthenga dthenga naviuma via muono ou, linga avuahethe kumbunge ya uje ua muhaka kuvipanga via vusualale. ⁵ Keho lalo, muka kulitheka muku xatuka, katambula vuana kuvanga axatuke muaya maxiko. ⁶ Na ndimi lalo uje uekufitangana muakama chinapande kutambula ku vimbuto viendi via livanga. ⁷ Yongola haviuma evi vinjili na kukuleka, mukonda muene a kakuhana kuvuithitha mu viuma vioxe. ⁸ Vuluka Yesu Kilistu, ua kuchikota ca Ndaviti, uje uaxitukile kukuthsa. Evi vinapu vinkanda via kuambulula kua mudthimbu uange uschili, ⁹ mu vikevio nji yanda na kunjikuta na maketanga ngue muka kuvihitha. Vunoni lijui lia Kalunga kuva likutule. ¹⁰ Ngoco njikoletha mu vioxe omo lia vaje vava nahangula, linganouo lalo vatumbule kuovoka kua muli Kilistu Yesu hamo a vumpau vuje vua miaka yoxe. ¹¹ Evi vikevio vihandeka via vuchili: "nga tunathsi hamo nendi, tukayoya lalo hamo nendi. ¹² Nga tukolethako, tukaxituka lalo hamo nendi nga tumuviana, nendi lalo aka tuviana. ¹³ Nga kutupu vaka vuchili, ikeye akapua muka vuchili, mukonda kuthsa, kuliviana endi vavena." ¹⁴ Kava vuluithe viuma evi, vanangule kumexo aKalunga linga keti valiluithe na majui; Kuchixilivila, cikeco civihitha lika vaje va tolilila. ¹⁵ Panga choxe linga uxoloke muka vuxunga kumexo a Kalunga, ngamba uje kethi navimo via kumuvuitha ntjuama, muka kupanga vuino mu kulongetha lijui lia vuchili. ¹⁶ Vunoni viana vihandeka viacho, vikevio vituala kukuxaula Kalunga. ¹⁷ Vihandeka viavo vika jamona mgue mbandu ya mukongo. Hakati kavo hakala Himeneu na Filetu. ¹⁸ Vakevo vana tanguka va nayi vana tundu mungila ya vuchili. Nguavo kuxituka ku kuthsa kunahiti laja, vali na kutanganetha kuthselela kua vamo. ¹⁹ Vunoni luvula lua kukola lua Kalunga lua kala laja. Luli na chidthivukitho echi: "Muene athzivuka vaje vanapu vendi" Lalo "Uoxe atumbula lithzina lia muene napande kutunda kuvuhenge." ²⁰ Munjivo vufuko kumuakele lika lalo vintjuua via Olu na Palata. Kuvili lalo vintjuua via viti na vuma. Vimo via kathingimiko, na vimo via kaxahundu. ²¹ Voxe vali jeletha avo vavenya kutunda kukaxaundu, vaka mupuitha ntjuua ya kathingimiko. Ikeye vana mutepeko, vaka mupangetha kuli xokuayina, na kumupangetha ku vipanga vioxe via kuvuaha. ²² Teua maxungu avukuenje. Kavangeya vichili, kuthselela, chilemo, na chiyulo hamo lika na vaje vatambakana kuli muene na vimbunge via kujela. ²³ Vunoni viana vihandeka via vuheve na vihula via ndthimba. Omo unedthiva nguove vikevio vie kuneha vimpata. ²⁴ Ngamba ya muene kapandele kukala navimpata. ²⁵ Ikeye napande kupua muka ngodthi kumexo avoxe, muka vuino mukulongetha, na kukakateya. Ikeye napande kuli konkeka mukulongetha vaje vaka kumuluitha. Linga halumo Kalunga avahana kutnguluka mangana avuchili. ²⁶ Linga vatenguluke kumana va putumuke ku nganjo ya Satana, uje uava kutile linga valinge na kuononoka ku chidthango chendi.