¹ Mbudhi edhi ghawanine muporofeta Habakuku, ² ''Fumu, rure rongepi na kudirera maghamweno, nombadi wa kuniyuvera? Ame kukoye na kudirera, 'Ghukore!' ene mbadi ghuna kughamwena. ³ Pashanye ghuna kuni kengerera nimone maharwero noyitenda yoyimango? Mahanyaghukero no ghukore ne kughutho wange yidi; poghadi marwanamvo, no dikanyi dishokuru ne kuyeyuka. ⁴ Podigho keho eshi muragho ne ghuna kasha, noghuhangami ne mbadi wa kudhighama rure. Hayi ne hana dhingumutwedha hahungami; munyima ghuhunga ghoghumbango ne kushwagha. ''Fumu gha huthe Habakuku ⁵ ''Kengurure matunga nogha konakone; tetuke notetuke karo thikuma! Amene tamba ni tende yinu mumayuwa ghoye eyi mbo pira kutawa apa mbo ha yi kutongwera. ⁶ Kenge! Ame tamba nimeke diko dyaShaladeni-ditunga dyodipata nomatokwero ghomakuru-awo kuna kudjavura kumbadi dhoditunga no kukungura maghumbo agha ghadi eshi mbadi ghawo. ⁷ Awo kuyapitha nohatjima thikuma; mapangwero ghawo nomoneko ghawo ghawa piterera kughutho wagho. ⁸ Tukambe twagho twashupata kupitakana ndhogho, kutambuka kupitakana mambungu ghorunguru. Yodigho eshi tukambe twagho kudjata nongcamu, nowa hatudhina kutunderera kuthiko thokayenda-awo kutuka yira nwanyi oyu ghana kutambukerera ghakadye. ⁹ Wahe kwiyera ghukore; dindi-dingi dyawo kuyenda yira mupepo ghomumamboregha, no awo kukwata hanu munwato yira muve. ¹⁰ Podigho awo kusherera mafumu, noharaghuri ne hakakusherera kukwagho. Awo kuheka kukehe ngcamu, awo karo kukongawedha yinu pakaye nokuyishimba. ¹¹ Munyima mupepo pombo ghuna pepumukerapo; mbo ghuna piti-hanu homurandu, awa hagorera mwawanyambi ghawo.'' Habakuku ghepura Fumu dipwero dimwe ¹² ''Mbadi watunda mumayuwa ghokare ndi, Fumu Nyambi wange, wange Ghokupongoka Ghofotji? Mbadi mbo tufa ndi. Fumu ghawa tungekera mapangwero, nowe, Diwe, mwawa royithera maroghuthuro. ¹³ Meho ghoye ne gha kushuka thikuma gha kengurure ghuyi, nombadi wakukona we kukenga kuyitenda yoyiyi nothinga tho kughamwena; pashanye keho ghuna kengerera nothinga thokughamwena awa ho kuheta hamwe? Pashanye ghuna porerera oku hayi ne kuna kumina awa hahungama thikuma kuwapitakana? ¹⁴ Kuna kutenda hanu hakare yira thi dhomudikuruviya, yira yinu yokukuyendawera yishipiri muraghuri wayo. ¹⁵ Aye kuwashwayithamo wahe nodirovo; aye kukoka hanu hatundemo no dikwe dyendi; aye kuwapongeka wahe mudikwe dyendi dyokukoka; aye kushogherera no ghana shamberera. ¹⁶ Podigho aye kutapa ndupu kudikwe dyendi nokutumekera thiwe mwene kudikwe dyendi, yoyishi padikwe dyendi poghana kuparera thiwana, noyidya yendi ne yoyiya yawatungi. ¹⁷ Mbo ghana twikera kemo kuuangura mudikwe dyendi ndi, no mbo ghana twikera karo kuthathura matunga ghupira neke ndi?''