¹ Oyi ne yo yinu yokuhatera kuIsagheli oyi Amosi, ghofotji ghopawa kungi ghindjwi mu Tekowa, ghawanine muyimonekera. Ghawanine yinu yi mumawayuwa ghaUziya fumu waJuda, no karo mumayuwa ghaYeroboghamu mwana Joghashi fumu waIsragheli, mwaka dhiwadi kughutho ghomakineno ghomuve. ² Gha ghambire eshi, ''Nyambi ne nanyi ghakuvume kutunderera kuSiyoni; nanyi gha kukuyerere muJerusalema. Muhonyi wawakakuditha ndjwi ne mbo ghuna kukuta, wiru dhodirundu dyaKarameli ne mbodhina kukuta.'' ³ Oyi ne yoghana kughamba Nyambi, ''Kumaharwero mahatu ghaDamasikusi, endi mane, mbadi nakushwayithapo mahumbithero, yoyishi hapurire hakaGilighedi noyirughanitha yoyikuvo. ⁴ Mbona tumu mudiro mundhugho dhaHasagheli, no mboghuna mini mango ghaBen Hadada agha hakunga thiwana. ⁵ Nanyi nakutjore mathero ghaDamasikusi no kushwayithako munu yu gharawera mumuronga wa Aveni, no munu yu ghakwaterera mburo dhoghuraghuri mu Beth Edeni. Hanu homuAramu ne nanyi hakuyende munotwa ku Kiri,'' gha ghamba Nyambi. ⁶ Oyi ne yo ghaghamba Nyambi: '' Kumaharwero mahatu ghaGaza, endi mane, mbadi nakushwayithapo mahumbithero, yoyishi ghatwarire hanu wahe munotwa, mukuwatapa kwa Edomu. ⁷ Mbo na tumu mudiro pamakuma ghaGaza, no nanyi wa kumine mango ghawo agha hakunga thiwana. ⁸ Nanyi nakushwayitheko munu yu ghatunga mu Ashidodi nomunu yu gha kwaterera mburo dhoghuraghuri muAshikeloni. Nanyi nakuhanyaghure Ekoroni, no hakaFilistine hokuthiyarako mbo hana fu,'' gha ghamba Fumu Nyambi. ⁹ Oyi ne yogha ghamba Nyambi: ''Kumaharwero mahatu ghaTaya, endi mane, mbadi mbo ni shwayithapo mahumbithero, yoyishi ha tapa hanu wahe kuEdomu, no tjorire ghundambo wagho ghoghuyendha. ¹⁰ Mbo na tumu mudiro pamakuma ghaTaya, no mbo ghuna mini mango ghawo agha hakunga thiwana.'' ¹¹ Oyi ne yo gha ghamba Nyambi, ''Kumaharwero mahatu ghaEdomu, endi mane, mbadi nakushwayithapo mahumbithero, yoyishi ghakuthakuthire minendi nodimende noghashwayithireko neke. Ghupatawendi watwikerire nombadi washayekire. ¹² Mbona tumu mudiro paTemana, no mboghuna mini mambara ghomuBozrah.'' ¹³ Oyi ne yo gha ghamba Nyambi, ''Kumaharwero mahatu ghohanu homuAmoni, endi mane, mbadi nakushwayithapo mahumbithero, yoyishi hapayurire hakamadi ghamara homuGileghadi, podiyo eshi hakurithe mango ghawo. ¹⁴ Mbona muneka mudiro mumakuma ghaRabaha, no nanyi wakumine mambara, ghukuyerera mudiyuwa dyoyita, no yita yi ne yira dingundunga dyodikuru. ¹⁵ Fumu wagho mbo ghana yendi munotwa, naye nohakareri wendi pofotji,'' gha ghamba Nyambi.