¹ Muhanyaghuri ne kuna kukuroghithera kumurwitha. Muture hakungi pawiru dhomakuma ghombara, mukengerere dhira dho kutamba mumbara, mukuruyithere murwe, muture hakayita wenu pofotji. ² FUMU ne kuna kutetundura dikuto dyaYakopu, yira kenge dikuto dyaIsragheli, ngambi kenge shi ha nyathi ne hawa yipithire no kuhanyaghura mine dhovinyu wagho. ³ Yingandekitho yo hanyathi wa hana kwiya no kuna murwitha ne nanyi ya kumuneke ghukihu apa dyakumunekera diyuwa, no nanyi ha kuvate yitere yoyikihughana; yikuvo yo kumakosho ghotukara twawo ne nanyi ya kuvyathe opa ha kwimana kuyita, no nanyi ha kuyeyure maghonga ghawo muwiru. ⁴ Tukara twawo kutjira tu pite muyitarata yomuNinive, kutjira-tjira muyitarata yoyikuru. Ya pitura maramba, no kutjira yira mwethere ghomvura. ⁵ Oyu gha kumuhanyaghura kuyipindhi kuna kwitha hakareri wendi; kwiya wo kwendi ghutambuka kare kukupundaghuka; kutambuka wo haka rwithe mbara. Kuroyitha wo thikandekitho thothikuru thiwa ghamwene. ⁶ Ha nyathi kuyandhura mathero ghokurware pamuthineneko, no mbara ne kokuwa. ⁷ Ha nyathi kushutura Husaba yitere yendi no kumushimba; hapikendi hohakamadi kudira yira makutji, ghukupumura patundjiya twagho. ⁸ Hanu nanyi ha kushwaye muNinive yira kenge meyu gha shwaghanga mundama ghokutuyuka. Hamwe nanyi ha kukuyerere eshi, ''Mwimane, mwimane,'' ene mbadiko yu gha kuthetuka. ⁹ Hanyathi ko kughamba eshi, ''Mushimbe siliveri, mushimbe nongorondo, mbadi ko ghuhura wayo, yinu yomuNinive yoyiwa. ¹⁰ Ninive ne nyara-nyara ghadi no ghana yipa. Hanu nanyi ha kukutume yoyishi mbadi ha kukona kurwa. Marupara ghawo nanyi gha kukutjindje kughoma. ¹¹ Kupi didi keho dikwina dyonyime, dyango di twa dyeranga tunyimeghana, dyango di dhayendere nyime, no hanadho, omu dha pirire kuyapa kehe yino? ¹² Nyime nga hanyaghuranga kehe yino yokuhenyena hanendi; nga gamanga yinu yokuhenyena nyime ghomukadhi, gha yarithire dikwina dyendi no hanyathi, no mwimba dho kutetaghura. ¹³ Mumone, na mwimanganyena- oyi ne yo gha ghamba FUMU ghomashurundate ghomuwiru. Mbo na tumekera tukara twenu mumwithi, hanyathi ne nanyi ha kupaye hanu wenu nomamende. Nanyi na kutendithe yinu yoyihe yomudyo di mwedha kumatunga ghamwe yi thingunuke, nombadiko karo yu gha kuyuva maywi ho hatumi wenu.''