¹ Oyi ne yoghaghamba Nyambi: ''Kumaharwero mahatu ghaMoghabu, endi mane, mbadi nakushayithapo mahumbithero, yoyishi gha tumekire yishokora yafumu waEdomu kumututwi. ² Nanyi na kutume mudiro paMoghabu, no nanyi wa kumine mango ghawo gha Keriyote agha hakunga thiwana. Moghadi ne nanyi ghakufe kumughuma ghoghukuru, kukukuyerera no mughuma ghotorombita. ³ Nanyi nakuyipithe mupanguri yu gha tunga mumwendi, no nanyi nakupaye hakamakuto wahe nendi,'' gha ghamba Nyambi. ⁴ Oyi ne yo gha ghamba Nyambi: ''Kumaharwero mahatu ghaYuda, endi mane, mbadi nakushwayithapo mahumbithero, yoyishi hashwenine muragho waNyambi no mbadi hakuthire marawero ghendi. Ghumbango wagho wawatendithire hakarere hanyambi hombango, hanyambi hofotji wa hakarere hakerekandongo wawo. ⁵ Mbo na tumu mudiro paYuda, no mbo ghuna mini mango ghokukunga thiwana ghomuYerusalema.'' ⁶ Oyi ne yogha ghamba Nyambi: ''Kumaharwero mahatu ghaIsragheli, endi kumane, mbadi nakushwayithapo mahumbithero, yoyishi haghurithire hanu hokupira murandu kusilveri no hanu hokunyanda kuyisandari. ⁷ Kudjata wo padhimutwi dhohahepwe thika kenge hadjatanga hanu parukungu pamuve; mbadi wa kuterera wo awa hanu hana kunyandeka. Wiha na mwana wahe kuyenda kwamukamadi ghofotji nokushamuna dina dyange. ⁸ Kurara wo kumbadi dhokehe thinyaku payitere yi hana kashimba kwawahepwe wa hana korotitha masherenyi kate hakughahuthe gho masherenyi, no kunwa wo vinyu wawanu wa hana tapitha mundhuo dhanyambi wawo. ⁹ Na yipithire haAmorite kughutho wawo, ghure wawo ne yira ghure ghoyitondo yoyire; hatanarire yira yitondo yokutanara. Ngambi kemo na yipithire mbuyo dhendi kuwiru nomidhi dhendi kwishi. ¹⁰ Karo, namushwayithire muEgiptena nonamupiterere kumyaka makumi mane mumamboreya mukamune muve wawaAmorite. ¹¹ Na tororire haporofeta mukatji ko hanenu nohaNasarite muhamatjaha wenu. Mbadi kemo ndi, mwanu waIsragheli?- Oyi ne yighamba yaNyambi. ¹² Ene mwa hongaghurire haNasarite hanwe vinyu nokurawera haporofeta eshi mbadi haporofete. ¹³ Mutegherere, mbo na muthanyuna yira kenge thikara thi thina yara nombuto thathanyunanga munu. ¹⁴ Muka kutambuka ne mbadi ghakuwana kokutjirera; mukangcamu ne mbadi ghakuwedherera ngcamu kungcamu dhendi; no mukamangcamu naye mbadi ghakukughamwena thinda. ¹⁵ Mukandamba ne mbadi ghakwimana; mukakutjira thikuma ne mbadi ghakwomboroka; muka kudhina kakambe ne mbadi ghakukughamwena thinda. ¹⁶ Ngambi hakayita hoghutjima mbo hana tjira nyara-nyara mudiyuwa diya- oyi ne yo gha ghamba Nyambi.''