¹ Nando dhaNyambi dheyire kwaYona ghomwana Amitayi, ghuninga eshi, ² ''Wimane ghuyende kuninive, kumbara dhiya dhidhikuru, no kawa konekithe, yoyishi ghuyi wawo ne wana kuma kukwange.'' ³ Ene Yona ne ghemanine no gha tjirire ghashwaye mughukareri waNyambi gha yende kuTarushishi. Gha ghurumukire kuYopa no ghaka wanine dikepa di dina kuyenda kuTarushishi. Ghaka tapire manyinga no ghaka dhinine mudikepa gha yende nawo kuTarushishi, gha shwaye kwaNyambi. ⁴ Ene Nyambi gha tumine dipepo dyodikuru padikuruviya nodyakutjindjire dikare dingundunga dyongcamu padikuruviya. Hanu haghayarire eshi dikepa di ne tamba di tjoke. ⁵ Harughani homudikepa di ha yapire thikuma no kehe katughughuru ghadirere kwanyambi wenu. Hatutughuru wa ha vukumenine yinu yoyiremu eyi yakarire mudikepa mudikuruviya podiyo eshi hadiredhupithe. Ene Yona ye ne mwishi dhodikepa ghakarire, mogha ka kothere. ⁶ Mupiterithi ghodikepa ghayendire kwaYona no kaghamba eshi, ''Nye ghuna kurarrera we? Pinduke! Raperere kwanyambi ghoye! Pamwe nyambi ghoye ne nanyi gha tuyuve maghana shotufe.'' ⁷ Ha kuningathanine eshi, ''Mwiye, tu tende fungu-fungu tumone eshi dye ghana retedherapo ghukukutu ghu ghuna kutuhokokera.'' Ha tendire fungu-fungu, no fungu-fungu dhi ne dhawerire paYona. ⁸ Podiyo haningire kwaYona eshi, ''Tuna kanderera tutongwere eshi yidye ghana kutenda maghukukutu gha ghana kutuhokokera. Nye warughananga, ndani kupi ghuna tundu? Ghomukaditunga munye we, ndani ghomushovo munye we?'' ⁹ Yona ghawa huthire eshi, ''No muHirika me; no na yapa Nyambi, Nyambi ghodiwiru, oyu gha tenda dikuruviya nomuve.'' ¹⁰ Hanu wa hayapire thikuma no hepurire Yona eshi, ''Ghuna mono sha keho ghukukutu ghu ghuna reta?'' Ha dimukire eshi Yona ne Nyambi ghana tjira, yoyishi ghayi wa tongwere. ¹¹ Ha ghambire kwaYona eshi, ''Nye shotukutende keho podiyo eshi dikuruviya ne dikuture?'' Dikuruviya ne dyakuwedherere kumangumbi. ¹² Yona ghawa tongwerire eshi, ''Munidhamune ndani gho muni vukumene mudikuruviya. Podiyo shodikuture dikuruviya kukwenu, na dimuka eshi pamurandu wange dyakumuhokokera dingundunga di.'' ¹³ Ngambi kemo, hatutughuru wa havuyire thikuma eshi hakakume wangu kudiya, ene mbadi hayikonine yoyishi dikuruvuya dyakuwedherere. ¹⁴ Pamurandu ghoyi ha raperere kwaNyambi ghu ninga eshi, ''Tuna kukukanderera, Nyambi, mbadi ghutu thiyerere tufe pamurandu ngeshi tu thiye katughuru yu ghafe, no mbadi ghutumone twe eshi maharwero apa shoghafe katughuru yu, yoyishi owe, Nyambi, ne ghuna tendi thika di ghuna himi.'' ¹⁵ Podiyo ha dhamunine Yona no kumuvukumena mudikuruviya, no dikuruviya dyakuturire. ¹⁶ Podiyo hatutughuru wa ha yapire Nyambu thikuma. Ha tapire mandupu kwanyambi nohakwedherire. ¹⁷ Nyambi ne gha tumine dithi dhodikuru edi dya minine Yona, no Yona ne ghakarire mudira dyo dithi di mayuwa mahatu nodhighuthiku dhihatu.