¹ Mbapira dhoyimonekera yaNahumu gho mukaElikoshi, odhi dha ghamba yokuhatena kuNinive. ² FUMU ne Nyambi gho nya no aye ne kuhumbitha; FUMU ne kuhumbitha ndani gha yara noghupata; FUMU ne kuhumbitha hanyathi wendi, no ghupata wendi ne watwikera kwawanyathi wendi. ³ FUMU ne mbadi kupata wangu no ghakara nongcamu dhodhikuru; mbadi gha kutawedhera hayi hapire kuwahumbitha. FUMU ne kuyendera mukakundu-kundu nomudingundunga, nomavuyi ne rukungu ro kumapadhi ghendi. ⁴ Gha shingeka dikuruviya no kudipwereritha; gha pwereritha marware gho mahe. Mapya ghomuBashani ne ghana yipa, noyitondo yo padirundu dyaKarameli ne kufa, nomitemo dhomuLebanoni ne kukashera. ⁵ Marundu ne kukunyunga-nyunga kughutho wendi, nomandundu ne kuyengumuka; kaye ne kuwa kughutho wendi, yashemwa, kaye no hanu wahe awa ha tunga mo. ⁶ Yidye gho kumwimanena ngeshi ghana pata thikuma? Yidye gho kumushwena ngeshi ghupata wendi ne ghuna yenyi? Ghupata wendi ghoghukuru ne kughunotora yira mudiro, nomawe ne kughabaraghura ye. ⁷ FUMU ne muwa, mondo ghomawa mudiyuwa dyo maghukukutu; no aye ne ghutawedhi ko wa ha mukurupera. ⁸ Ene nanyi gha kushwayithepo ha nyathi wendi nodivavure; nanyi gha kuwa tjidhere mudikokore. ⁹ Mbadiko mudyo mwe mwakaNinive yo kukutha-kutha FUMU. Nanyi gha kuyi hurithe; mbadi gha kwiya karo maghukukututu roghuwadi. ¹⁰ Yira makona no yira yinwa yawa yingorwi, nanyi wa kuwa mine mudiro yira thitoto thokukukuta. ¹¹ Koghadi ghemanine mukatji kenu mwe mwakaNinive, gha ghayarere FUMU ghuyi, ko ghadi gha tjokedhire hanu ha tende ghuyi. ¹² Oyi ne yo gha ghamba FUMU, ''Ngambi hakaAsiriya ne hengi no hakara nohakayita hokutanara, nanyi ha kupwe kuwitha; no hanu wawo nanyi ha kudhongonoke. Ene mwe mwakaYuda: Ngambi kenge na muhumbithire, nanyi na kumu humbithe karo. ¹³ Nanyi na kutendithe keho hakaAsiriya hamuthiye; nanyi na kutjinune menge ghenu.'' ¹⁴ Nyambi ne ghana tapa marawero gho kukwenu mwe mwakaNinive: ''Mbadiko mwana hoka yu gha kushimba mena ghenu. Nanyi na kushwayithemo yitjwandjo mumandhugho ghawanyambi wenu. Nanyi na kuthime mambira ghenu, yoyishi mwa yi. ¹⁵ Mu mone, ghana kumu munu dhomarundu yu ghana kureta mbudhi dhodhiwa, oyu ghana kuyuvitha thiraro! Mudjabwane mafeste ghenu, mwakaYuda, no mukuthe medhero gheno, mbadi hakurwitha karo ha yi, yoyishi nanyi ha kuwa mushwayithe.