¹ Mbo nemana padyango dyange pana kunganga nokukutura nothinda kundundu dho kukengerera, nombona kengi ghudheghetera nakumone eshi yinu munye gha kughamba nange no ngepi edi nakutunda kuyishavina yange. ² Fumu ghani huthire ghughamba eshi, ''Kwatere thino thimoneka, notjange ghuyikenithe pamawe podigho eshi oyu gha kuyitoya ne gha kutjire. ³ Yodigho eshi thimoneka thino ne tho nako dho kughutho no shemwa mbo yina kumumo nombadi mbo yipira kuhokoka. Ngambi kemo eshi mbo yina dhighama, muyitaterere. Ayo ne shemwa mbo yina hokoka mbadimbo yi hurerera. ⁴ Kenge! Oyu ghakara no yirumbera endi yihaka eyi yapira kumu roghera ne gha kununeka. Ene hakushuki ne mbo hana para pamatawero ghawo. ⁵ Yodigho eshi vinyu ne muyipithi ghomuregheya ghokupira thinga podigho eshi mbadi gha kuthe marawero, ene aye kuyeyura yirumbera yendi thikuma yira mbira, no yira yifa, mbadi gha rikanya. Aye kukughongawedhera thinda matunga ghomahe no kukughongawedhera thinda hanu wahe. ⁶ Yinu yoyihe yi ne mbadi mbo yireta manando gho kumusherera nodimbo kukwendi eshi, ''Dihudhi shemwa koyu ghana kuwedherera yinu eyi yidi eshi mbadi yendi! Rure rokuhura kupi mbo shimba ghuwedhera ghuremu gho maghukukutu agha washimba?' ⁷ Mbadi mbo hengipa awa wakorota pawangu, no awa hana kukuyapitha hakupinduke? Mbo ghuna kara muyinyanda kukwagho. ⁸ Yoyishi wahanranganya hanu hashawingi, wahe awa hathiyarapo pawanu mbo hana kuharanganyana. Yoyishi owe wanotora manyinga ghawanu nowa rughana ghukore kuditunga, mumambara, nokwawatungimo wahe. ⁹ 'Dihudhi thikuma koyu gha tungipitha diko dyendi noyinu eyi ghashimba mughukore, no kukondja ghature dighumbo dipire yiponga no kukara ghukarakathi.' ¹⁰ Wareta honyi mudighumbo dyoye mukutundithako hanu hohengi, no wa kuharwera ghothinda. ¹¹ Mawe gho dikuma dyoye mbo ghana diri, no mitambo nowaro mbo yina wa tambura, ¹² Dihudhi thikuma koyu gha tenda mbara nomanyinga, no koyu gha tameka doropa mudiharwero.' ¹³ Mbadi ya tunda kwaNyambi gho kukarererapo eshi hanu harughanene dirara diro no matunga ghomahe gha kughayithe nyara-nyara? ¹⁴ Ene shime kaye mbo kana yara no ghudimuki gho ghuFumu no ghuyerere wendi dyodi dyayara dikuruviya nomeyu. ¹⁵ Dihudhi shemwa koyu mughupata ghathineneka muka maparaghumbo wendi ghanwe gha mu tererithe podigho eshi ghaheke kuthihonyi thawo.' ¹⁶ Mbo dhina kuyarera honyi no mbadi fumwa. Apano keho ne nako dhoye! Nwe, no mbo ghuna neghedha makeneno ghoye! Kopi oyu ghadi mudyoko dyorudyo dyaFumu ne kuna kwiya kukoye, nohonyi mbodhina vivi fumwa dhoye. ¹⁷ Ghuya ghukore watenda kwaLebanoni ne mbo ghuna kungambwera noghaya mahanyawero ghoyimuna yendi ne mbo yina kuyapitha. Owene wa notora manyinga ghawanu no warughana ghukore kuditunga, mambara, nokwawahe awa hatunga mo. ¹⁸ YInu munye wawaneneko kuthitjwandjo? Atho ne ho kuyuwa munu, atho mbadiko yo kukutongwera ene ghumbango pithagho; ghuwa munye yatenderanga muyuwi wayo apa ghayiyuwanga, ayo yinyambi yapo ne mbadi wa kughamba. ¹⁹ 'Dihudhi koyu gho kughamba kuthitjwandjo eshi, Pinduke! Endi kudiwe dishi piri kughamba eshi, Wimane! Eyi yinu ne kuhonga ndi? Mukenge, ayo ne hayiyenga nongorondo no siliveri, ene amo mumwayo ne mbadimo munu. ²⁰ Ene Fumu yene mutembeli wendi gho kupongoka! Muporere kughutho wendi, mwahe mwakakaye.''