¹ Mungirishe dhomuAntokia, mwa karire haporofeta nawa hongi. Mwakarire Barnabasi, Simiyoni (oyu hethire eshi Nigeri), Lusiusi waSirene, Manaeni (oyu gha karire mushere ghomukuru waherodi), naSaghulusi. ² Oku shime ha karera mukukugha Fumu no kudhirerekedha, Mupepo gho kupongoka waghambire eshi, ''Muni shwayitheremo Barnabasi naSaghulusi, ha ka rughane yirughana eyi na wethera.'' ³ Munyima dhokudhirerekedha no kuraperera, ha kambekire moko poha tutughuru wa, no hawa shwayithiremo. ⁴ Munyima Barnabasi naSaghulusi ha karire ghutawedhi kuMupepo gho kupongoka no ha yendire kuSeleusia; kushwagha po ha voyethire ndhira kuCyprus. ⁵ Apa ha karire mumbara dhaSalamisi, ha yuvithire manando ghanyambi mumasinagoge ghawaJuda. Ha karire karo naJohanesi Marukusi mukuwa ghamwena. ⁶ Apa ha pitere muthirudhi thothihe kuPafosi, ha wanine murodhi ghumweya, muporofeta ghombango gho muJuda, ghodina eshi Bar-Jesusi. ⁷ Murodhi yu ne gha karire ghushere nanduna Sergighusi Paghulusi, murume ghomaghano. Katughuru yu ghethire haBarnabasi naSaghulusi, yoyishi gha shaninen kuyuva manando ghaNyambi. ⁸ Ene Elymasi gho murodhi (kemo ha di torokire dina dyendi) gha wa shwenekire, gha kondjire mukupirura matawero gha nduna. ⁹ Ene Saghulusi, oyu hethire eshi Paghulusi, ghayarire noMupepo mupongoki, gha munungurukire thikuma ¹⁰ no kughamba eshi, ''Owe mwana shadipinyi, wayara noyinu thikuma naghumbango noghuyi. Gho mukanore gho kehe rudhi ro ghupongoki. Mbadi mbo ghukona kushinga kupirura ndhira dhokughororoka dhaFumu, kukona wendi ndi? ¹¹ Kenge, dyoko dyaNyambi ne papoye didi, no mbo ghuna kara mukunga. Mbadi mbo mona diyuwa pakanako kokafupi.'' Popo vene mume nomakokore kokuwera pameho ghaElymasi; gha tangire kuyendaghura gha shane hanu ha mukoke kudyoko. ¹² Munyima apa gha monine nduna eyi ya hokokire, gha tawire, yoyishi gha tetukire kuyihonga yo kuhatera kwaFumu. ¹³ Munyima Paghulusi nawashere wendi ha turirepo ruyendo kutunda muPafosi no heyira kuPerga muPamphylia. Ene Johanesi gha hukire kuJerusalema. ¹⁴ Paghulusi nawayendhendi hashwayire muPerga no hayendire kuAntiyokia muPisidia. Oku shime momo hayendire kusinagoge mudiyuwa dyosabata no haka hungumanine. ¹⁵ Munyima dho kumana kutoya miragho nawa porofeta, hapiterithi homu sinagoge hawa tumemene mbudhi eshi, ''Mwashere, ngeshi mudi nombudhi dhomatjokedhero kohanu pano ne, mudhi ghambe.'' ¹⁶ Paghulusi ghemanine no ghawa ravire nodyoko dyendi; no gha ghambire eshi, ''Mwanu ho muIsraeli na mwe mwa fumaneka Nyambi, mutegherere. ¹⁷ Nyambi wawanu waIsraeli gha tororire ha kerekandongo wetu no ghawengipithire apa nga ha karanga muEgipute, no ghaneyire dyoko dyendi ghawa piterere ha shwayemo. ¹⁸ Mamwaka makumi gha tungire nawo mumamboreya. ¹⁹ Munyima dho kudhimitha mako kwoko nomawadi muKanaan, gha tapire kwawanu wetu ditunga dyagho dyoghupingwa. ²⁰ Yinu yi ya hokokire mumamyaka mathere mane nomyaka makumi kwoko. Munyima dho yoyiheya yi, Nyambi ghawa pire Hapanguri kate muporofeta Samuweli. ²¹ Munyima hanu pohepurire fumu, naNyambi ghawapire Saghulusi mwana Kish, katughuru gho diko dyaBenjamin, gha kare fumu mamyaka makumi mane. ²² Munyima Nyambi gha mushwayithiremo, pogha yeyure Davita gha kare fumu. Yo kuhatera kwaDavita, pogha ghambire Nyambi eshi, 'Nawana Davita ghomwana Jessie ghakare katughuru munyima dho mutjima wange, oyu gha tendanga kehe yi namushanena gha tende.' ²³ Mudiko dyoyu katughuru Nyambi ghareta Mushuturi kwaIsraeli, Jesusi, dyodi ghayikuruperithire. ²⁴ Kughutho gho kuna kuma Jesusi, Johanesi gha yuvithire diyoyero nomapirukero ghawanu wahe, kwawanu waIsraeli. ²⁵ Johanesi pakumanitha yirughana yendi, gha ghambire eshi, ''Yame dye muna kuni ghayara me?'' Amene mbadi yame yo. Ene mutegherere, oyu gha kwiya munyima dhange, makuha gho kumapadhi ghendi name mbadi nafumana kughashutura.' ²⁶ Mwayendhange, mwahana hoka waAbraham namwe mwayapa Nyambi, yo kushwagha mumwetu eshi edhi mbudhi dhomashutukero gha dhi tuma. ²⁷ Kowa ha tunga muJerusalema, noharaghuri wagho, mbadi ha mudimukire, no ha yarithire yighamba yawa porofeta eyi hana toyanga kehe sabata mukumupangura. ²⁸ Ngambi kenge hapirire kuwana murandu gho kumughatwera kuyifa, hepurire Pilatus gha mupaghe. ²⁹ Apa ha manine yoyiheya yi hamutjangera, hamushwayethire pathikurushe no kumutura mumbira. ³⁰ Ene Nyambi gha muvumbure mwawafu. ³¹ Ha mumonine mayuwa ghomengi kowa ha keyire nendi kutunda kuGalileya kate kuJerusalema. Hanu wane hohashupi wendi kwawanu. ³² Podigho tuna kumutongwera mbudhi dhodhiwa edhi ha toyedhere kwawakerekandongo wetu ³³ ghana yi tuyarithera, twahanawo, mukuyeyura Jesusi. Thika edi yapwa kutjanga mumbapira dhoghuwadi dhawaPisalemi: 'Yowe mwanange padyarero, dyarero nakara nowiho.' ³⁴ Ghapwire kutumuna mwawafu podigho eshi yirama yendi mbadi mbo yore, Nyambi dyo ghana kughamba modhi ndhira: 'Nanyi na kukupe ghupongoki no matungekero kumatoyedhero ghaDavita.' ³⁵ Eyi yo ghagha ghambera karo muPisalemi ghumweya eshi, 'Mbadi mbo ghu tawedhera karo mupongoki ghoye gha mone yishinyeha.' ³⁶ Apa Davita gha rughanine yihima yaNyambi no muhoko wendi, gha fire; hamu vumbekire noyirama yawihe noyirama yawo ya yipire. ³⁷ Ene oyu gha vumburire Nyambi mbadi ya yipire yirama yendi. ³⁸ Podigho eshi muyidimuke , mwayendhange, eshi kupitera moyu katughuru hamuyuvithera hathiyerero ghomaharwero. ³⁹ Mumwendi kehe yu gho kutawa ghana kupwa kushutura kuyinu eyi wa pirire kushutura muragho waMosesi. ⁴⁰ Mukoneke keho kuyinu eyi ha ghambire haporofeta eshi yamuhokokera: ⁴¹ Mukenge, mwakadinyatho nomutetuke no mbo muna yongara; ame kuna kurughana yirughana mumayuwa ghenu, yirughana eyi mbo mupira kutawa, ngambi ngo ghumwe gha yi muyuvithere kukwenu.''' ⁴² Apa ha shwayirepo haPaghulusi naBarnabasi, hanu hawa kumbere eshi ngo ha kughambe manando gho kemo karo musabata gho kurandako. ⁴³ Munyima dho kupwa thirughana tho musinagoge, thingi thawa Juda nowa ha kuyire nawo hakuthire Paghulusi naBarnabasi, awa hawa tjokedhire mukutwara kughutho thineke thaNyambi. ⁴⁴ Musabata gho kurandako, thingi tha wanu homumbara ha konganine mukunayuva nando dhaFumu. ⁴⁵ Pakumona mbunga dhi haJuda, hayarire nonya noha ghambire yoyimango kuhatera koyi gha hongire Paghulusi noha mutharukire. ⁴⁶ Ene Paghulusi naBarnabasi noghudhighutjima eshi, Yina kara mudyo eshi nando dhaNyambi hadhighambe pakutanga kukwenu. Nokumumona mwa kudhi mwayera kuya no kukumona mwathinda eshi no kughayara eshi mbadiko mudyo kwingena mumoyo ghororuheya, mumone, atwe mbo tuna huka kwawahayidena. ⁴⁷ Dyo gha tu rawera Fumu eshi, 'Amene namutura mukare munyenge mwawahayidena, podigho eshi mukarete makomweneno kumango ghomahe pakaye.''' ⁴⁸ Kenge edi ha yiyuvire hahayidena yi, hashambererire no ha kuyire Nyambi. ⁴⁹ Nothingi thawo hapwire kutorora kumoyo ghororuheya hatawire. Nando dhaFumu dhayeranine kokuhe mumukunda. ⁵⁰ Ene haJuda hayendire kwawa mbuyama homudyo nokwawa tutughuru awa hapitererithire mbara. Harongathanine yinyandeka yaPaghulusi naBarnabasi no kuwa tjidha mumukunda wawo. ⁵¹ Ene Paghulusi naBarnabasi ha kukumunine mbundu kumapadhi ghawo kukwagho no hayendire kumbara dhaIkoniyum. ⁵² Hakashishongero hayarire noyishamberera no Mupepo gho kupongoka.